ހާފިޒް އަބްދުއްރަޝީދު މުހައްމަދުގެ އަޑުން ރާއްޖޭގައި މުޅިން އަލަށް ކީރިތި ޤުރުއާން އެއްކޮށް ރެކޯޑް ކޮށްގެން ނެރެނީ

ދިވެއްސެއްގެ އަޑުން ކީރިތި ގުރުއާން އެއްކޮށް ރެކޯޑް ކޮށްގެން ނެރުމުގެ މަސައްކަތް ލޯފަން ކުދިންގެ ޖަމިއްޔާ ބްލައިންޑް އެންޑް ވިޝުއަލީ އިމްޕައާޑް ސޮސައިޓޯ އޮފް މޯލްޑިވްސްއިން ފަށައިފިއެވެ.

Ads by Hajj Corporation

"ދެން" އަށް މަޢުލޫމާތު ދެމުން ލޯފަން ކުދިންގެ ޖަމިއްޔާގެ މީޑިއާ ކޯޑިނޭޓަރު އަބްދުﷲ ޒިޔާއު ވިދާޅުވީ މިހާރު ޤުރުއާން ކިޔެވުމުގެ ރެކޯޑިންގް ފެށިގެން ކުރިޔަށްދާ ކަމަށެވެ.

ރެކޯޑް ކުރުމުގެ މަސައްކަތް ކުރިޔަށް ގެންދަނީ ކުރާނީ ސޮބާ ސްޑޫޓިއޯއިންނެވެ. ޒިޔާއު ވިދާޅުވީ މި މަސައްކަތް ކުރިޔަށް ގެންދިޔުމަށް ވަރަށް ގިނަ ސްޓޫޑިއޯތައް ބަލާފައި ވާނެކަމަށެވެ. އެގޮތުން ސޮބާ ސްޓޫޑިއޯ ހަމަޖަައްސާފައި ވަނީ އެންމެ ރަނގަޅަށް މި މަސައްކަތް ކުރެވޭނެ ކަމަށް ބެލެވެނީ އެ ސްޓޫޑިއޯއިން ކަމަށް ވާތީއެވެ.

އެ ޖަމިއްޔާއިން ފެށި މަސައްކަތުގައި ގުރުއާން ކިޔަވާ ވިދާޅު ވަނީ އަލްޚާފިޒް އަބްދުއްރަޝީދު މުހައްމަދެވެ. އޭނާ އަކީ 2014 ވަނަ އަހަރު ބޭއްވި ދިވެހިރާއްޖޭގެ އެންމެ އަލިގަދަ ތަރި ސިލްސިލާގެ ފުރަތަަމަ ޗެންޕިއަނެވެ.

ޒިޔާއު ވިދާޅުވީ ޖަމިއްޔާގެ ގިނަ ޙާފިޒުންނާއި ކުދިން ގުރުއާން ދަސް ކުރަނީ އަޑު އަހައިގެން ކަމަށެވެ. މި ގޮތަށް ދަސްކުރަމުން ދާއިރު ބޭރުގެ ކޮޕީ ތަކަކީ އެހާ ސާފު ކޮޕީތަކަށް ނުވުމާއި، އަކުރު ސާފު ނޫން ކަމަށެވެ.

"މިހާރު އަސްލު ވާގޮތަކީ ޖަމިއްޔާގެ ވަރަށް ގިނަ ހާފިޒުންނާއި ދަސްކުރަން މަސައްކަތް ކުރާ ކުދިން ތިބޭ. މި ހުރިހާ ކުދިން ވެސް ހަމަ އަޑު އަހައިގެން ދަސް ކުރަން ޖެހެނީ. ބަލައިގެން ނުކިޔެވޭނެތީ. ދެން އަޑު އަހއިގެން ދަސް ކުރަން ބަލާއިރު ބޭރުގަ މި ހުންނަ އެކި އެކި ކިޔެވުންތައް އެހާ ސާފު ކޮޕީ ތަކެއް ނޫން ލިބެން ހުންނަނީ. ތަރާވީސް ނަމާދުތަކުގަ ކިޔަވާފަ ހުންނަ ކިޔެވުންތައް ވީމަ އަކުރު ބައެއް ކިޔެވުން ތަކުގަ ސާފެއް ނޫން. ޤުރުއާން ވީމަ ވަރަށް ބޮޑަށް އަކުރު ސާފު ވާން ޖެހޭނެ" ޒިޔާއު ވިދާޅުވިއެވެ.

މި މަސައްކަތަކީ ސާފު، ކޮލިޓީ ރިކޯޑިންއެއް ގެނައުމަށް ކުރެވިގެންދާ މަސައްކަތެކެވެ. ރާއްޖޭގައި ޤުރުއާނުގެ ފުލް އޯޑިއޯއެއް ގެނައުމުގެ މަސައްކަތް ކުރި ނަމަވެސް އެކި ސަބަބު ތަކާއި ގުޅިގެން އަދި އެކަން ކާމިޔާބު ވާގޮތް ވެފައެއް ނުވެއެވެ.

މި ފެށޭ އަހަރު ކުރީ ކޮޅު ގުރުއާން އެއްކޮށް ރެކޯޑް ކޮށް ނިންމުމުގެ މަސައްކަތް ދަނީ ކުރަމުންނެވެ. އެހެން ނަމަވެސް އަޑާ ގުޅުން ހުރި ކަމަކަށް ވުމުން އެކި ކަންތައްތަކާ ދިމާވާނެ ކަމަށާއި ރެކޯޑިންގް ދޫކޮށްލެވޭނެ ވަކި ތާރީހެއް ކަނޑައެޅިފައި ނުވާ ކަމަށް ޒިޔާއު ވިދާޅުވިއެވެ.

" އަޑާ ގުޅުން ހުރި ކަމެއް ވީމަ ކިތަންމެ ލިޔެގެން ޕްލޭން ކޮށްގެން ކުރިޔަސް، ރެކޯޑިންތައް ހަމަ ޑިލޭ ވުމަކީ އެކަށީގެން ވާ ކަމެއް. ދުވާލަކު ހަތަރު ވަރަކަށް ގަޑިއިރު ކިޔަވަން ޓާރގެޓް ކުރަން ޖެހޭ. އެވަރަށް ކިޔަވަން ބަލާއިރު އަޑަށް ކަމެއް ދިމާވެގެން އަޑު ސަކަރާތް ވެގެން ޑިލޭ ވެސް ވެދާނެ" ޒިޔާއު ވިދާޅުވިއެވެ.

އިތުރަށް ޒިޔާއު ފާހަގަ ކުރެއްވީ މި ރިކޯޑިންގައި ވަކިވަކި ސޮފްހާ ތަކުން ކިޔަވަން ބޭނުންވާ ފަރާތްތަކަށް އެ ފުރުސަތުވެސް ހުޅުވާލެވިފައި ވާނެކަމަށެވެ.

މި ރެކޯޑިން ، ފޯރުކޮށްދެވެން ހުރި ހުރިހާ ޕްލެޓްފޯމްތަކުން އަޑު އިވިގެން ދާނެއެވެ. އެއްވެސް ހިފެހެއްޓުމެއް ނެތި ދޫކޮށްލެވެން ހުރި ހުރިހާ ޕްލެޓްފޯމްތަކަށް މި ރިކޯޑިން ނިމުމާއެކު ފޯރު ކޮށްދޭނެ ކަމަށް ޒިޔާއު ހާމަ ކުރެއްވިއެވެ.