އުތުރާއި މެދުރާއްޖެތެރޭގެ އަތޮޅުތަކަށް ކުރިއަށް އޮތް ދެ ދުވަހު ވެސް މޫސުން ގޯސް: މެޓް
މިހާރު ކުރަމުންދާ ވިއްސާރައިގައި ރާއްޖޭގެ އުތުރާއި މެދުތެރޭގެ ސަރަހައްދުތަކަށް ކުރިއަށް އޮތް ދެ ދުވަހު ވެސް މޫސުން ގޯސްވާނެ ކަމަށް މޫސުމާ ބެހޭ ޤައުމީ އިދާރާ (މެޓް) ލަފާކޮށްފިއެވެ.
އެ އިދާރާއިން މައުލޫމާތު ދެއްވާ ގޮތުގައި، މިއަދުގެ އިތުރުން މާދަމާ ވެސް މި ސަރަހައްދުތަކަށް ބޯކޮށް ވާރޭވެހުން އެކަށީގެންވެއެވެ. އަދި އާންމު ގޮތެއްގައި ގަޑިއަކު 10 މޭލާއި 20 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށް ލަފާކުރެވޭއިރު، ވިލާގަނޑުގައި ގަޑިއަކު 40 މޭލަށް ވައިގަދަވުމަކީ އެކަށީގެންވާ ކަމެއް ކަމަށް މެޓުން މައުލޫމާތުދެއެވެ. މީގެ އިތުރުން ރާއްޖޭގެ ދެކުނުގެ އަތޮޅުތަކަށް ވެސް ކޮންމެވެސް ވަރަކަށް ކެރީގެ އަސަރު ފޯރާނެކަމަށް މެޓް އޮފީހުން ވަނީ ބުނެފައެވެ.
މިކަމާ ގުޅިގެން ކަނޑުތަކުގެ ހާލަތަށް ބަލާއިރު، އުތުރާއި މެދުތެރޭގެ ކަނޑުތައް އާދައިގެ ވަރަކަށް ގަދަވި ނަމަވެސް، ކަނޑުދަތުރުފަތުރު ނުކުރެވޭ މިންވަރަށް ރާޅުބޮޑު ނުވާނެކަމަށް އެ އިދާރާއިން ހާމަކުރެއެވެ. އެހެންނަމަވެސް، ކަނޑުމަގުން ދަތުރުކުރައްވާ ފަރާތްތަކުން ރައްކާތެރިކަމުގެ ފިޔަވަޅެއްގެ ގޮތުން، ފުރުމުގެ ކުރިން މޫސުމާ ގުޅޭ އެންމެ ފަހުގެ މައުލޫމާތު ސާފުކުރުމަށް މެޓް އޮފީހުން ވަނީ އިލްތިމާސްކޮށްފައެވެ.
