މާލޭގެ އުތުރު ފަރާތު ބޮޑުތަކުރުފާނު މަގުގައި ތާރުއެޅުމަށްޓަކައި އެ ސަރަހައްދު އެއްކޮށް ބަންދުކުރަނީ

މާލޭގެ އުތުރު ފަރާތު ބޮޑުތަކުރުފާނު މަގު ތަރައްޤީކުރުމުގެ ބޮޑު މަޝްރޫޢުގެ ދަށުން އެ ސަރަހައްދުގައި ތާރު އެޅުމުގެ އަމަލީ މަސައްކަތް ފެށުމަށްޓަކައި، މިއަދުގެ ދަންވަރުން ފެށިގެން އެ މަސައްކަތް އެއްކޮށް ނިމެންދެން އިއްޒުއްދީން ފާލަމުން ފެށިގެން ހެންވޭރު ފެރީ ޓާމިނަލާ ދެމެދުގެ ސަރަހައްދު ޢާންމު ދަތުރުފަތުރަށް ބަންދުކުރުމަށް ދިވެހި ފުލުހުންގެ ޚިދުމަތުން ނިންމައިފިއެވެ.

ފުލުހުން މަޢުލޫމާތު ދެއްވާފައިވާ ގޮތުގައި، ޖޫން މަހުގެ 7 ވަނަ ދުވަހުގެ ރޭގަނޑު 12:00 އިން ފެށިގެން އެ މަގުގެ ބޮޑު ބައެއް ބަންދުކުރެވޭނެއެވެ. މިގޮތުން ޢާންމުންނަށް ފަސޭހަކުރުމުގެ ގޮތުން ޓްރެފިކަށް ބަންދުކުރެވޭނެ ސަރަހައްދުތައް ސާފުކޮށް އަންގައިދޭ ޗާޓެއްވެސް ފުލުހުންގެ ފަރާތުން ވަނީ މީސްމީޑިއާގައި ޙިއްޞާކުރައްވާފައެވެ.

މި މަޝްރޫޢުގެ ކޮންޓްރެކްޓަރ ކަމަށްވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކުރައްވާ ގޮތުގައި، ފުރަތަމަ ފިޔަވަހީގެ މަސައްކަތްތައް ހަލުވިކަމާއެކު ކުރިއަށްދާއިރު، ސެގްމަންޓް ހަތަރެއްގެ ސަބް-ގްރޭޑިންގ މަސައްކަތް މިހާރު ދަނީ ކުރަމުންނެވެ. އަދި ބިމުއަޑީގެ ނަރުދަމާ ނިޒާމު އަޕްގްރޭޑްކުރުމުގެ މަރުޙަލާ މުޅިން ނިމިފައިވާއިރު، ފެން ހޮޅިތަކާއި، ކޭބަލް ޖަންކްޝަންތައް އަދި ދުވާރާއި ކާބްސްޓޯން ހަރުކުރުމުގެ މަސައްކަތުގެ ދެބައިކުޅަ އެއްބަޔަށްވުރެ ބޮޑު ބައެއް ނުވަތަ 52 އިންސައްތަ ވަނީ ނިންމާލެވިފައެވެ.

ކުރިއަށް އޮތް ހަފުތާގެ ތެރޭގައި ފެނާއި ނަރުދަމާގެ އައު ގުޅުންތައް ގޭގެއަށް ދިނުމުގެ މަސައްކަތް ނިންމާލުމަށް ތާވަލުކުރެވިފައިވާ ކަމަށްވެސް އެމްޓީސީސީން މަޢުލޫމާތުދެއެވެ. މީގެ އިތުރުން މާލޭގެ މަގުތަކުގައި ފެންބޮޑުވާ މައްސަލައަށް ދާއިމީ ޙައްލެއް ގެނައުމަށްޓަކައި ބަހައްޓާ ސްޓޯމް ވޯޓަރ ޕަމްޕް ސްޓޭޝަންގެ މަސައްކަތްތައް ޖޫން މަހުގެ މެދަކާ ހިސާބަށް ނިންމާލުމަށް އަމާޒުހިފާފައިވާ ކަމަށާއި، މި ހަފުތާގައި 130 މީޓަރުގެ އެއްގަމު ތޮށީގެ ކެޕިންގ ކޮންކްރީޓް އެޅުން ކުރިއަށްދާނެ ކަމަށްވެސް އެ ކުންފުނިން ބުނެފައިވެއެވެ.

ބޮޑުތަކުރުފާނު މަގު ޒަމާނީ ފެންވަރަކަށް ތަރައްޤީކޮށް ފުޅާކުރުމުގެ މި ބޮޑު މަޝްރޫޢުގެ ތެރެއިން، އެ މަގު ފެހިކޮށް ގަސް އިންދުމަށް ޚާއްޞަ ޕްލޭނެއް ތައްޔާރުކުރެވިފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިއްޔެގެ ވަގުތެއްގައި އިޢުލާންކުރައްވާފައެވެ.