ގްލޯބަލް ދުކާނަށް ރުފިޔާއިން ފައިސާ ދެއްކޭނެ ޚިދުމަތް ޕޯސްޓުން ތަޢާރަފުކޮށްފި
މޯލްޑިވްސް ޕޯސްޓާއި އިންޑިއާ ޕޯސްޓް ގުޅިގެން ރާއްޖެއަށް ފޯރުކޮށްދޭ އީ-ކޮމާސް ޕްލެޓްފޯމް "ގްލޯބަލް ދުކާން"އިން ތަކެތި ގަންނަ ދިވެހި ކަސްޓަމަރުންނަށް، ބޭރު ފައިސާގެ ބަދަލުގައި ދިވެހި ރުފިޔާއިން ފަސޭހަކަމާ އެކު ފައިސާ ދެއްކޭނެ އައު ނިޒާމެއް މޯލްޑިވްސް ޕޯސްޓުން ތަޢާރަފުކޮށްފިއެވެ.
ޕޯސްޓް އޮފީހުން މަޢުލޫމާތު ދިން ގޮތުގައި، މި ޚިދުމަތް ބޭނުންކުރުމަށްޓަކައި އެޕްލިކޭޝަން މެދުވެރިކޮށް ޗެކްއައުޓް ކުރާއިރު "ޕޭ ތުރޫ މޯލްޑިވްސް ޕޯސްޓް" ޚިޔާރުކުރަން ޖެހޭނެއެވެ. އެއަށްފަހު، އެޕްލިކޭޝަނުން ދޭ އިރުޝާދުތަކާ އެއްގޮތަށް ކުރިއަށް ދިއުމުން، ޝަރުތު ފުރިހަމަވާ ފަރާތްތަކަށް ރުފިޔާއިން މުޢާމަލާތް ނިންމާލުމަށް ޚާއްޞަ ޕޭމަންޓް ލިންކެއް ލިބިގެންދާނެ ކަމަށް އެ ކުންފުނިން ބަޔާންކުރެއެވެ.
މިއީ ބައިނަލްއަޤުވާމީ ކާޑުތައް ބޭނުންކޮށްގެން ޑޮލަރުން ފައިސާ ކެނޑޭގޮތަށް އޮންނަ އޮތުމަށް ނިމުމެއް ގެނެސް، އޮންލައިން ވިޔަފާރީގެ ދާއިރާއިން ދިވެހިންނަށް ލިބިގެންދިޔަ ވަރަށް ބޮޑު ލުއިފަސޭހައެކެވެ. މީގެ އިތުރުން، އިންޑިއާގެ އެޑްރެހެއް ނެތިވެސް، ގްލޯބަލް ދުކާން މެދުވެރިކޮށް ގަންނަ މުދާ ރާއްޖޭގެ ކޮންމެ ރަށަކަށް ވެސް ޑެލިވަރީ ކޮށްދިނުމުގެ ޚިދުމަތް ކުރިއެކޭ އެއްގޮތަށް ލިބެމުންދާނެކަން ޕޯސްޓުން ކަށަވަރުކޮށްދެއެވެ.
ދިވެހިންގެ މެދުގައި ބޮޑު މަޤުބޫލުކަމެއް ހޯދާފައިވާ ގްލޯބަލް ދުކާނަކީ އިންޑިއާގެ ބޮޑެތި އީ-ކޮމާސް ވެބްސައިޓްތަކުން މުދާ ގަނެވޭނެހެން ފަރުމާކޮށްފައިވާ މަންސައެކެވެ. އޭގެ ތެރޭގައި އެމެޒޯން، ފްލިޕްކާޓް، މިންތުރާ، އައިކިއާ އަދި ނައިކާ ފަދަ ނަންމަޝްހޫރު ޕްލެޓްފޯމްތައް ހިމެނޭއިރު، ރުފިޔާއިން ޕޭމަންޓް ހެދޭނެ މަގު ފަހިވުމާއެކު، ބައިނަލްއަޤުވާމީ ބާޒާރުތަކަށް ދިވެހިންނަށް އޮތް ފުރުޞަތުތައް އިތުރަށް ފުޅާވެގެންދާނެކަމަށް ޕޯސްޓް އޮފީހުން ދެކެއެވެ.
