އަންނަ އަހަރުގެ ރޯދަމަހު ދަނޑުވެރިންގެ މާރުކޭޓުގައި ތަކެތި ވިއްކުމުގެ ފުރުސަތު ހުޅުވާލައިފި

އަންނަ އަހަރުގެ ބަރަކާތްތެރި ރަމަޟާން މަހަށް ހާއްސަކޮށްގެން ބާއްވާ "ދަނޑުވެރިންގެ ބާޒާރު"ގައި ތަކެތި ވިއްކުމަށް ބޭނުންވާ ފަރާތްތަކަށް ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން އެ ފުރުސަތު މިއަދު ހުޅުވާލައިފިއެވެ.

މި ޕްރޮގްރާމަކީ މުޅި ރާއްޖެއަށް އަމާޒުކޮށްގެން ކުރިއަށްގެންދާ ހަރަކާތަކަށްވުމާ އެކު، ބައިވެރިވާން އެދޭ ދަނޑުވެރިން ނަން ނޯޓުކުރަން ޖެހޭނީ އެމީހަކު ނިސްބަތްވާ ރަށެއްގެ ލޯކަލް ކައުންސިލް މެދުވެރިކޮށެވެ. މިގޮތުން، ޝައުގުވެރިކަން ފާޅުކުރާ ފަރާތްތަކުގެ ދަފުތަރެއް އެކުލަވާލައި ވުޒާރާއަށް ފޮނުވުމަށް މިހާރު ރާއްޖޭގެ ހުރިހާ ރަށު ކައުންސިލްތަކަށް އަންގާފައިވާނެކަމަށް ކަމާބެހޭ މިނިސްޓްރީން ހާމަކުރެއެވެ.

އަތޮޅުތެރޭގެ ދަނޑުވެރިންނަށް އެމީހުންގެ އުފެއްދުންތަކަށް ފަސޭހައިން މާކެޓެއް ހޯދައިދިނުމަށް ރާވާފައިވާ މި ބާޒާރު މާލޭގައި ގާއިމުކުރާނެ ވަކި ސަރަހައްދެއް ނިންމާނީ، ބައިވެރިވުމަށް އެދި ހުށަހަޅާ މީހުންނާއި ރަށްތަކުގެ އަދަދަށް ރިއާޔަތްކުރުމަށް ފަހު ކަމަށް ވުޒާރާއިން މައުލޫމާތުދެއެވެ.

މި މާރުކޭޓު ހިންގުމަށް އެކުލަވާލާފައިވާ ޤަވާއިދު ބުނާގޮތުން، ގޮޅިތަކުގައި ވިއްކޭނީ ހަމައެކަނި ދިވެހި ފަސްގަނޑުގައި ހައްދާފައިވާ ތާޒާ ތަރުކާރީ އާއި މޭވާއެވެ. އެހެނިހެން ބާވަތްތަކުގެ މުދާ ވިއްކުމާއި، ވިޔަފާރީގެ އެއްވެސް މަރުހަލާއެއްގައި ބިދޭސީ މަސައްކަތްތެރިން ބޭނުންކުރުން ވަނީ ހަރުކަށިކޮށް މަނާކޮށްފައެވެ. ފާއިތުވި އަހަރުގެ ރޯދަމަހު މާލޭގެ ހާބަރު ސަރަހައްދުގައި ވެސް މިފަދަ ބާޒާރެއް ވަރަށް ކާމިޔާބުކަމާ އެކު ހިންގާފައިވެއެވެ. އާންމުންގެ ބޮޑު މަގުބޫލުކަމެއް ލިބުނު އެ މާރުކޭޓުގައި 'އެމްގެޕް' ސެޓިފިކެޓް ލިބިފައިވާ 10 ދަނޑެއްގެ ގޮވާން ވިއްކާފައިވާކަން ފާހަގަކޮށްލެވެއެވެ.