"ދައްތަ ދިރިހުއްޓާ ފެނުނު އެންމެ ފަހު މަންޒަރަކީ ފައިވާން ނަގަން އޭނާ ގުދުވި ތަން"
މިއީ މީގެ 16 އަހަރުކުރިން 2004 ވަނަ އަހަރުގެ ޑިސެމްބަރ މަހުގެ 26 ވަނަ ދުވަހު ރާއްޖެއަށް އެރި ސުނާމީ ކާރިސާ ލޮލުން ދެކި، އެބިރުވެރިކަން އަމިއްލައަށް ތަޖުރިބާކުރި ޒުވާން އަންހެނެއްގެ ވާހަކައެވެ.
އެކާރިސާގެ ސަބަބުން، ކުޑައިރު އެއްކޮށް ކުޅެން އުޅުނު ލޯބިވާ ދައްތަ ވަނީ އޭނާއާ ވަކިވެގެން ގޮސްފައެވެ. އެމަންޒަރު ވެސް އޭނާއަށް ފެނުނެވެ. އެހިތްދަތިކަން އަދިވެސް އޭނާގެ ހިތުން ފިލައިގެން ނުދެއެވެ.
ސާއިދާ ނަމަކަށް ކިޔާ އުމުރުން 25 އަހަރުގެ އަންހެނަކު "ދެން" އަށް އެވާހަކަ ކިޔައިދެމުން ބުނީ، އެއީ އޭނާގެ މުޅި ޙަޔާތުގައި ވެސް ކުރިމަތިވި އެންމެ ބިރުވެރި އަދި އެންމެ ހިތްދަތި ދުވަސް ކަމަށެވެ.
"އެއިރު އަހަންނަށް ވާނީ ނުވަ އަހަރެވެ. މިބުނާ ދައްތަ އަކީ އަހަރެންގެ ދެބެންގެ ދެދަރި ދައްތައެކެވެ. އެކަމަކު އަހަރުމެން އުޅުނީ ހަމަ އެއްބަނޑު އެއްބަފާ ދެބެންހެން ވަރަށް އެކުއެކީގައެވެ. އަހަރުމެން ކުޅެން ވެސް ކިޔަވަން ވެސް އަބަދުވެސް އުޅުނީ އެކުއެކީގައެވެ. ދެމީހުންގެ ސިފަ ވެސް ކޮންމެވެސް ވަރަކަށް ވައްތަރު ވާނެއެވެ.
ދައްތަ އަހަންނަށް ވުރެ ފަސް އަހަރު ދޮށިވާނެއެވެ. އޭނައަކީ ކިޔެވުމަށް ވެސް ވަރަށް މޮޅު ކުއްޖެކެވެ. އެއިރު ޗުއްޓީ ދުވަސް ކޮޅު ވީމަ ހޮލިޑޭ އެސައިންމެންޓްތައް ދީފަ ހުއްޓެވެ. ނަމަވެސް ދައްތަ ބުނީ ތިމަންނަ މިއަހަރަކު އެ އެސައިންމަންޓުތަކެއް ނުހަދާނަމޭ، ތިމަންނައަކަށް އެސައިންމެންޓްތައް ހަދާކަށް ނުޖެހޭނެއޭ އެވެ.
އެދުވަހު ހެނދުނު، އަހަރުމެންގެ ބޮޑުދައިތައެއް މަރުކަޒުގައި ބާއްވާފަ އޮތީމަ މަންމަ އާއި އެ ދައްތަގެ މަންމަ ތިބީ އެތަނުގައެވެ. ގޭގަ އެއްވެސް ބޮޑު މީހެއް ނެތެވެ. ދޮންތަމެން ވެސް އެއިރު ފުދޭވަރަކަށް ކުޑައެވެ. ބޮޑު މީހަކަށް އެއިރު ހުރީ މާމަ އެކަންޏެވެ، މާމައަކީ އުމުރުން ދުވަސްވެފައި ހުރި މީހެކެވެ.
އެހެން ތިއްބާ އަޑެއް އިވެން ފެށިއެވެ. އަހަރުމެންގެ ގެ އެއިރު ހުންނަނީ އަތިރިމަތި ކައިރީގައެވެ. އެހެންވެ އަޑު އިވެން ފެށި ގޮތުން ހީކުރީ ބޯޓެއްގެ އަޑު ކަމަށެވެ. އެއަޑު އިވެން ފެށީމަ މާމަ ގޮވައިގެން އަތިރިމައްޗަށް ނިކުތީމެވެ. ނަމަވެސް ފެންނަން ފެށީ ވަރަށް ބިރުވެރި މަންޒަރުތަކެކެވެ. ރަށުގެ ގެތައް ވެއްޓޭތަން ފެންނަން ފެށިއެވެ. ނަމަވެސް ރާޅު އަންނަ ތަނެއް ނުފެނޭ އެއިރަކު އަދި ނުފެނެއެވެ.
