މިދިޔަ މަހު ކުޑަކުދިންނަށް އަނިޔާކުރުމުގެ 86 މައްސަލައެއް
މިދިޔަ ޖޫން މަހު ކުޑަކުދިންނަށް އަނިޔާކުރުމުގެ 86 މައްސަލައެއް ރިޕޯޓްކޮށްފިއެވެ.
މިނިސްޓްރި އޮފް ހެލްތު، ފެމިލީ އެންޑް ވެލްފެއާގެ ތަފާސްހިސާބުތަކުން ދައްކާ ގޮތުގައި ޖޫން މަހު ގޭތެރޭގައި އަނިޔާ ކުރަނިކޮށް ފެނުމުގެ 8 މައްސަލައެއް ރިޕޯޓުކޮށްފައިވާއިރު ނަފްސާނީ އަނިޔާ ގެ 5 މައްސަލައެއް ރިޕޯޓުކޮށްފައިވެއެވެ. ޖިސްމާނީ އަނިޔާގެ 17 މައްސަލަ ރިޕޯޓުކޮށްފައިވާއިރު ޖިންސީ އަނިޔާގެ 25 މައްސަލައެއް ރިޕޯޓުކޮށްފައިވެއެވެ. މީގެ އިތުރުން ރިޕޯޓުކޮށްފައިވާ ކުޑަކުދިންނާ ގުޅޭ މައްސަލަތަކަކީ:
- ކުޑަކުދިން ޓްރެފިކް ކުރުން - 1
- ބްލެކްމެއިލް ކުރުން - 3
- ގަނާގެ ޝިކާރައަކަށްވުން - 9
- އިންޓަނެޓް މެދުވެރިކޮށް ގަނާ ކުރުމުގެ ޝިކާރައަކަށްވުން - 1
- ކުޑަކުދިންގެ އޮރިޔާންކާޑު އުފެއްދުން - 1
- އިންޓަނެޓް މެދުވެރިކޮށް ކުދިން ގްރޫމްކުރުން - 2
- އިހުމާލުވުން - 14
ކުޑަކުދިން އަހުލާގީ މައްސަލަތަކުގެ ތެރޭގައި ރުޅިގަދަވެ ރުޅި ކޮންޓްރޯލް ނުކުރެވުމުގެ 16 މައްސަލައެއް ރިޕޯޓްކޮށްފައިވާއިރު، ގެއިން ފިލައިގެން ދިއުމުގެ މައްސަލައެއް ރިޕޯޓްކޮށްފައިވެއެވެ. ސުކޫލަށް ދިއުމަށް އިންކާރުކުރުމުގެ 7 މައްސަލައަކާއި އެހެނިހެން 6 މައްސަލައެއް ރިޕޯޓުކޮށްފައިވެއެވެ. އަދި ދައުލަތުގެ ބެލުމުގެ ދަށުގައި ތިބި ކުދިންގެ ތެރެއިން ކުއްޖަކު ފޯސްޓާ ކޮށްފައިވާއިރު 4 ކުއްޖަކު އަނބުރާ އާއިލާއާ ހަވާލުކޮށްފައިވެއެވެ.
މީގެ އިތުރުން އެ މިނިސްޓްރީ އިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި ވަކި ޖިންސަކަށް ވީތީ ކުރާ އަނިޔާ އާއި ގޭތެރޭގެ އަނިޔާގެ 35 މައްސަލައެއް ރިޕޯޓްކޮށްފައިވެއެވެ. ރޭޕްގެ 2 މައްސަލައެއް ރިޕޯޓްކޮށްފައިވާއިރު ޖިސްމާނީ އަނިޔާގެ 17 މައްސަލައެއް ރިޕޯޓްކޮށްފައިވެއެވެ. ނަފްސާނީ އަނިޔާގެ 9 މައްސަލައެއް ރިޕޯޓްކޮށްފައިވާއިރު ބިރުދެއްކުމުގެ 3 މައްސަލައެއް ރިޕޯޓްކޮށްފައިވެއެވެ. އަދި ގަދަކަމުން ގެއަށް ވަދެގަތުމުގެ މައްސަލައަކާއި ބްލެކްމެއިލް ކުރުމުގެ 3 މައްސަލައެއް ރިޕޯޓްކޮށްފައިވެއެވެ.
