ދިވެހިބަހުގެ ބަގީޗާގެ ފަރާތުން މުދައްރިސުންގެ ދުވަހުގެ ހާއްސަ ޖަލްސާއެއް ބާއްވައިފި
"ދިވެހިބަހުގެ ބަގީޗާ" އިން އިންތިޒާމްކޮށްގެން މުދައްރިސުންގެ ދުވަސް ފާހަގަ ކުރުމުގެ ގޮތުން ހާއްސަ ޖަލްސާއެއް ބާއްވައިފިއެވެ. މި ޖަލްސާ ކުރިއަށް ދިޔައީ އޮންލައިންކޮށްނެވެ.
ދިވެހިބަހުގެ ބަގީޗާއަކީ ކުޑަކުދިންގެ ހިތުގައި ދިވެހިބަހާއި އަދަބިއްޔާތަށް ލޯބި ޖެއްސުމާއެކު އެކަމަށް އެކުދިންގެ ހިތުގައި ޝައުގު އުފައްދައި ކުށެއް ނެތް ސާފު ދިވެހިބަހުން ވާހަކަދެއްކުމަށާއި ލިޔަން ދަސްކޮށްދޭން ދިވެހި މުދައްރިސް އަލްފާޟިލް އަޝްރަފް ޢަލީގެ އަމިއްލަފުޅަށް ހިންގަވާ އޮންލައިން ޚާއްޞަ ޙަރަކާތެކެވެ.
ޒޫމް މެދުވެރިކޮށް ހޮނިހިރު ދުވަހުގެ ރޭ ބޭއްވި މި ޖަލްސާ ޝަރަފްވެރި ކޮށްދެއްވީ މިނިސްޓްރީ އޮފް އެޑިއުކޭޝަންގެ ޑެޕިއުޓީ މިނިސްޓަރ ޝަރުމާ ނަސީރެވެ. މި ޖަލްސާގައި ދިވެހިބަހުގެ ބަގީޗާގެ ރ ކިލާހުގެ ހުރިހައި ދަރިވަރުން ކަހަލަ ގޮތަށް ގިނަ ހަރަކާތްތަކެއް ފެނިގެން ދިޔައެވެ. އެ ގޮތުން ދުވަހާ ގުޅޭ އެކި މައުޟޫޢުތަކަށް ވާހަކަ ދެއްކުމާއި، ޅެން ކިޔުމާއި، ލަވަކިޔުމާއި، ރައިވަރު ކިޔުމާއި، ބަނދި ކިޔުމާއި ވާހަކަ ކިޔުން ފަދަ ތަފާތު ހަރަކާތްތަކެއް ކުރިއަށް ދިޔައެވެ. މީގެ އިތުރަށް ހަލީސާ ކިޔުމާއި ޚަބަރު ކިޔުމާއި އާޅެން ކިޔުން ވެސް އޮތެވެ. ކުދިންގެ ކޮންމެ ހަރަކާތަކުން ވެސް ދައްކައި ދިނީ ދިވެހި ބަހަށް އެކުދިންގެ ހިތުގައި ދެވިފައިވާ މަތިވެރި ދަރަޖައާއި މަގާމެވެ.
މި ހާއްސަ ޖަލްސާގައި ވާހަކަފުޅު ދައްކަވަމުން މިނިސްޓްރީ އޮފް އެޑިއުކޭޝަންގެ ޑެޕިއުޓީ މިނިސްޓަރ ޝަރްމާ ނަސީރު ވިދާޅުވީ މި ޖަލްސާގައި ބައިވެރިން ހުށަހަޅައިދިން ހުށަހެޅުންތަކުން އެކުދިންގެ ހިތުގައި މުދައްރިސުންނަށް ދެވިފައިވާ މަގާމް ވަރަށް ބޮޑަށް ހާމަވި ކަމަށެވެ. މުދައްރިސުންނަކީ ދިވެހި ގައުމުގެ ފަޚުރުކަމުގައި އެ ކުދިން ފާހަގަ ކޮށްދީފި ކަމަށް ވެސް ވިދާޅުވިއެވެ. އަދި ސުކޫލްގައި ލިބޭ އިލްމުގެ އިތުރުން، މި ފަދަ ކުލާހެއްގައި ތަމްރީނުވުމުގެ ފުރުސަތު ލިބުމަކީ އެ ކުދިންގެ ނަސީބު ކަމުގައި ވެސް ޝަރްމާގެ ވާހަކަފުޅުގައި ފާހަގަ ކުރެއްވިއެވެ. މިފަދަ މުހިންމު މަސައްކަތެއް އެކުދިންނަށް ދެއްވީތީ ދިވެހިބަހުގެ ބަގީޗާގެ ބާނީ އަޝްރަފް ޢަލީއަށް އެކަމަނާ ޝުކުރު އަދާކުރެއްވިއެވެ. އަދި އެ ކުދިންގެ ހުށަހެޅުންތަކުގެ ފަހަތުގައި އެންމެ ބޮޑު އެހީތެރިކަމެއް ވެދެއްވި އެއް ބަޔަކީ ބެލެނިވެރިންކަން ފާހަގަ ކުރައްވަމުން، ބެލެނިވެރިންނަށް ވެސް އެ ކަމަނާ ޝުކުރު އަދާ ކުރެއްވިއެވެ. އެ ކަމަނާގެ ވާހަކަފުޅު ނިންމަވައިލެއްވީ ދުވަހާ ގުޅޭ ގޮތުން، އެ ކަމަނާ އަމިއްލަފުޅަށް ހައްދަވާފައިވާ ލަވައެއް ވިދާޅުވެދެއްވަމުންނެވެ.
