ލަކުޑިފަތިތަކެއް ކަނޑަށް އެޅި އޮޔާދާތީ، ދަތުރުވެރިން ސަމާލުވުމަށް އިލްތިމާސްކޮށްފި
ބ. އޭދަފުށީގެ އިރުދެކުނުން 4 ނޯޓިކަލް މޭލު ބޭރުން ދޯންޏެއް އަރިއަޅައިލައި، ލަކުޑިފަތިތަކެއް ކަނޑަށް އެޅި އޮޔާދާތީ، ދަތުރުވެރިން ސަމާލުވުމަށް އިލްތިމާސްކޮށްފިއެވެ.
ޤައުމީ ދިފާއީ ބާރުން ބުނީ، "ސީލައިން 3" ނަމަކަށް ކިޔާ ދޯންޏެއްގައި ހުރި ލަކުޑިތަކެއް އައްސާފައިވާ ބެލްޓު ކަނޑައިގެން ގޮސް، ކާށިދޫ ކަނޑުގެ ސަރަހައްދަށް އެ ދޯނިން ލަކުޑި ފަތިތަކެއް އޮޔާދަމުންދާ ކަމަށެވެ. އަދި އެ ތަކެތި އޮޔާދާކަމަށް ލަފާކުރެވެނީ އިރުމައްޗަށް ކަމަށް ވެސް ދިފާއީ ބާރުން މައުލޫމާތުދެއެވެ.
އެހެންކަމުން، މި ސަރަޙައްދުން ދަތުރުކުރައްވާ ފަރާތްތަކުން މިކަމަށް ޚާއްޞަ ސަމާލުކަމެއް ދެއްވުމަށް އިލްތިމާސްކުރާ ކަމަށާއި އަދި ޚާއްޞަކޮށް، ރޭގަނޑުގެ ވަގުތުތަކުގައި މި ސަރަޙައްދުން ދަތުރުކުރައްވާ ފަރާތްތަކުން އިތުރަށް ސަމާލުވުމަށް ވެސް ދިފާއީ ބާރުން އިލްތިމާސްކުރެއެވެ.
