ލ. އަތޮޅު ޔުނެސްކޯ ބަޔޮސްފިއަރ ރިޒާވްއަކަށް ހެދުމަށް މި އަހަރު ހުށަހަޅަނީ
ރާއްޖޭގެ ތިމާވެށި ރައްކާތެރިކުރުމުގެ ބޮޑު އަމާޒުގެ ދަށުން، ލ. އަތޮޅަކީ ޔުނެސްކޯ ބަޔޮސްފިއަރ ރިޒާވެއް ކަމުގައި ހަމަޖެއްސުމަށްޓަކައި މިއަހަރުގެ ތެރޭގައި ރަސްމީކޮށް ހުށަހެޅުމަށް ނިންމަވައިފިއެވެ.
މި މަޝްރޫޢާ ގުޅޭގޮތުން މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، ލ. އަތޮޅަށް މި ޚާއްޞަ ދަރަޖަ ހޯދުމަށް ބޭނުންވާ އެންމެހާ ފަންނީ އަދި އިދާރީ ލިޔެކިޔުންތައް މިހާރު ވަނީ ފުރިހަމަކުރެވިފައެވެ. އަދި މިވަގުތު ކުރިއަށްދަނީ މިކަމާ ގުޅޭގޮތުން އަތޮޅުގެ ރައްޔިތުން ހޭލުންތެރިކުރުވުމާއި، އާންމުންގެ ޚިޔާލާއި މަޝްވަރާ ހޯދުމުގެ މުހިންމު މަރުހަލާއެވެ. ބަޔޮސްފިއަރ ރިޒާވްއެއް ކަނޑައެޅުމުގައި އެންމެ އިސް ދައުރެއް އަދާކުރަނީ އެ ސަރަހައްދެއްގެ ރައްޔިތުންގެ ރުހުމާއި ބައިވެރިވުން ކަމަށްވާއިރު، އެ ވުޒާރާއިން އަމާޒުހިފާފައި ވަނީ ރައްޔިތުންގެ ފުރިހަމަ ތާއީދާ އެކު މިކަން ކާމިޔާބުކުރުމަށެވެ.
ސަރުކާރުގެ ފުރަތަމަ ފަސް އަހަރު ދުވަހުގެ ތެރޭގައި ރާއްޖޭގެ އެކި ކަންކޮޅުތަކުގައި އައު ތިން ބަޔޮސްފިއަރ ރިޒާވް އަދި ނޭޗަރ ޕާކުތަކެއް ތަރައްޤީކުރުމަކީ ސަރުކާރުގެ މުހިންމު ސިޔާސަތެކެވެ. މި ސިޔާސަތު ތަންފީޒުކުރުމުގެ ގޮތުން، މިފަދަ ދަރަޖައެއް ހޯދުމަށް ޝައުޤުވެރިވާ އަތޮޅުތަކަށް ޕްރޮޕޯސަލް ހުށަހެޅުމުގެ ފުރުޞަތު މިހާރު ވަނީ ހުޅުވާލެވިފައެވެ. ލ. އަތޮޅުގެ އިތުރުން ޅ. އަތޮޅު ވެސް ބަޔޮސްފިއަރ ރިޒާވްއަކަށް ބަދަލުކުރުމަށްޓަކައި ކުރަންޖެހޭ ދިރާސާތަކާއި އެހެނިހެން މަސައްކަތްތައް ހަލުވިކަމާ އެކު ދަނީ ކުރެވެމުންނެވެ.
މީގެ ކުރިން ރާއްޖޭގައި މި ޝަރަފުވެރި ދަރަޖަ ހޯދާފައިވާ ބ. އަތޮޅާއި، އައްޑޫ ސިޓީ އަދި ފުވައްމުލައް ސިޓީގައި ވެސް ބަޔޮސްފިއަރ ރިޒާވްއަކަށް އެތަންތަން ހެދުމުގެ ކުރިން އާންމުންގެ ޚިޔާލު ހޯދާފައިވެއެވެ. ޔުނެސްކޯއިން ބަޔޮސްފިއަރ ރިޒާވްގެ ދަރަޖަ ފުރަތަމަ ދޫކުރަނީ ދިހަ އަހަރު ދުވަހުގެ މުއްދަތަކަށެވެ. އެ މުއްދަތު ހަމަވުމުން އެ ސްޓޭޓަސް ދެމެހެއްޓުމަށްޓަކައި، އަލުން ސަރވޭތައް ހެދުމަށްފަހު ރިޕޯޓުތައް ހުށަހަޅަން ޖެހެއެވެ.
މިފަދަ ބައިނަލްއަޤުވާމީ ދަރަޖައެއް ލިބުމަކީ ދިވެހިރާއްޖޭގެ ނާޒުކު ޤުދުރަތީ ވެށި ދެމެހެއްޓެނިވި ގޮތެއްގައި ރައްކާތެރިކުރުމަށް އެޅޭ ވަރަށް ބޮޑު ބާރެކެވެ. އަދި އޭގެ ސަބަބުން ފަތުރުވެރިކަމުގެ ސިނާޢަތަށް ވެސް ނުހަނު ބޮޑެތި މަންފާތަކާއި ކުރިއެރުންތަކެއް ލިބިގެންދާނެއެވެ.
