މަގު ކޮނުމުގެ ތެރޭގައި ސްޓެލްކޯގެ ކޭބަލްއެއް ބުރިވިއްޖެނަމަ އިހުމާލުވި ފަރާތުގެ އަތުން ހަރަދު ނަގަނީ

މަގު ކޮނުމުގެ ތެރޭގައި ސްޓެލްކޯގެ ކޭބަލްއެއް ބުރިވިއްޖެނަމަ އިހުމާލުވި ފަރާތުގެ އަތުން ހަރަދު ނަގަން ސްޓެލްކޯއިން ނިންމައިފި އެވެ.

ސްޓެލްކޯއިން މިއަދު ބުނީ އެ ކުންފުނީގެ ކަރަންޓު ވިއުގައިގައި ހިމެނޭ ކޭބަލްތަކަށް، މަގު ކޮނުމުގެ އެކި މަސައްކަތްތަކުގެ ތެރެއިން ގެއްލުންވެ، ކަރަންޓުގެ ހިދުމަތް މެދުކެނޑުމުގެ ސަބަބުން ރައްޔިތުންނަށް އެތަކެއް ތަކުލީފުތަކަކާއި ދަތިތަކަކާ ކުރިމަތިވަމުންދާ ކަމަށެވެ.

އަދި އެފަދަ ހާދިސާތައް ދުވަހެއް ދުވަހަކަށް އިތުރުވަމުންދާތީ، މަގު ކޮނުމުގެ މަސައްކަތްތައް ކުރިއަށްގެންދާ ފަރާތްތަކުގެ އިހުމާލުން މިފަދަ ކަމެއް ދިމާވެއްޖެ ހާލަތެއްގައި، އެ ފަރާތެއް ޒިންމާދާރު ކުރުވައި، އެ މައްސަލަ ހައްލުކޮށް އަލުން ހިދުމަތްދޭން ހިނގާ ހަރަދު އެ ފަރާތުން ނެގުމަށް ސްޓެލްކޯއިން ނިންމާފައިވާ ކަމަށް ވެސް އެ ކުންފުނިން ބުންޏެވެ.

"މި ނިންމުމަކީ ކަރަންޓުގެ ހިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށް، ހިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަގުސަދުގައި ނިންމާފައިވާ ނިންމުމެއް." ސްޓެލްކޯއިން ބުންޏެވެ.

އެހެންކަމުން، މަގު ކޮނުމުގެ އެންމެހާ މަސައްކަތްތައް ކުރިއަށްގެންދަވާ ހުރިހާ ފަރާތްތަކުންވެސް އެ ކުންފުނީގެ ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް ރާވައި ކުރިއަށްގެންދިއުމަށް އެ ކުންފުނިން ވަނީ އިލްތިމާސްކޮށްފަ އެވެ.