ކޮންމެ ދުވަހަކީ ވެސް ޓީޗަރުންގެ ދުވަހެކެވެ.
އަޅުގަނޑުމެންގެ ލޯބިވާ މުދައްރިސުންނަކީ އަޅުގަނޑުމެންނަށް ޓަކައި އެތައް ގުރުބާނީއެއް ވާ ބައެކެވެ. ސުކޫލް ދައުރުގެ އުފާވެރި ހަނދާންތައް އިތުރަށް ރީތި ކޮށްދެނީ އެ ޓީޗަރުންގެ ހަނދާން އައުވުމުންނެވެ، އެ ޓީޗަރުންގެ ހިތްހެޔޮކަމާއި އަޅުގަނޑުމެންގެ ކުރިއެރުމަށްޓަކައި ކޮށްދެއްވަވާފައިވާ ކަންތައްތައް ހަނދާންވުމުންނެވެ. އެ ޓީޗަރުން އަޅުގަނޑުމެންނަށް އިލްމު އުނގަންނައިދިނުމަށް ޓަކައި ކުރައްވާ މަތިވެރި ޖިހާދުގެ މަތިން ހަނދާން އައު ވުމުންނެވެ.
ޓީޗަރުން ކުރާ ބުރަ މަސައްކަތުގެ އަގު އަޅުގަނޑުމެން ކޮންމެ ދުވަހަކުމެ ވަޒަން ކުރަން ޖެހެއެވެ. އެ ޓީޗަރުން ކުރާ ބުރަ މަސައްކަތަކީ އަޅުގަނޑުމެން ކޮންމެ ދުވަހަކު ބަލައިގަންނަ މަސައްކަތަކަށް ވާން ޖެހެއެވެ. ނަމަވެސް އަޅުގަނޑުމެންގެ ޓީޗަރުންގެ އަގު އަޅުގަނޑުމެން އަދާކުރަން ޖެހެނީ ހަމަ އެކަނި ބުނާ ބަހަކުން ނޫނެވެ. ދޭ ހަދިޔާއަކުން ނޫނެވެ. އެ ޓީޗަރުންނަށް ޓަކައި ފަޅައިދޭ ކޭކަކުންނެއް ނޫނެވެ.
އަޅުގަނޑުމެން އެ ޓީޗަރުންގެ އަގުވަޒަން ކުރާނީ ކިހިނެއް ހެއްޔެވެ؟ އެ ޓީޗަރުން އުފާކޮށްދޭނީ ކިހަނަކުން ހެއްޔެވެ؟ އެ ޓީޗަރުން ކޮށްދޭ މަސައްކަތަކީ ނުހަނު އަގުހުރި މަސައްކަތްތަކެއް ކަން އެ ޓީޗަރުންނަށް އަންގައިދޭނީ ކިހިނެއް ހެއްޔެވެ؟
ލޮބުވެތި ދަރިވަރުންނެވެ. ޓީޗަރުންގެ އަގުވަޒަން ކުރުމަކީ ޓީޗަރުންގެ ބަސްއަހާ ޓީޗަރުންގެ ބަސް ގަބޫލު ކުރުމެވެ. އެ ޓީޗަރުންގެ ބަހަށް ބޯލަނބާ އެ ޓީޗަރުން ދުވަހުން ދުވަހަށް ދޭ މަސައްކަތްތައް ނިންމުމެވެ. ކުލާހުގައި ޓީޗަރު ކިޔަވައިދެއްވާ ވަގުތުގައި އެ ޓީޗަރަކަށް އުނދަގޫ ވާގޮތަށް ވާހަކަ ދައްކައި ސަކަރާތް ޖަހާ ނުހެދުމެވެ. އެ ޓީޗަރު ހިތުގައި ޖެހޭފަދަ އެއްްޗެއް ދުވަހަކު ވެސް ނުބުނުމެވެ. އެ ޓީޗަރުގެ ގޯސް ވާހަކަތައް އަނެކުންގެ ގާތުގައި ނުދެއްކުމެވެ. އެ ޓީޗަރު އެ ކޮށްދެއްވާ ބުރަ މަސައްކަތްތައް ދަނެގެން އެ ޓީޗަރުންނަށް އަދަބު އިހްތިރާމް އަދާ ކުރުމެވެ.
