ހެންވޭރުގެ ގެއެއްގައި ވަގަށް އުފެއްދި 4000އަށް ވުރެ ގިނަ ސިނގިރެޓް ނައްތާލައިފި

ހެންވޭރުގެ ގެއެއްގައި ވަގަށް އުފެއްދި 4000އަށް ވުރެ ގިނަ ސިނގިރެޓް ކާޓަން ނައްތާލައިފިއެވެ.

އެ ތަކެއްޗަކީ ހެންވޭރު ގެއެއްގެ އެޕާޓްމަންޓުގައި ހިންގަމުންދިޔަ އޮފީހެއްގައި ގާނޫނާ ހިލާފަށް، ސިނގިރެޓް އުފެއްދުމަށް މެޝިން ބަހައްޓައިގެން ސިނގިރެޓް އުފައްދާކަމަށް ތުހުމަތުކުރެވޭ މައްސަލައާ ގުޅިގެން މިދިޔަ ޖެނުއަރީ މަހު ފުލުުހުން ހިންގި އޮޕަރޭޝަނެއްގައި އަތުލައިގަތް ތަކެއްޗެވެ.

ސިނގިރެޓް ކާޓަންތަކުގެ އިތުރުން 232 ފޮށި ސިނގިރެޓް އަދި 93.60 ކިލޯގެ ދުންފަތް ވެސް އެ އޮޕަރޭޝަންގައި އަތުލައުގަތެވެ. ފުލުހުން މިއަދު ބުނީ އެ ހުރިހާ ތަކެތި އިއްޔެ ނައްތާލައިފައިވާ ކަމަށެވެ.

މި ތަކެތި ނައްތާލީ ފުލުހުންގެ ބެލުމުގެދަށަށް ގެނެވޭ މިފަދަ ތަކެތި ނައްތާލުމުުގައި އަމަލުކުރާނެ އުސޫލުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެދަށުން ކަމަށް ވެސް ފުލުހުން ބުންޏެވެ.

ދުންފަތް ކޮންޓްރޯލް ކުރުމުގެ ގާނޫނަށް މި ސަރުކާރުން ގެނައި އިސްލާހުގެ ދަށުން ސިނގިރެޓްއާއި ދުންފަތުގެ ބާވަތްތައް ރާއްޖޭގައި އުފެއްދުމަކީ ގާނޫނީ ގޮތުން ކުށެކެވެ.