ގެތައް ވެއްޓޭތަން ފެނުނީމަވެސް ފުރަތަމަ ހީކުރީ އެގެތައް ބަލިކަށިކޮށް ހަދާފަ ހުރީމަ ވެއްޓެނީ ކަމަށެވެ. އޭގެ ކުޑައިރުކޮޅެއް ފަހުން އެތާ ކައިރި ގޯޅިއެއް ތެރެއިން ރާޅު އަރައިގެން އަންނަތަން ފެނުނެވެ. އެމަންޒަރު ފެނިފައި އަހަރުމެން ވަރަށް ބިރުގަތެވެ.
އަހަރުމެން އުޅުނީ މާމަ ގޮވައިގެން އަވަހަށް ސަލާމަތް ވާން މަސައްކަތް ކުރެވޭތޯއެވެ. އެކަމަކު މާމައަކީ އުމުރުން ދުވަސްވީ މީހަކަށްވާތީއާއި އަހަރުމެން ކުޑަ ވީމަ، މާމަ ގޮވައިގެން ދާން ވެސް ވަރަށް އުނދަގޫވިއެވެ.
އަހަރުމެން އުޅުނު ހާލު ބޭބޭބެއަކަށް ފެނިގެން، އެ ބޭބެ މާމަ ގެންދިޔައެވެ. އަދި އަހަންނާއި ދައްތަ ވަރަށް ބާރަށް ދުއްވައިގަތީމެވެ. އެއިރު އަހަރުމެންގެ ފަހަތުން ވަރަށް ބާރަށް ރާޅު ވެސް އާދެއެވެ.
އަހަރުމެން ދުއްވައިގަތް ބާރުކަމުން ދައްތަގެ އެއް ފައިވާން ކިބަ ދޫވިތަން ދުށީމެވެ. ދައްތަ ދިރިހުއްޓާ ފެނުނު އެންމެ ފަހު މަންޒަރަކީ ފައިވާން ނަގަން އޭނާ ގުދުވި ތަނެވެ. އެއީ ފުޓުބޯޅަ ދަނޑު ތެރެއިންނެވެ. ދެން އޭގެ ފަހުން އަހަންނަކަށް ދައްތައެއް ނުފެނުނެވެ. ނަމަވެސް މަންޒަރު ދުށް އެހެން މީހަކު ބުނީ ފައިވާން ނަގަން ދައްތަ ގުދުވި ވަގުތު ރާޅާ ދަމައިގަނެގެން އޮޔާ ދިޔަ މަންޒަރު ފެނުނު ކަމަށެވެ. އެވާހަކަ ކިޔައިދިން މީހަކީ މިހާރު ރާއްޖޭގެ މަޝްހޫރު ނޫސްވެރިއެކެވެ.
އަހަންނަށް އަހަރެންގެ ދައްތަ ދެން ފެނުނީ އޭގެ އަނެއް ދުވަހުއެވެ. މޫދުން ދައްތަ ފެނުނުއިރު، އަހަންނަށް ބައްދަލު ކުރަން ޖެހުނީ ދައްތަގެ ފުރާނަ ނެތް މަސްގަނޑާއެވެ. ދައްތަގެ ދެ އަތް ވެސް އޮތީ ބިނދިފައެވެ. އެއް ލޯ ވެސް ނެތެވެ. އިސްތަށިގަނޑުގައި ވެސް އަތްޖައްސާލީމަ، އިސްތަށިތައް ފައިބައިގެން އަތަށް އައެވެ. ދައްތަ ނިޔާވެފައި އޮއްވާ މޫދުން އެންމެ ފުރަތަމަ ފެނުނީ ދައްތަގެ ބައްޕަ އަށެވެ. މިއީ އަހަރުމެންގެ ހިތުން ދުވަހަކު ވެސް ފިލައިގެން ދާނެ ކަމެއް ނޫނެވެ." ސާއި ކިޔައިދީފައިވެއެވެ.
މިހިތްދަތި ހާދިސާ ހިނގާފައިވަނީ މީގެ 16 ކުރިން ތ. ވިލުފުށީ ގައެވެ. ސުނާމީ ކާރިސާ ގައި އެރަށުން 18 މީހުން ނިޔާވެފައިވެއެވެ.
