ކޮވިޑް-19: ކޯމާއެއްގައި އޮތް މާބަނޑު އަންހެނަކު ހޭއެރިއިރު، ދަރިއަކު ލިބިއްޖެ
އިނގިރޭސިވިލާތުގެ މާބަނޑު އަންހެނަކު ކޯމާއެއްގައި އޮވެ ވިހައިފިއެވެ.
ރިޕޯޓުތަކުން ބުނާ ގޮތުގައި އުމުރުން 22 އަހަރުގެ މެފާރާ ނަގުވީ ނަމަކަށް ކިޔާ އެއަންހެން މީހާ މިދިޔަ އޮކްޓޯބަރު މަހު ހޮސްޕިޓަލަށް ދިޔައީ ނޭވާ ކުރުވެ، ނޭވާލާން އުނދަގޫވާން ފެށުމުންނެވެ. އޭނާގެ ބަނޑަށް އެއިރު ހަތް މަސް ފުރިފައިވާތީ، ނޭވާ ކުރުވުން އެއީ މާބޮޑު މައްސަލައެއް ކަމަކަށް އޭނާ ފުރަތަމަ ހިއެއް ނުކުރެއެވެ.
ނަމަވެސް ބޮލުގައި ރިއްސުމާއި ކެއްސުންފަދަ ކަންކަން ވެސް ދިމާވާން ފެށުމުން އޭނާއަށް ވަނީ ކޮވިޑަށް ފައްސި ވެފައިކަމުގެ ބިރު ހީވާން ފެށިއެވެ. އެހެންކަމުން ސިއްޙީ އިތުރު މައްސަލައެއް ކުރިމަތިވުމުގެ ކުރިން ފަރުވާ ހޯދަން އަވަހަށް ޑޮކްޓަރަށް ދެއްކިއެވެ.
ނަމަވެސް ޑޮކްޓަރަށް ދެއްކިއިރު ވެސް މެފާރާގެ ހާލު ހުރީ ކްރިޓިކަލް ވެފައި ކަމަށާއި އެހެންކަމުން އެންމެ ފުރަތަމަ ވެސް އައިސީޔޫ ގައި އޭނާއަށް ފަރުވާދޭން ފެށި ކަމަށް ވެސް ރިޕޯޓުތަކުން ބުނެފައި ވެއެވެ. ކޮވިޑަށް ވެސް ފައްސިވެ މެފާރާގެ ހާލު އިތުރަށް ދަށްވާން ފެށުމުން ސިޒޭރިއަން ހަދައިގެން ދަރިފުޅު ނަގަން ޖެހިދާނެ ކަމަށް ވެސް ޑޮކްޓަރުން ވަނީ ބުނެފައެވެ.
މެފާރާ ގެ ހާލު ދެރަވެ އޭނާ ކޯމާއަކަށް ދިޔަ ކަމަށާއި، އަދި ބަނޑުގައި އޮތް ދަރިފުޅުގެ އޮކްސިޖަން ލެވެލް ވެސް ދަށްވާން ފެށިކަމަށް ރިޕޯޓުތަކުން ބުނެފައިވެއެވެ. އެހެންކަމުން ޑޮކްޓަރުންނަށް މަޖުބޫރުވީ، މެފާރާ ކޯމާއެއްގައި އޮއްވާ ސިޒޭރިއަން ހަދާ، ދަރިފުޅު ސަލާމަތް ކުރާށެވެ.
"އަހަރެން އޮތީ ނުވަތަ ދުވަސް ވަންދެން ކޯމާގައި. އަހަރެންނަކަށް ނޭނގޭ އަހަރެންނަށް ދަރިއަކު ލިބުނުކަމެއް. ވެގެން ދިޔަ އެއްވެސް ކަމެއް އަހަރެންނަކަށް ނޭނގޭ." މެފާރާ ބުނެފައިވެއެވެ.
ސިޒޭރިއަން ހެދިތާ ދުވަސްތަކެއް ފަހުން މެފާރާ ގެ ހާލުވެސް ރަނގަޅުވާން ފަށާ، އޭނާ ހޭ އަރާ ކޯމާއިން ސަލާމަތް ވިއެވެ. އަދި 2020 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު އައިސީޔޫ އިން ވެސް ދޫކޮށްލިއެވެ.
