ފާފަ ކުރުމުގައި ދެމިހުރި މީހަކު، މާތް ﷲ އަށް ތައުބާވީ ވަގުތު ނިޔާވި ރީތިގޮތުގެ ވާހަކަ
ބަނީ އިސްރާއީލަށް ނިސްބަތް ވެގެންވީ މީހެކެވެ. އޭނާއަކީ ވަރަށް ގިނައިން ފާފަކޮށް، ވަރަށް ވެސް ވިޔާނުދާކޮށް އުޅުނު މީހެކެވެ.
އޭނާގެ އުޅުން ވިޔާނުދާވުމުގެ ސަބަބުން މުޅި އެޤައުމުގެ އެންމެން، އޭނާ އެއަވަށުން ބޭރު ކޮށްލިއެވެ.
އޭނާ އެކަނިވެރިވިއެވެ. ކައިބޮއެ އުޅެވޭނެ ގޮތެއް ނެތެވެ. ބޯހިޔާވަހިކަން ހޯދަން ދާނެ ތަނެއް ވެސް ނެތެވެ. ބަލިވުމުން ވެސް އޭނާއާ އަޅާލާނެ މީހަކު ނުވިއެވެ. އެފަދަ ހާލަތެއްގައި އޮވެ އޭނާ މި ދުނިޔެއިން ވަކިވެގެން ދިޔައެވެ.
އެހިނދު މާތް ﷲ (ރަސޫލު ބޭކަލަށް) ވަޙީ ބަސްފުޅު އިއްވެވިއެވެ. އެކަލާނގެ ވަޙީ ކުރެއްވެވިއެވެ.
"ތިމަން ރަސްކަލާނގެއާ ނުހަނު ކުއްތަންވި އަޅަކު ނިޔާ ވެއްޖެއެވެ. އޭނާ ހިނަވާ، އޭނާގެ ޖަނާޒާ ބާއްވާށެވެ. އަދި ޤައުމުގެ މީހުން ގާތަށް ގޮސް، އޭނާގެ ޖަނާޒާގައި ބައިވެރިވެ ދުޢާ ކުރާ ކޮންމެ މީހެއްގެ ފާފަ ތިމަންރަސްކަލާނގެ ފުއްސަވާނެ ވާހަކަ އަންގަވާށެވެ."
އެހެންކަމުން އެމީހާގެ ޖަނާޒާގައި އެންމެން ބައިވެރިވިއެވެ. އޭނާގެ މޫނުބެލުމަށް ކައިރިވީ ހިނދު، އެއީ ކުރިން ނުބައި ޢަމަލުތައް ކޮށްއުޅުނު މީހާކަން އެންމެންނަށް އެނގުނެވެ. އެ ރަސޫލާ ، މާތް ﷲ އަށް ދުޢާ ކުރައްވާ، އޭނާގެ ޚަބަރު އަންގަވައި ދެއްވުމަށް އެދިލެއްވިއެވެ.
މާތް ﷲ ވަޙީ ކުރެއްވިއެވެ.
"އޭނާ ހުރީ އެކަނިވެފައެވެ. ލަދު ގެންފައެވެ. އެއްވެސް ކަމެއް ކުރާނެ މަގެއް ނެތިފައެވެ. އޭނާގެ އެކުވެރިއެއް ތިމާގެ މީހެއް ވެސް ނުވިއެވެ. އޭނާ ބަލިކަށިވަމުން ދިޔުމުން ތިމަންރަސްކަލާނގެ މަތިން އޭނާ ހަނދުމަ ކުރިއެވެ. އޭނާ ތިމަންރަސްކަލާނގެއަށް ދުޢާ ދެންނެވިއެވެ."
"ޔާ ﷲ ތިމަންނާއަށް މިފަދަ އަޒާބެއް ލިބިގެން މާތް ރަސްކަލާނގެ މަތިވެރިކަން އިތުރުވާނޭކަން ތިމަންނާއަށް އެނގޭނަމަ، އަދި ތިމަންނާގެ ފާފަ ފުއްސަވައިގެން އިބަ އިލާހުގެ މަތިވެރިކަން ދަށްވެދާނެކަމަށް ތިމަންނާއަށް ހީވާ ނަމަ، ތިމަންނާ އިބަ ރަސްކަލާނގެ ޙަޟްރަތުން ފާފަ ފުއްސެވުމަށް އެދި ނުދަންނަވާނަމެވެ.
އެހެން ނަމަވެސް ތިމަންނާގެ ފާފަ ފުއްސަވައިގެން އިބަ ރަސްކަލާނގެ މަތިވެރިކަން ދަށް ނުވާނެކަން ތިމަންނާއަށް އެނގޭތީ، ތިމަންނާއަށް ކުރެވުނު ހުރިހާ ފާފަތައް ފުއްސަވާ ދެއްވުމަށް އެދި އިބަ ރަސްކަލާނގެ ހަޟްރަތަށް ތައުބާވަމެވެ.
ތިމަންނާއަށް ޓަކައި އިބަ ރަސްކަލާނގެ ނޫން އެހެން އެއްވެސް ފަރާތެއް ނުވެއެވެ. ތިމަންނާގެ އަޑު އައްސަވާނެ އެހެން ފަރާތެއް ވެސް ނުވެއެވެ. އެހެންކަމުން ތިމަންނާގެ ފާފަ ފުއްސަވާދެއްވާންދޭވެއެވެ."
އޭނާ ނިޔާވީ އެފަދައިން ދުޢާ ކުރެއްވި ވަގުތުއެވެ.
މާތް ﷲ ވަޙީ ކުރެއްވެވިއެވެ.
"ފަހެ، އޭނާގެ ތައުބާ ވަރަށް ވެސް ގަދަފަދައެވެ. އަދި ފާފަ ފުއްސެވުމަށް އެދި ދުޢާ ކުރި އިރު، އޭނާ ހަމައެކަނި އޭނާއަށް ޓަކައި ދުޢާ ކުރީ އޭނާގެ ހަނި ވިސްނުމެއް ހުރުމުންނެވެ. އޭނާ ދުޢާ ކުރިއިރު މުޅި އުންމަތުގެ ފާފަ ފުއްސެވުމަށް އެދި ދުޢާ ދެންނެވި ނަމަވެސް، ހަމަކަށަވަރުން ތިމަން ރަސްކަލާނގެ އޭނާގެ ތައުބާ ޤަބޫލުކުރައްވާ މުޅި އުންމަތުގެ އެންމެންގެ ފާފަ ވެސް ފުއްސެވީމުހެވެ."
