ރައީސް ޔާމީން ގޭގައި އޮންނަވައިފިނަމަ މިވެރިކަމަށް ލޮޅުން އަރާނެ: ޙަސަން މުފީދު
މަނީ ލޯންޑަރިންގެ މައްސަލައެއްގައި ފަސް އަހަރު ދުވަހުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ގޭގައި އޮންނަވައިފިނަމަ ނުވަތަ އެމަނިކުފާނުގެ ސްޕީޗެއް ލައިވް ކޮށްލި ކަމުގައި ވިޔަސް ވެރިކަމާއި ވެރިކަމުގެ މަތިފަޑިއަށް ލޮޅުން އަރައިގެން ދާނެކަމަށް ރައްޔިތުންގެ މަޖިލީހުގެ މިލަންދޫ ދާއިރާގެ ކުރީގެ މެމްބަރު ހަސަން މުފީދު ވިދާޅުވެއްޖެއެވެ.
ރައީސް ޔާމީން ޖަލުގައި އޮންނަވާ މައްސަލަ އާއި، އެމަނިކުފާނުގެ އިސްތިއުނާފުގެ އަޑުއެހުންތައް ލަސްވާ މައްސަލާގައި ކަންބޮޑުވުން ފާޅުކުރައްވައި ޗެނަލް-13 ގެ ޕްރޮގްރާމެއްގައި ވާހަކަފުޅު ދައްކަވަމުން މުފީދު ވިދާޅުވީ ރައީސް ޔާމީންގެ މައްޗަށް ކޮށްފައިވާ ހުކުމަކީ އެއްވެސް އަސާސެއް ނެތް ކަންތައްތަކެއްގެ މައްޗަށް ބިނާކޮށްގެން ކޮށްފައިވާ ސިޔާސީ ހުކުމެއްކަން މިއަދު ދިވެހި ރައްޔިތުން ގަބޫލު ކޮށްފިކަމަށެވެ.
މުފީދު ވިދާޅުވީ ސަރުކާރުގެ މަތިފަޑީގެ އެންމެން ގުޅިގެން ކުރައްވާ މަސައްކަތަކީ، މިއަދު ރާއްޖޭގައި އޮތް ހަމައެކަނި އިދިކޮޅު ސިޔާސީ ޕާޓީގެ ލީޑަރު ހައްޔަރު ކޮށްގެން، ސިޔާސީ ދައުވާއެއް ކޮށްގެން އެމަނިކުފާނުގެ މައްޗަށް ހަސަދަ ފިލުވުން ކަމަށެވެ.
"އަޅުގަނޑު ދަންނަވާނީ ހަމަ ތުރުތުރު އަޅާލެއް ބޮޑީއޭ. ރައީސް ޔާމީން މިއަދު ގޭގައި ހުންނެވި ކަމަށް ވިޔަސް، މިއަދު ސިޔާސީ އެމަނިކުފާނު މައިދާނުގައި ހަމައެކަނި ސްޕީޗެއް ލައިވްކޮށް ދައްކާލި ކަމަށް ވިޔަސް މިބޭފުޅުންގެ މުޅި ޓީމަށާއި، ވެރިކަމާއި ވެރިކަމުގެ މަތިފަޑިއަށް ހަމަ އެއްކޮށް ލޮޅުން އަރައިގެން މިބޭފުޅުން ތުރުތުރު އަޅާފަ ޕޮޕްކޯން ތައްޓެއް މާޖެހޭހެން ވެރިގެންދާނެ،" މިލަންދޫ ދާއިރާގެ ކުރީގެ މެންބަރު ހަސަން މުފީދު ވިދާޅުވިއެވެ.
Ads by STO
