ޖަޕާނުގެ އެހީގައި މާލޭގެ ކަނޑުތޮށި މަރާމާތު ކުރުމުގެ މަޝްރޫއު ފަށަނީ
ޖަޕާނު ސަރުކާރުގެ ހިލޭ އެހީގެ ދަށުން މާލޭގެ ކަނޑުތޮށި މަރާމާތު ކުރުމުގެ މަޝްރޫއު، އެގައުމުގެ ކުންފުންޏަކާ ދިވެހި ސަރުކާރުން ހަވާލުކޮށްފިއެވެ.
ކޮންސްޓްރަކްޝަން މިނިސްޓްރީން ބުނީ މިއީ މާލެ އައިލެންޑް (ކޮންސްޓްރަކްޝަން ފޭސް) - ޕެކޭޖް 1ގެ ނަމުގައި ކުރިއަށް ގެންދާ މަޝްރޫއު ހަވާލުކޮށްފައި ވަނީ ޖަޕާނުގެ ޓޯޔޯ ކޮންސްޓްރަކްޝަން ކޮމްޕެނީ ލިމިޓެޑާއެވެ.
މިއަދު ބޭއްވި ރަސްމިއްޔާތެއްގައި މި އެއްބަސްވުމުގެ ދިވެހި ސަރުކާރުގެ ފަރާތުން ސޮއިކުރެއްވީ ކޮންސްޓްރަކްޝަން މިނިސްޓްރީގެ ސްޓޭޓް މިނިސްޓަރު އިބްރާހިމް ތައާމް މުހައްމަދެވެ. އަދި ޖަޕާނު ކުންފުނީގެ ފަރާތުން ސޮއިކުރެއްވީ ޑެޕޮއިޓީ ޖެނެރަލް މެނޭޖަރު އިޒާވާ ކަންއެވެ.
މި މަޝްރޫއުގެ ދަށުން ސަލްމާން މިސްކިތް ބިއްދޮށުގައިވާ ސަރަހައްދުން ފެށިގެން ރާޅުގަނޑު ސަރަހައްދާ ހަމައަށް ތަރައްގީކުރާނެވެ. އެގޮތުން ރާޅުގަނޑު ސަރަހައްދުގައި ބީޗެއް ހަދައި، އެ ސަރަހައްދު ތަރައްގީކުރަނީ ރާޅާއެޅުންތެރިންނާއި އެ ކުޅިވަރަށް ހާއްސަ ސަރަހައްދެއްގެ ގޮތުގައެވެ.
މިނިސްޓްރީން ބުނީ މި މަޝްރޫއު ވެގެންދާނީ ޖަޕާނު ސަރުކާރުން މާލެ ވަށައިގެންވާ ކަނޑުތޮށި ހެދުމުގެ މަޝްރޫއު ހިންގި ފަހުން މާލޭގައި ކުރިއަށް ގެންދާ އެންމެ ބޮޑު މަޝްއޫއަށް ކަމަށެވެ.
މި މަޝްރޫއުގެ އަގަކީ 700 މިލިއަން ޖަޕަނީސް ޔެން ނުވަތަ ގާތްގަނޑަކަށް 4.8 މިލިއަން ޑޮލަރެވެ.
ޖަޕާނު ސަރުކާރުން މާލޭގެ ކަނޑުތޮށި އަޅައިދީފައި ވަނީ 1987ވަނަ އަހަރު ރާއްޖެއަށް ކުރިމަތިވި ބޮޑު ރާޅުގެ ކާރިސާގައި މާލެއަށް ލިބުނު ގެއްލުންތަކަށް ފަހު، ރާއްޖޭން އެ ގައުމުގެ އެހީއަށް އެދުމުންނެވެ. އެ މަޝްރޫއު 1987އިން 2002ވަނަ އަހަރަށް އެގައުމުން ކޮށްދީފައިވެއެވެ.
