"ރާއްޖެކޮޅަށް 17 ގޯލް ޖެހީ އޭރު އޮތް ސަރުކާރުގެ އަމިއްލަ އެދުން ބޮޑު ކަމުން"
1998 ވަނަ އަހަރުގެ ވޯލްޑްކަޕް ކޮލިފިކޭޝަންގައި ރާއްޖެކޮޅަށް އިރާނުން 17 ގޯލް ޖެހި މެޗާ ގުޅޭ ގޮތުން އޭރު ދިވެހި ޓީމުގައި ހިމެނޭ ޑިފެންޑަރު އަދި މިހާރުގެ މަޖިލިސް މެމްބަރު ދޮންބިލެތް އަހުމަދު ޙަލީމް ވާހަކަ ދައްކަވައިފިއެވެ.
ކުޅިވަރުގެ ގާނޫނަށް ހެންވޭރު ހުޅަނގު ދާއިރާގެ މެމްބަރު ޙަސަން ލަތީފް ހުށަހެޅުއްވި އިސްލާހުތަކަށް ވާހަކަ ދައްކަވަމުން ދޮންބިލެތް ބުނީ އޭރު ފީފާގައި ރާއްޖެއިން ބައިވެރިވެފައި އޮތީ ފީފާގެ މެމްބަރަކަށް ވެފައި އޮތުމުން ލިބޭ ދެމިލިއަނެއްހާ ޑޮލަރު ހޯދުމުގެ މަގުސަދުގައި ކަމަށާއި އެ ފައިސާކޮޅު ވަންނަނީ ރިޔާސީ ގަނޑުވަރުގެ ބަޖެޓަށް ކަމަށެވެ. އަދި ފީފާގައި ބައިވެރިވެފައި އޮތުމާއެކު ކޮލިފިކޭޝަން ކުޅެން ޖެހޭ ކަމަށާއި އެެހެންވެ ކޮލިފިކޭޝަނަށް ނަމެއްގައި ފޮނުވާލީ ކަމަށް ދޮންބިލެތް ފާހަގަކުރިއެވެ. އަދި އެ ފެންވަރުގައި ކުޅެފައިވާ އެއްވެސް ކުޅުންތެރިއެއް އޭރު ނެތްކަން ދޮންބިލެތް ފާހަގަ ކުރިއެވެ.
"މީގެ ކުރިން އަޅުގަނޑުމެން (ޓީމުތައް) ފޮނުވަނީ ރަމްޒީ ގޮތުން ، އެއީ ފީފާ ކަހަލަ ތަނެއްގައި ބައިވެރިވެފައި އޮތިއްޔާ ، މުބާރާތެއްގައި ކުޅޭ ކަމަށް ވަންޏާ އަޅުގަނޑުމެންނަށް ދެމިލިއަނެއްހާ ޑޮލަރު ރާއްޖޭގެ ފުޓްބޯޅަ ތަރައްގީއަށް އެބަލިބޭ ، އެ ދެމިލިއަން ޑޮލަރު ވަދެގެން ދަނީ ތީމުގޭ ބަޖެޓަކަށް ، އޭގެ ވަރަށް ބޮޑު ބޮނޑިއެއް ވެސް އަޅުގަނޑުމެންނަށް ލިބިގެން ހިނގައްޖެ ، ފީފާގައި ބައިވެރިފައި އޮތިއްޔާ ވަކި މުއްދަތެއްގެ ތެރޭގައި ވޯލްޑްކަޕް ކޮލިފައިން ކުޅެން ޖެހޭ ، ދެން ކުއްލިއަކަށް ކޮލިފައިންއަށް ހަފްތާއެއްހާ ދުވަސް ކައިރިވެފައި އޮއްވާ ސަރުކާރަށް ވެސް އެނގުނީ އެއީ ކުރަން ޖެހޭ ކަމެއް ކަމަށް ، ޖެހިގެން އަޅުގަނޑުމެން މުބާރާތެއްގައި ބައިވެރިކޮށްފި ، އެއްވެސް ތަޖުރިބާއެއް ވެސް ނެތް ، އެހެން ނަމަވެސް އަޅުގަނޑުމެން ފޮނުވީ އެންމެ މަގުސަދެއްގައި ، ބައިވެރި ނުވެއްޖިއްޔާ ފީފާއިން ދޭ ދެމިލިއަން ޑޮލަރު ގެއްލޭނެތީ ބައިވެރިކުރީ ، ނަތީޖާއަކަށް ވެގެން ދިޔައީ ރާއްޖެ ކޮޅަށް 17 ގޯލް ޖެހިގެން ދިޔައީ" ދޮންބިލެތް ވިދާޅުވިއެވެ.
17 ގޯލްއޭ ވިދާޅުވުމުން ދޮންބިލެތްގެ ވާހަކަ ހުއްޓުވާ ރައީސް ނަޝީދު ވަނީ "ކިތައް ގޯލޭތޯ؟'' ސުވާލު ކުރައްވާފައެވެ.
ރާއްޖެކޮޅަށް 17 ގޯލް ޖެހި މެޗާއެކު ބައިކޮޅަށް އެންމެ ގިނަ ގޯލް ވަތް ވޯލްޑްކަޕް ކޮލިފިކޭޝަން މެޗުގެ ގޮތުގައި ރާއްޖެއަށް ލިބުނު ހުތުރު ރެކޯޑާއެކު މުޅި ދުނިޔޭގެ ނޫސްތަކުގައި ރާއްޖެއަށް މަލާމާތާއި ފުރައްސާރަ ރައްދުކުރިއެވެ. އަދި 2008 ވަނަ އަހަރުގެ ސާފް ޗެމްޕިއަންޝިޕް ރާއްޖެއަށް ކާމިޔާބު ކުރެވެން ދެން ރާއްޖެ ބެލެވެމުން އައީ ވަރަށް ދަށް ޓީމެއްގެ ގޮތުގައެވެ. ވޯލްޑްކަޕް ކޮލިފިކޭޝަންގައި ބައިކޮޅަށް އެންމެ ގިނަ ގޯލް ވަތް މެޗުގެ ގޮތުގައި މިހާރު ރެކޯޑް ކޮށްފައި ވަނީ އޮސްޓްރޭލިއާ އާއި އެމެރިކަން ސަމޯއާ ބައްދަލު ކުރި މެޗެވެ. 2002 ވަނަ އަހަރުގެ ވޯލްޑްކަޕް ކޮލިފިކޭޝަންގެ މި މެޗުގައި އޮސްޓްރޭލިއާއިން ވަނީ 31 ގޯލް ޖަހާފައެވެ.
