ކީމޯތެރަޕީގެ ޚިދުމަތް ރަށެއްގައި ފުރަތަމަ ފަހަރަށް ދޭން ފަށައިފި
މާލެ ސަރަޙައްދު ފިޔަވާ ރާއްޖޭގެ ރަށެއްގައި ފުރަތަމަ ފަހަރަށް ކީމޯތެރަޕީގެ ޚިދުމަތް ދޭން ފަށައިފިއެވެ.
އެގޮތުން އެޚިދުމަތް ދޭން ފަށާފައި ވަނީ ޅ. ނައިފަރުގައި ހުންނަ އެއަތޮޅު ހޮސްޕިޓަލުންނެވެ.
އެނގިފައިވާ ގޮތުގައި އެއަތޮޅު ހޮސްޕިޓަލުގައި ކީމޯތެރަޕީގެ ޚިދުމަތް ދޭން ފެށީ ކެންސަރަށް ފަރުވާ ހޯދާ ބަލިމީހެއްގެ އެދުމުގެ މަތިންނެވެ.
އުމުރުން 70 އަހަރުގެ އެ މީހާ އަކީ، ކޮންމެ ތިން ހަފުތާއަކުން ކީމޯ ފަރުވާ ހޯދަން ޖެހޭ މީހެކެވެ. ނަމަވެސް ކޮވިިޑް-19ގެ ބަލިމަޑުކަމާ ހެދި އަޅާފައިވާ ރައްކާތެރިކަމުގެ ފިޔަވަޅުގެ ދަށުން، ކޮންމެ ފަހަރަކު މާލެ ގޮސް އައިސް، ގޭގައި ކަރަންޓީނު ވުމަކީ ބަލި މީހާއަށް އިތުރު ވޭނަކަށް ވުމުން، އޭނާގެ އެދުމުގެ މަތިން ހޮސްޕިޓަލުގައި އެޚިދުމަތް ދޭން ފެށީއެވެ. މިޚިދުމަތް ޅ. އަތޮޅު ހޮސްޕިޓަލުގައި ދޭން ފެށީ މިދިޔަ ހޯމަ ދުވަހުން ފެށިގެންނެވެ.
"އެނގިފައިވާ ގޮތުގައި މާލެއަށްދާން އުނދަގޫވާތީ ބަލިމީހާ ވަނީ ބައެއް ރީޖަނަލް ހޮސްޕިޓަލުތަކަށް ގުޅައިގެން ވެސް ކީމޯ ގެ ޚިދުމަތް ފަށައިދޭން އެދިފަ. ނަމަވެސް އެހޮސްޕިޓަލުތަކުން އެޚިދުމަތަށް ތައްޔާރެއް ނޫން" ޅ. އަތޮޅު ހޮސްޕިޓަލް ހިންގުމާ ހަވާލުވެ ހުންނެވި އަބްދުﷲ ޖައުފަރު މީޑިއާއަށް މައުލޫމާތު ދެމުން ވިދާޅުވެފައިވެއެވެ.
ޖައުފަރު ވިދާޅުވީ އެތަނުގައި ވެސް ކީމޯއެއް ފަށާނެ އިމާރާތަކާއި އާލާތްތަކެއް ނެތް ނަމަވެސް، ބަލިމީހެއްގެ އެދުމުގެ މަތިން އެޚިދުމަތް ދިނުމުގެ އިންތިޒާމު ހަމަޖެއްސެވީ ކަމަށެވެ.
Ads by STO
