ވަގަށް ނަގާފައިވާ 54000 ރުފިޔާ އާއެކު އިސްދޫން ބިދޭސީއެއް ހައްޔަރުކޮށްފި
ލ. އިސްދޫ ގެއަކުން ވަގަށް ނަގާފައިވާ ގިނަ އަދަދެއްގެ ފައިސާތައް ހޯދައި، ތުހުމަތުކުރެވޭ މީހަކު ހައްޔަރު ކޮށްފިއެވެ.
ފުލުހުން ވިދާޅުވާ ގޮތުގައި މިމައްސަލައާ ގުޅިގެން ހައްޔަރު ކޮށްފައި ވަނީ 26 އަހަރުގެ ބިދޭސީ ފިރިހެނެކެވެ.
އެމީހާ ހައްޔަރު ކޮށްފައި ވަނީ ލ.އިސްދޫ ގެއަކުން 54000 ރުފިޔާ ވަގަށް ނަގާފައިވާކަމަށް ޑިސެންބަރު މަހުގެ 27 ވަނަ ދުވަހުގެ ވަގުތެއްގައި ފުލުހުންނަށް ހުށަހެޅުނު މައްސަލައަކާ ގުޅިގެން ލ.އިސްދޫ ޕޮލިސް ސްޓޭޝަނާ ފުލުހުންގެ އިންޓެލިޖެންސް ގުޅިގެން ހިންގި އޮޕަރޭޝަނެއްގައި ޑިސެންބަރު މަހުގެ 28 ވަނަ ދުވަހުގެ ވަގުތެއްގައި ކަމަށް ވެސް ފުލުހުން ވިދާޅުވިއެވެ.
ވަގަށް ނަގާފައިވާ ފައިސާތައް ފެނިފައި ވަނީ މިމައްސަލައިގައި ހައްޔަރު ކޮށްފައިވާ މީހާ ދިރިއުޅެމުންދާ ގެ ބަލައި ފާސްކުރިއިރު އެގެއިން ކަމަށާއި މިމައްސަލައިގައި ހައްޔަރު ކޮށްފައިވާ މީހާގެ ބަންދާމެދު ގޮތެއް ނިންމުމަށް ލ.ކަލައިދޫ ކޯޓަށް ހާޒިރު ކުރުމުން އެ ކޯޓުން ވަނީ 15 ދުވަހުގެ މުއްދަތެއް ދީފައިވާ ކަމަށް ފުލުހުން ވިދާޅުވިއެވެ.
