ގުޅުން ބަދަހިކުރުމަށް އެމެރިކާގެ މަންދޫބަކާ އެކު ރައީސް މުހިންމު މަޝްވަރާތަކެއް ކުރައްވައިފި

ދިވެހިރާއްޖެއާއި އެމެރިކާއާ ދެމެދު ސިޔާސީ ގުޅުން ޤާއިމުކުރިތާ 60އަހަރު ފުރުމާ ދިމާކޮށް، ދެޤައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް ފުޅާކުރުމާ ގުޅޭ ގޮތުން، އެމެރިކާގެ ސްޓޭޓް ޑިޕާޓްމަންޓްގެ އެސިސްޓެންޓް ސެކްރެޓަރީ އޮފް ސްޓޭޓް ފޯ ސައުތު އެންޑް ސެންޓްރަލް އެފެއާޒް، އެސް. ޕޯލް ކަޕޫރާ އެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހެނދުނު ރައީސް އޮފީހުގައި މުހިންމު މަޝްވަރާތަކެއް ކުރައްވައިފިއެވެ.

އެމެރިކާގެ އިސް މަންދޫބު ރައީސްގެ އަރިހަށް ކުރެއްވި މި އިޙުތިރާމުގެ ޒިޔާރަތުގައި، މައިގަނޑު ގޮތެއްގައި އަލިއަޅުއްވާލައްވާފައި ވަނީ ވިޔަފާރިއާއި އިޤުތިޞާދީ މައިދާނުގެ އިތުރުން ފަތުރުވެރިކަމުގެ ސިނާޢަތް ކުރިއެރުވުމަށް ގުޅިގެން މަސައްކަތްކުރުމަށެވެ. މީގެ އިތުރުން، މި ސަރަޙައްދުގެ ސަލާމަތާއި ރައްކާތެރިކަން ކަށަވަރުކުރުމާއި، މެރިޓައިމް ސެކިއުރިޓީގެ ދާއިރާއިން ދެމެހެއްޓެނިވި ގޮތެއްގައި އެއްބާރުލުން ދިނުމުގެ ބޮޑު ޝައުޤުވެރިކަމެއް އެމެރިކާގެ ފަރާތުން ވަނީ ފާޅުކޮށްފައެވެ.

މި ބައްދަލުކުރެއްވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ، ސަރުކާރުން ގެންގުޅުއްވާ "މޯލްޑިވްސް ފަސްޓް" ސިޔާސަތުގެ ދަށުން، ޤައުމުގެ އިޤުތިޞާދު ސިންދަފާތުކޮށް ފުޅާކުރުމަށް ޓަކައި ބޭރުގެ އިންވެސްޓްމަންޓްތަކާއި ތަރައްޤީގެ އާ މަޝްރޫޢުތަކަށް ރާއްޖޭގެ ދޮރުތައް ހުޅުވިފައިވާކަމުގެ ޔަޤީންކަން އެމެރިކާގެ މަންދޫބަށް އަރުވާފައެވެ.

ފާއިތުވި ހަދިހަ އަހަރު ދުވަހުގެ ތެރޭގައި އެމެރިކާއާއި ރާއްޖެއާ ދެމެދު އުފެދިފައިވާ ބަދަހި ރަޙުމަތްތެރިކަމުގެ މައްޗަށް ދެބޭފުޅުން ވަނީ ފުޅާ ދާއިރާއެއްގައި ވާހަކަފުޅުދައްކަވާފައެވެ. އަދި ކުރިމަގުގައި ވެސް ދެ ޤައުމުގެ މަސްލަހަތު ހިމެނޭ މުހިންމު ކަންކަމުގައި އަތުގުޅާލައިގެން ގާތްކޮށް މަސައްކަތްކުރުމަށް ދެ ގައުމުން އެއްބަސްވިއެވެ.