ތިބާގެ ފޯނަކީ ތިބާއާ ތިބާގެ ދަރީންނާ ދުރުކުރާ އެއްޗެއް ކަމުގައި ނުހަދާށެވެ.
ޒަމާން ބަދަލު ވެެއްޖެއެެވެ. ޒަމާނީ ޓެކްނޮލޮޖީ ތަރައްގީވެ، ހުރިހާ ކަމެއް ބަދަލު ވެއްޖެއެވެ. މީގެ ކުރިން ނުކުރާ އެތައް ކަމެއް މިއަދު އާންމު ވެއްޖެއެވެ. މިއަދު އަޅުގަނޑުމެން ކޮންމެ މީހެއްގެ އަތުގައިވެސް މޮޅު ސްމާރޓް ފޯނެއް އޮވެއެވެ. އެންމެ ފަހުގެ މޮޅު ފޯނެއް އަތުގައި ނެތިއްޔާ އެމީހަކީ ދަށް މީހެއް ކަމުގައި ދެކެއެވެ. އެތަކެއް ވަގުތުތަކެއް އަޅުގަނޑުމެންގެ ތެރެއިން ގިނަ ބަޔަކު ހޭދަކޮށްލަނީ ފޯނާ ކުޅުމުގައެވެ. ހުސްވަގުތެއް ލިބިއްޖެ ނަމަވެސް ބަލަނީ ފޯނުން ކޮންމެވެސް ކަމެއް ކޮށްލައިގެން މުނިފޫހި ފިލުވޭތޯއެވެ.
މިއަދު އަޅުގަނޑުމެންނަށް ބައެއް މައިންބަފައިންގެ ކިބައިންވެސް ފާހަގަވާ އެއް ކަމެއް އެބައޮތެވެ. ދަރީންނާއެކު ވަގުތު ހޭދަކުރާ އިރުގައިވެސް އެ ފޯނުން އަތް ދޫނުކޮށްލުމެވެ. އަބަދާއި އަބަދުމެ ފޯނު ހިފައިގެން ހުރުމެވެ. މިއީ ހުރިހާ މައިންބަފައިން ކަންތައް ކުރާ ގޮތެއް ނޫނެވެ. ނަމަވެސް ވަަރަށް ގިނައިން މިފަދަ މަންޒަރުތައް ފެނެއެވެ.
ދަރިފުޅު ކައިރީގައި ބައިންދައިގެން ފޯނުން ގޭމު ކުޅެން ނުވަތަ މީސްމީޑިއާގެ ކޮންމެވެސް މަންސައެއްގެ ތެރޭގައި އުޅެނީ ކިތައް މައިންބަފައިންތޯ މިއަދު އަޅުގަނޑުމެން ބަލާލަން އެބަ ޖެހެއެވެ. ދުވަހުގެ ބިޒީ ޝެޑިއުލް އިން ދަރިފުޅަށް ދޭން ގިނަ މީހުންނަށް ލިބެނީ ވަރަށް މަދު ވަގުތު ކޮޅެކެވެ. ހާއްސަކޮށް ފިރިހެނުންނެވެ. އެ ވަގުތު ކޮޅުގަައިވެސް ދަރިފުޅު ކައިރީގައި ގޮސް ފޯނާ ކުޅެން އިނީމާ އެ ދަރިފުޅު ވާނެ ދެރައާ ދޭތެރޭ ވިސްނާލަން ހެއްޔެވެ. ތިބާ ފޯނާ ކުޅެން ނީންނަ ނަމަ ދެެން އިންނާނީ ދަރިފުޅުގެ އަތަށް ފޯނު ދީގެންނެވެ.
އަޚާއެވެ. ތިއީ އެންމެ ރަނގަޅު ގޮތަށް ނުވުމަކީ އެކަށީގެންވާ ކަމެކެވެ. ދަރިފުޅު އަތަށް ފޯނު ދޭން ވެސް ވާނެއެވެ. ނަމަވެސް ދަރިފުޅާއެކު ހޭދަކުރާ ކޮންމެ ވަގުތަކީ ފޯނާއެކު ހޭދަކުރާ ވަގުތަކަށް ނުހަދާށެވެ. އެ ދަރިފުޅަށް ތިބާގެ އަޅާލުމާއި ލޯބިވެސް ދޭށެވެ. އެ ދަރިފުޅަށް ސަމާލުކަން ނުދީ އެ ދަރިފުޅުގެ ބައްޕަ އަބަދާއި އަބަދު ފޯނަށް ގެއްލިފައި އިންނަ ނަމަ އެ ދަރިފުޅަށް ވެސް ފުން އަސަރު ތަކެއް ކުރުވާނެއެވެ. އަދި އަބަދު ފޯނާ ކުޅެން އިނުމަކީ ރަނގަޅު ކަމެއް ކަމުގައި ދެކި ތިބާގެ ފަރާތުން އެ ދަރިފުޅު ތިބާ ނަމޫނާ އަކަށް ބަލައިފާނެއެވެ.
ދަރީންނަކީ ﷲ ސުބްހާނަހޫ ވަތައާލާ ތިބާއަށް ދެއްވާފައިވާ އަމާނާތެއްކަން ތިބާ ހަނދާން ނައްތާ ނުލާށެވެ. މާދަމާ މަހްޝަރުގެ މައިދާނުގައި އެ ދަރިން ތަރުބިއްޔަތު ކުރި ގޮތާއި މެދު ތިބާއާ ސުވާލު ކުރެވޭނެއެވެ. އެ ސުވާލުތަކަށް ތިބާ ﷲގެ ހަޒްރަތުގައި ޖަވާބުދާރީ ވާން ޖެހޭނެއެވެ. އެ ދަރިފުޅު ރަނގަޅަށް ތަރުބިއްޔަތު ކުރުމަށްޓަކައި ދަރިފުޅާ ދޭތެރޭ ތިބާ ރަނގަޅު ގުޅުމެއް ބިނާ ކުރަން ޖެހެއެވެ. އެހެން ކަމުން ތިބާގެ ފޯނަކީ ތިބާގެ ދަރިފުޅާ ތިބާ ދުރުކުރާ އެއްޗަކަށް ނުހަދާށެވެ. އެކަމުގެ ސަބަބުން ތިބާގެ ދަރިފުޅާ ތިބާއާ ދެމެދު އޮންނަ ގުޅުން ހީނަރުވެ، އެ ދަރިފުޅުގެ ކިބައިގައި ނުރަނގަޅު އާދަތައް އަށަގަތުމަށް މަގުފަހިވެއެވެ.
