ޑޮލަރު މާރުކުރުން "ފްލޯޓިން އެކްސްޗޭންޖް"އަކަށް ބަދަލުކުރަން ރައީސް ނަޝީދު ގޮވާލައްވައިފި
ރާއްޖޭގައި ޑޮލަރު މާރުކުރުމުގެ ކަންކަން "ފްލޯޓިން އެކްސްޗޭންޖް"އެއްގެ ދަށުން ކުރިއަށް ގެންދަން ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.
ރާއްޖޭގައި ސަރުކާރުން ފެށުނީއްސުރެވެސް ގެންގުޅެމުން އައީ ފިކްސްޑް އެކްސްޗޭންޖް ރޭޓް ސިސްޓަމް އެކެވެ. ނަމަވެސް ކަޅު ބާޒާރުގައި ޑޮލަރުގެ އަގު އަބަދުވެސް އޮންނަނީ ބަދަލުވެއެވެ. ޑޮލަރުގެ އަގު އޮފިޝަލް ރޭޓްގައި 15.42އޮތް ނަމަވެސް ކަޅު ބާޒާރުގައި މިހާރު އޮތީ 20ރުފިޔާއިން މަތީގައެވެ.
ރައީސް ނަޝީދު އެކްސްގައި މިއަދު ވިދާޅުވީ ރުފިޔާ ޑީވެލޫކޮށް 20ރުފިޔާއަށް ބަދަލުކުރި ނަމަވެސް އެ ރޭޓްގައި ބޭންކުތަކުން ޑޮލަރު ނުލިބޭނަމަ ކަޅު ބާޒާރު ގަދަޔަށް ހިނގާނެ ކަމަށެވެ.
އެހެންވެ ރާއްޖެއަށް މުޅިން ރަނގަޅު ގޮތަކީ ޑޮލަރުގެ ރޭޓް މުޅިން ފްލޯޓިންއަށް ދޫކޮށްލުންކަމަށް ވެސް އެމަނިކުފާނު ވިދާލުވިއެވެ.
"ޑޮލަރުގެ އަގަކީ ބާޒާރުގެ ތަބީއަތުން ކަނޑައެޅޭ ހަމަ ހަމަ އަގަށް ހެދުން" ނަޝީދު ވިދާޅުވި އެވެ.
ރައީސް ނަޝީދުގެ ވެރިކަމުގެ ކުރިން ޑޮލަރު ވިއްކަމުން އައީ 12.75ރުފިޔާ އަށެވެ. ނަމަވެސް އެމަނިކުފާނުގެ ވެރިކަމުގައި ޑޮލަރުގެ 15.42އަށް މަތިކުރިއެވެ.
Ads by STO
