އިންޑޮނޭޝިއާގެ ނޮން-ރެސިޑެންޓް ސަފީރުކަމަށް ޑރ. ޝަބީނާ
ދިވެހިރާއްޖެއިން އިންޑޮނޭޝިއާއަށް ކަނޑައަޅާ ނޮން-ރެސިޑެންޓް ސަފީރެއްގެ ގޮތުގައި، މިހާރު ވެސް މެލޭޝިއާގައި ހުންނަވާ ދިވެހި ސަފީރު ޑރ. މަރިޔަމް ޝަބީނާ އަޙްމަދު އައްޔަންކުރެއްވުމަށް، މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި 49 މެންބަރުންގެ އަޣުލަބިއްޔަތުން ރުހުން ދެއްވައިފިއެވެ.
މި މަޤާމަށް ޑރ. ޝަބީނާ އައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ނަންފުޅު ފޮނުއްވާފައި ވަނީ ފާއިތުވި މޭ މަހުގެ 13ވަނަ ދުވަހުއެވެ. މި މައްސަލަ ދިރާސާކުރުމަށް ފަހު، އެކަމަށް އެކަށީގެންވާ ޤާބިލުކަން ހުރި ބޭފުޅެއްކަމަށް ކަނޑައަޅައި، މަޖިލީހުގެ ޚާރިޖީ ގުޅުންތަކާބެހޭ ކޮމިޓީން އެކަމަނާއަށް ރުހުން ދިނުމަށް ފާސްކޮށްފައި ވަނީ ޖޫން މަހުގެ 22ވަނަ ދުވަހުއެވެ.
ދިވެހިރާއްޖޭގެ ފޮރިން ސަރވިސްގެ ޤާނޫނުގެ 14ވަނަ މާއްދާގެ ދަށުން ބޭރު ޤައުމުތަކަށް ސަފީރުން އަދި ނޮން-ރެސިޑެންޓް ސަފީރުން އައްޔަންކުރައް ވާނީ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާއެވެ. އެގޮތުގެ މަތިން އިންޑޮނޭޝިއާގެ ސަފީރުކަމަށް ޑރ. ޝަބީނާ މިއަދު ހަމަޖެއްސެވިއިރު، އެކަމަނާއަކީ ރާއްޖެއިން މެލޭޝިއާއަށް ކަނޑައަޅުއްވާފައި ހުންނަވާ ރެޒިޑެންޓް ސަފީރު ވެސް މެއެވެ.
