ތަކުރާރުކޮށް ސްކޭމްކުރާ މައްސަލައިގައި ހައްޔަރުކުރި ނަދީފްގެ ބަންދު 25 ދުވަހަށް އިތުރުކޮށްފި
ތަކުރާރުކޮށް ސްކޭމްކުރާ މައްސަލައިގައި ހައްޔަރުކުރި ގއ. ގެމަނަފުށި / ރަންކޮކާގެ، ނަދީފް މުހައްމަދު, 36. ގެ ބަންދުގެ މުއްދަތު އިތުރުކޮށްފި އެވެ.
މިދިޔަ ޑިސެމްބަރު މަސް ނިމެން އުޅެނިކޮށް ނަދީފް ހައްޔަރުކުރީ ވިޔަފާރިކުރާ މީހަކަށް ކަސްޓަމަރެއްގެ ގޮތުގައި ގުޅައި އޯޓީޕީ ހޯދައިގެން ބޭންކް އެކައުންޓް ހެކުކުރި މައްސަލައެއްގަ އެވެ.
އޭގެ ފަހުން ދެ ފަހަރެއްގެ މަތިން އޭނާގެ ބަންދުގެ މުއްދަތު އިތުރުކުރި އިރު ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން ނަދީފް އިތުރު 25 ދުވަހަށް ބަންދުކުރަން ވަނީ އަމުރުކޮށްފަ އެވެ.
ފުލުހުން ކުރިން ބުނެފައިވާ ގޮތުން ނަދީފް ވަނީ 29،600 އަށްވުރެ ގިނަ ފައިސާ އެހެން މީހެއް އެކައުންޓަށް ޖަމާކޮށް، އެކިފަހަރު މަތިން 24،700 ރުފިޔާ އޭޓީއެމް މެދުވެރިކޮށް ނަގާފައެވެ. އަދި 4900 އަށްވުރެ ގިނަ ރުފިޔާ އެހެން ފަރާތެއްގެ އެކައުންޓަށް ޖަމާކުރުމަށްފަހު އެފައިސާތައް ނަގާފައިވާކަންވެސް އެނގިފައިވާކަމަށް ފުލުހުން ބުނެފައި ވެއެވެ.
އޭގެ އިތުރުން އެކި ފަރާތްތަކުގެ އަތުން ކޭޝްކާޑު ކުއްޔަށް ނަގައިގެން އޭޓީއޭމް މެދުވެރިކޮށް ސްކޭމްގެ ފައިސާ ނަގަމުންދާ މީހެއްކަން ތަހުގީގަށް އެނގިފައިވާކަމަށް ފުލުހުން ބުންޏެވެ.
