ޒަމާނީ ވަސީލަތްތަކާ އެކު މޯލްޑިވިއަން ސީޕްލޭން ޓަރމިނަލް ހުޅުވައިފި

ގިނަ ވަސީލަތްތަކަކާ އެކު ޒަމާނީ ފެންވަރަށް ތަރައްޤީކޮށްފައިވާ މޯލްޑިވިއަންގެ އާ ސީޕްލޭން ޓަރމިނަލް މިއަދު ހަވީރު ބޭއްވި ޚާއްޞަ ރަސްމިއްޔާތެއްގައި ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ރަސްމީކޮށް ހުޅުއްވައިދެއްވައިފިއެވެ.

މިދިޔަ އަހަރުގެ ތެރޭގައި މަރާމާތުގެ މަސައްކަތް ފެށި މި ޓަރމިނަލް އަލުން ފަރުމާކޮށްފައި ވަނީ އެތެރެއާއި ބޭރަށް ވެސް ފާހަގަކޮށްލެވޭ ފަދަ ބަދަލުތަކެއް ގެނެސްގެންނެވެ. އެގޮތުން، ފަސިންޖަރުންނަށް ޚިދުމަތްދޭ ލައުންޖުގެ ޖާގަ ކުރިއަށްވުރެ ދެގުނަ ތަނަވަސްކޮށްފައިވާއިރު، ބޯޑިންގ ގޭޓުތައް ވެސް ވަނީ އިތުރުކޮށްފައެވެ. އޭގެ އިތުރުން، ކުޑަކުދިން ކުޅޭނެ ޚާއްޞަ ސަރަޙައްދަކާއި، ދިވެހިވަންތަ ގޮތަކަށް ފަރުމާކޮށްފައިވާ ހިތްގައިމު އައުޓްޑޯ އޭރިއާއެއްގެ އިތުރުން، ހަނދާނީ ހަދިޔާއާއި ލުއިކާނާ ވިއްކާ ކިއޮސްކެއް ވެސް ވަނީ ޤާއިމުކޮށްފައެވެ. އަދި ކުންފުނީގެ މުވައްޒަފުންނަށް ޚާއްޞަކޮށްގެން އައު ކެންޓީނެއް ވެސް ވަނީ ހަދާފައެވެ.

މޯލްޑިވިއަންގެ އޮޕަރޭޝަންތައް އިތުރަށް ފުޅާކުރުމަށްޓަކައި އެންމެ ޒަމާނީ ފެންވަރުގެ 'ޓުވިން އޮޓަރ ކްލާސް 300ޖީ' މަރުކާގެ ދެ ބޯޓު ގަތުމަށް މިދިޔަ އޮގަސްޓު މަހު އޯޑަރުކޮށްފައިވާކަން އެ ކުންފުނިން ފާހަގަކުރެއެވެ. މި ދެ ބޯޓު އަންނަ އަހަރުގެ ތެރޭގައި ރާއްޖެ ގެނެސް ދަތުރުތަކުގައި ބޭނުންކުރަން ފެށޭނެކަމަށް އެ ފަރާތުން މަޢުލޫމާތުދެއެވެ.

ޤައުމީ އެއަރލައިން، މޯލްޑިވިއަނުން އެންމެ ފުރަތަމަ ސީޕްލޭންގެ ޚިދުމަތް ދޭން ފަށާފައި ވަނީ 2014ވަނަ އަހަރުގެ އޭޕްރީލް މަހުގައެވެ. އޭގެ ފަހުން 2015ވަނަ އަހަރު ރަސްމީ ޓަރމިނަލެއް ހުޅުވައިގެން ޚިދުމަތް ދެމުން އައިއިރު، އެންމެ ދެ ބޯޓާއެކު ފެށި މި މަސައްކަތް ފުޅާވެ، މިހާރު އެ ކުންފުނީގެ ފްލީޓުގައި 11 ސީޕްލޭން އޮވެއެވެ.