އެމްޑީޕީގެ މަސްލަހަތު ގެއްލުވާލައިފި، ގަޕޯ އިސްތިއުފާދޭންޖެހޭ: މޫކޭ

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އެންމެ މަތީ މަސްލަހަތަށް ގެއްލުންދީ، އާންމު މެމްބަރުންގެ މެދުގައި އޮތް ރޫހު ނަގާލާފައިވާކަމަށް ތުހުމަތުކޮށް، އެ ޕާޓީގެ ޗެއާޕާސަން އަބްދުލްޣަފޫރު މޫސާ (ގަޕޯ) މަގާމުން ވަގުތުން އިސްތިއުފާ ދިނުމަށް އެމްޑީޕީގެ ގައުމީ މަޖިލީހުގެ މެމްބަރު މޫސާ އަލިމަނިކު (މޫކޭ) ގޮވާލައިފިއެވެ.

މީސްމީޑިއާ 'އެކްސް' ގައި ހިއްސާކުރި ޕޯސްޓެއްގައި މޫކޭ ވަނީ ޗެއާޕާސަންގެ އަމަލުތަކަށް ވަރަށް ބޮޑަށް ފާޑުކިޔާފައެވެ. އެގޮތުން، އެއްވެސް ފަރާތެއް ބާކީނުކޮށް އެންމެން ގުޅިގެން ޕާޓީއަށް ކުރިއަށް ދެވެން އޮތް ފުރުސަތު ނަގާލައި، އާންމު މެމްބަރުން މާޔޫސްކޮށްލާފައިވާ ކަމަށް އޭނާ ބުނެފައިވެއެވެ. އަދި މިއީ މަގާމުން ދުރަށްދާން ޖެހޭފަދަ ސީރިއަސް މައްސަލައެއްކަން އޭނާ ފާހަގަކުރިއެވެ.

https://twitter.com/VMookey/status/2041194802583335155

މީގެ އިތުރުން، އެމްޑީޕީއަކީ ވަކި ފަރުދެއްގެ އަމިއްލަ މިލްކެއް ނޫންކަން ފާހަގަކުރަމުން، ޕާޓީގެ އެންމެ މަތީ މަސްލަހަތު ފުނޑުފުނޑުކޮށްލާފައިވާ ކަމަށް މޫކޭ ތުހުމަތުކުރިއެވެ. އަދި ޕާޓީގެ އެތެރޭގެ ހަމަޖެހުން ގެއްލޭ ފަދަ ގޮތަކަށް އަމަލުކުރާ ކޮންމެ މީހަކު، އެއީ ޣަފޫރު ކަމުގައި ވިޔަސް ނުވަތަ އެހެން ފަރާތެއް ކަމުގައި ވިޔަސް، އާންމު މެމްބަރުންގެ ރޫހު މަރާލުމަށް ފުރުސަތު ނުދެވޭނެކަމަށް އޭނާގެ މެސެޖުގައި ބަޔާންކޮށްފައިވެއެވެ.