ލޮބުވެތި ބެލެނިވެރިންނެވެ. ތިމާއަށް ތިމާގެ ދަރި ދޮންފުތު ވުމަކީ ވަރަށް ގިނަ ބެލެނިވެރިންނަށް ވާ ކަމެކެވެ. މީގެ ނަތީޖާއަކަށް ވަނީ ދަރިފުޅު ދަށް ނަތީޖާއެއް ހޯދައިގެން އައުމުން ވެސް ޓީޗަރު ކުށްވެރި ކުރުމެވެ. އެޓީޗަރަކީ ކިޔަވައިދޭން ނޭނގޭ ޓީޗަރެއް ކަމުގައި ދުށުމެވެ. އެ ޓީޗަރަށް ގުޅާ "ބަވާލުމުން" ތިމާ އަކީ މާ ވަރުގަދަ މީހެއް ކަމަށް ފައިސަލާ ކުރުމެވެ. މިއީ މަދުން ނަމަވެސް އަޅުގަނޑުމެންގެ މުޖުތަމައުގައި ކަންތައްތައް ވަމުންދާ ގޮތެވެ.
ޓީޗަރަކު ދަރިވަރެއްގެ ގާތުގައި ރަނގަޅު ވާހަކައެއް ބުނި ނަމަވެސް މިއަދު ފެންނަނީ އެ ޓީޗަރުންނާ ދިމާއަށް އަނބުރާ ހަބަސް ބުނާ މަންޒަރެވެ. އެއްވެސް އަދަބެއް އިހްތިރާމެއް ނެތި ޓީޗަރުންނާއި ދަރިވަރުން ވާހަކަ ދައްކާ މަންޒަރެވެ. ކުލާހުގައި ޓީޗަރު ކިޔަވައި ދެއްވަމުންދާއިރު ޓީޗަރަށް ޖެއްސުން ކުރާ މަންޒަރެވެ. އެތައް ދަރިވަރުންނެއް ވެގެން ޓީޗަރުންނަށް ހަނގާކޮށް ހަދާފައި ވެސް އެބަހުއްޓެވެ. އެކަމުގެ ސަބަބުން ޓީޗަރުން ނަފްސާނީ ގޮތުންވެސް ބަލިމަޑު ކަމަކަށް ގޮސްފައި އެބަހުއްޓެވެ.
މި ހުރިހާ ކަމެއް މިހެން ހުރެ، އަޅުގަނޑުމެންނަށް ޓީޗަރުންގެ ބުރަ މަސައްކަތް ކޮންމެ އަހަރަކު ވެސް މި ފެންނަނީ 05 އޮކްޓޯބަރުގައެވެ. އެދުވަހުގައި ޓީޗަރުންނަށް އެކިއެކި ހަދިޔާތައް ދީ ޓީޗަރުންނަށް ޓަކައި އެކި ހަފްލާތައް ބާއްވާ އުޅޭ މަންޒަރު ވެސް ފެނެއެވެ. މައްސަލައެއް ނޫނެވެ. ޓީޗަރުންގެ ދުވަހުގެ ގޮތުގައި ބައިނަލްއަގްވާމީ ގޮތުން ފާހަގަކުރާ ދުވަހަކީ 05 އޮކްޓޯބަރެވެ.
އެހެންނަމަވެސް ދަންނަވަންތޯއެވެ؟ ޓީޗަރުންގެ އަގު ހަމައެކަނި އަދާ ކުރަންވީ ދުވަހަކީ 5 އޮކްޓޯބަރެއް ނޫނެވެ. ޓީޗަރުންނަށް އަދަބު އިހްތިރާމް އަދާ ކުރަންވީ ދުވަހަކީ ވެސް ހަމައެކަނި 5 އޮކްޓޯބަރެއް ނޫނެވެ. ޓީޗަރުން ދެކެ އަޅުގަނޑުމެން ވާ ލޯބި އެ ޓީޗަރުންނަށް އަންގައިދޭންވީ ވެސް ހަމައެކަނި 5 އޮކްޓޯބަރަކު ނޫނެވެެ.
ކޮންމެ ދުވަހަކީ ވެސް ޓީޗަރުންގެ އަގުވަޒަން ކުރާ ދުވަހަކަށް ހަދަމާ ހިނގާށެވެ. އާއެކެވެ.އެހެނީ ކޮންމެ ދުވަހަކީ ވެސް މުދައްރިސުންގެ ދުވަހެކެވެ. ހުކުރެއް ހޮނިހިރެއް ނެތި ކޮންމެ ދުވަހަކީ ޓީޗަރުން ދަރިވަރުންނާ މެދު ވިސްނާ ދުވަހެކެވެ. އެދަރިވަރުގެ އަޚުލާގަށް ބަދަލު އަންނަނީ ކީއްވެ ކަމާ މިދަރިވަރަށް ރަނގަޅަށް ވިސްނައި ދެވޭނީ ކިހިނެއްކަމާ މެދު ޓީޗަރުން ވިސްނާ ފިކުރު ކުރެއެވެ. ކްލާހުގައި ހޭދަ ކުރާ ވަގުތުކޮޅަށް ތައްޔާރުވުމަށް އެތައް ވަގުތެއް ހޭދަ ކުރެއެވެ.
