އެމް.ޑަބްލިޔު.އެސް.ސީއިން ލޭ ހަދިޔާ ކުރުމުގެ ހަރަކާތެއް ހިންގައިފި
މޯލްޑިވްސް ބްލަޑް ސަރވިސް އާއި އެމް.ޑަބްލިޔު.އެސް.ސީ ގުޅިގެން އެކުންފުނީގެ މުވައްޒަފުންގެ ފަރާތުން ލޭ ހަދިޔާ ކުރުމުގެ ހަރަކާތެއް މިއަދު ބާއްވައިފިއެވެ.
އެމްޑަބްލިޔުއެސްސީން ވިދާޅުވީ މިހަރަކާތުގެ އެންމެ މުހިއްމު މަޤްސަދަކީ ތެލެސީމިއާ ޕޭޝަންޓުންނަށް އިޚުލާސްތެރި ޚިދުމަތެއް ކޮށްދެއްވާ ފަރާތެއް ކަމަށްވާ މޯލްޑިވްސް ބްލަޑް ސަރވިސްއަށް، ކޮވިޑް 19 ގެ މި ޙާލަތުގައި ދިމާވެފައިވާ ލޭގެ ދަތިކަމުގެ ޙާލަތައް އެހީތެރިކަން ފޯރުވައި، ބޭނުންވާ ލޭގެ އެހީ، އެމް.ޑަބްލިޔު.އެސ.ސީގެ މުވައްޒަފުންގެ ފަރާތުން ފޯރު ކޮށްދިނުން ކަމަށެވެ.
އަދި މި ހަރަކާތަކީ އެ ކުންފުނީގައި މަސައްކަތްކުރާ މުވައްޒަފުންނަށް ލޭ ހަދިޔާ ކުރުމުގެ މުހިއްމުކަން އަންގައިދިނުމާއި އެކަމަށް މުވައްޒަފުން ހޭލުންތެެރި ކުރުވުމާއި އަދި ހަމަ އެހެންމެ، ކުންފުނީގެ މުވައްޒަފުން ބުރަކޮށް އުޅުއްވަމުން ވެސް، ފަސޭހަ މާހައުލެއްގައި މިފަދަ އިޖުތިމާޢީ އަދި ބޭނުންތެރި ހަރަކާތެއްގައި ބައިވެރިވެ، ލޭ ހަދިޔާ ކުރުމުގެ ފުރުސަތު ތަނަވަސްކޮށްދިނުމުގެ ގޮތުން ބޭއްވުނު ހަރަކާތެއް ކަމަށް ވެސް އެމް.ޑަބްލިޔު.އެސް.ސީން ވިދާޅުވިއެވެ.
ކުންފުނީގެ ކަސްޓަމަރ ސާރވިސް އިމާރާތުގައި ކުރިއަށް ގެންދިޔަ މިހަރަކާތުގައި އެމް.ޑަބްލިޔު.އެސް.ސީ ގެ ގިނަ އަދަދެއްގެ މުވައްޒަފުން ވަނީ ބައިވެރިވެފައެވެ