މި ޖަލްސާ ނިންމަވައި ލެއްވުމަށް ފަހު "ދެން" އާ ވާހަކަ ދައްކަވަމުން ދިވެހިބަހުގެ ބަގީޗާގެ ބާނީ އަޝްރަފް ޢަލީ ވިދާޅުވީ މި ކިލާސްތައް ފެށިއިރު ކުދިން ތިބި ފެންވަރާއި އެ ކުދިންގެ މިހާރުގެ ފެންވަރާ އަޅައި ބަލާއިރު އެތައް ގުނައެއް ރަނގަޅުވެފައި ވާ ކަމަށެވެ. މިރޭގެ ޖަލްސާއިން އެ ކުދިން ސާބިތުކޮށްދިނީ އެ ކުދިންގެ ހިތުގައި ދިވެހިބަހަށް އޮތް ލޯބި ކަމަށެވެ. އަދި އެ ކުދިން އެކުރި މަސައްކަތަކީ ވަރަށް އާދަޔާޚިލާފު، މޮޅު މަސައްކަތެއްގެ ގޮތުގައި އަޝްރަފް ސިފަކުރެއްވިއެވެ.
ހަމައެހެންމެ ޝައުގުވެރިކަމާއެކު ކުދިންނަށް ބަހުގެ ތެރެ އިން ފުރުސަތު ހޯދައިދެވޭނަމަ، ކުދިންގެ ހިތުގައި ދިވެހިބަހަށް އޮންނަ ލޯބި އިތުރުވާނެ ކަމަށް ވެސް އަޝްރަފް ފާހަގަ ކުރެއްވިއެވެ.
"ދިވެހިބަހުގެ ބަގީޗާއިން" ދަސްކޮށްދެނީ ދިވެހިބަހުގެ ރީތި ގޮތްތަކާއި ހަމަތައް ، ދިވެހިބަހަކީ ލޯބި އެއްޗެއްކަން. އެއީ ކުދިންގެ އަމިއްލަ ހިތާ ގުޅިފައިވާ އެންމެ މުހިންމު ބަހާކަން. ކުދިންގެ އަމިއްލަވަންތަކަމުގެ މައިގަނޑު އަސާސްކަން. ދިވެހިބަހުގެ ބަގީޗާގެ ދަރިވަރުން ދިވެހިބަހުގެ ބަގީޗާގައި އުޅެނީ އުފަލާއި ހިތްހަމަ ޖެހުމާ އެކު އުދުހޭ ކޮކާތަކެއް ފަދައިން. އެ ކުދިން އަޅުގަނޑާ ވާހަކަދައްކާ. ވަރަށް ގިނަ ވާހަކަތައް ހިއްސާ ކުރޭ. ލަދެއް ބިރެއް ސިހުމެއް ނެތި ކުދިން އަނގަތަޅާ. އެންމެ ބޮޑަށް އުފާވަނީ ކުދިން ދިވެހިބަހުން ވާހަކަދައްކާ އަޑު އިވޭތީ. ދިވެހިބަހުގެ ބަގީޗާގެ ދަރިވަރުން ތަފާތު ވާނެ. ވަރަށް މޮޅުވާނެ. " އަޝަރަފް ވިދާޅުވިއެވެ.
"މި އުފާވެރި އުންމީދީ ފުރުސަތު ކުޑަކުދިންނަށް ހޯއްދަވައި ދެއްވީ އެ ކުދީންގެ ލޮބުވެތި ބެލެނިވެރީންކަމަށް. އެހެންކަމުން ލޮބުވެތި ހުރިހައި ބެލެނިވެރީންނަށް ނުހަނު ލޯތްބާ އެކު ޝުކުރު ދަންނަވަން. މި ބަގީޗާގައި ރާއްޖޭގެ އެކިކަންކޮޅުތަކުން ކުދިން އުޅޭ. އަދި ރާއްޖޭން ބޭރުގައި ދިރިއުޅޭ ވަރަށް ގިނަ ދިވެހި ކުދިން ވެސް ވަރަށް ގިނައިން އުޅޭ.މިއީ ފެށުނު ވަރަށް އުފާވެރި މަސައްކަތެއް. ހުއްޓައި ނުލައި ކުރިޔަށް ގެންދާނަން.” އަޝްރަފްގެ ވާހަކަފުޅުގައި އިތުރަށް ވިދާޅުވިއެވެ.
ދަރިވަރުން އިސްނަގައިގެން ބޭއްވި މި ޖަލްސާގައި އެކުދިންގެ މަދަރުސާތަކުގެ ބައެއް ވެރީންނާއި މުދައްރިސުންނާއި ބެލެނިވެރީން ވެސް ބައިވެރިވެވަޑައިގަތެވެ.
Ads by STO
