ދިވެހިންގެ އުފެއްދުންތެރިކަމަށް މަޢުރަޒު 2026 ރަސްމީކޮށް އިފްތިތާހްކޮށްފި
"ދިވެހިންގެ އުފެއްދުންތެރިކަމުގެ މަޢުރަޒު 2026"، ހުޅުމާލޭގައި ބޭއްވި ކުލަގަދަ ހަރަކާތަކާ އެކު ރަސްމީކޮށް އިފްތިތާޙުކޮށްފިއެވެ.
އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއާއި ބިޒްނަސް ސެންޓަރ ކޯޕަރޭޝަން (ބީސީސީ) ގުޅިގެން، ދިވެހި އުފެއްދުންތެރިންނަށް ފަހި ފުރުޞަތުތަކެއް ހޯދައިދިނުމުގެ މަޤުޞަދުގައި މި އޮކްޓޯބަރު މަހުގެ 25އިން ފެށިގެން ނޮވެމްބަރު މަހުގެ 2ވަނަ ދުވަހުގެ ނިޔަލަށް ހުޅުމާލެ ސެންޓްރަލް ޕާކުގައި ކުރިއަށްގެންދާ މި ބޮޑު އެކްސްޕޯގައި، އެއްހާހަށްވުރެ ގިނަ އުފެއްދުންތެރިންގެ ފަރާތުން ހަހާހަށްވުރެ ގިނަ ދިވެހި އުފެއްދުން ވާދަކުރާނެއެވެ. މިއީ 16 ދާއިރާއަކުން 73 ގިންތިއެއް ހިމެނޭގޮތަށް، ރާއްޖޭގެ އުފެއްދުންތަކާއި ޚިދުމަތްތައް އެއްފުރާޅެއްގެ ދަށުން އާންމުންނަށް ދައްކާލުމަށް ފަރުމާކޮށްފައިވާ މުހިންމު ހަރަކާތެކެވެ.
މިއަހަރުގެ މަޢުރަޒު އިފްތިތާޙުކުރުމަށްޓަކައި ހުޅުމާލެ ފޭސް އެކެއްގެ އަތިރިމަތީގައި "ރެޑީ ސެޓް މަޢުރަޒު 26"ގެ ނަމުގައި ވަނީ ޚާއްޞަ ފެސްޓިވަލެއް ބާއްވާފައެވެ. ހަވީރު 4:00އިން ރޭގަނޑު 11:00އަށް ކުރިއަށްދިޔަ މި ހަރަކާތުގައި، އާއިލާތަކަށާއި ކުޑަކުދިންނަށް އަމާޒުކޮށްގެން މޫދު ކުޅިވަރުތަކާއި ބައުންސީ ކާސަލްގެ އިތުރުން، ލައިވް މިއުޒިކާއި ބޮޑުބެރުގެ ފޯރިގަދަ ހަރަކާތްތައް ކުރިއަށް ގެންގޮސްފައިވެއެވެ. ހަމައެއާ އެކު، އެކްސްޕޯގެ މަންޒަރުތައް އާންމުންނަށް ދައްކުވައިދޭ ޚާއްޞަ ވީޑިއޯއެއް ވެސް މި ހަފުލާގައި ވަނީ ދައްކާލާފައެވެ.
މި ހަފުލާގެ ތެރެއިން އެކްސްޕޯގެ ޕާޓްނަރުންނާއި ސްޕޮންސަރުންނާ އެކު އެއްބަސްވުންތަކުގައި ސޮއިކޮށްފައިވާއިރު، މަޢުރަޒުގެ ތެރެއިން ބޭއްވުމަށް ހަމަޖެހިފައިވާ މުބާރާތްތަކުގައި ވާދަކުރާ ޓީމުތައް ވެސް ވަނީ އިއުލާނުކޮށްފައެވެ. އޭގެ ތެރޭގައި ސަގާފީ ވާދަ މުބާރާތުގައި ވާދަކުރާ އެވޭލާ ބައި އިންކްލިކްސް، އެކްސްޓްރީމް ލެވެލް، ހިޔަލަ، ޕަރޕަލް ވިންގްސް، މާބައިދޫ ކައުންސިލް، ބ. ހިތާދޫ ޔޫތު ވިންގް ޖަމްޢިއްޔާ، އޮމަލަ، ޓީމް މަލަކާ އަދި އެމް.އެން.ޔޫ ޑާންސް ގްރޫޕް ހިމެނެއެވެ.
މީގެ އިތުރުން، ބޮޑުބެރު މުބާރާތުގައި އެކަތި ބޮޑުބެރު، ސާދަ ތިރީސް އަށެއް، އެންދެރި ބޮޑުބެރު ގްރޫޕް، ރިދަމް ބޮޑުބެރު، ހޭވައްލާ ބޮޑުބެރު، ހޭވާލި ބޮޑުބެރު، މަންނަ ބޮޑުބެރު، ޗާލޭ ބޮޑުބެރު، އެމް.އެން.ޔޫ ބޮޑުބެރު އަދި މަންނަޔަންސް ބޮޑުބެރު ވާދަކުރާނެކަން ވަނީ ހާމަކޮށްފައެވެ. އަދި މަޢުރަޒުގައި ތަފާތު ކުޅިވަރު މުބާރާތްތައް ކުރިއަށްގެންދިއުމަށް ރާއްޖޭގެ ނެޓްބޯލް އެސޯސިއޭޝަން، ކެރަމް އެސޯސިއޭޝަން، ބާސްކެޓްބޯލް އެސޯސިއޭޝަން، ބެޑްމިންޓަން އެސޯސިއޭޝަން އަދި ބަށިބޯޅަ އެސޯސިއޭޝަނުން ބައިވެރިވާކަން ވެސް ވަނީ އިއުލާނުކޮށްފައެވެ.
