"ބަލީގެ އަލާމާތެއް ހުރިނަމަ ކުދިން ސުކޫލަށް ފޮނުވައިގެން ނުވާނެ"
ޖަނަވަރީ 10 ވާ އާދިއްތަ ދުވަހު ސުކޫލުތައް ހުޅުވޭއިރު، ބަލީގެ ކިތަންމެ އާދައިގެ ، ކިތަންމެ ކުޑަކުޑަ އަލާމާތެއް ހުރި ނަމަވެސް އެފަދަ ދަރިވަރުން ސުކޫލަށް ނުފޮނުވުމަށް ހެލްތު އިމަޖެންސީ އޮޕަރޭޝަން ސެންޓަރ (އެޗްއީއޯސި) އިން އިލްތިމާސް ކޮށްފިއެވެ.
ކޮވިޑު-19 އަށް ފަހު ސުކޫލުތަކުގެ ކިޔެވުން އޮންލައިންކޮށް ކިޔަވައިދޭ އުސޫލަށް ބަދަލުކުރުމަށް ފަހު ގިނަ ދުވަސްތަކަކަށް ފަހު ސުކޫލުތައް އަލުން ހުޅުވަން ނިންމައިފައި މިވަނީ ހާޒިރު ވެގެން ކިޔަވަންޖެހޭ ގޮތަށެވެ. އެޗްއީއޯސީ އިން ބުނީ ސުކޫލުތަކަކީ ރައްކާތެރި މާހައުލަކަށް ހެދުމަށް ކުރަން ޖެހޭ ކަންކަން ހިމެނޭ ގައިޑްލައިނެއް ނެރެވިފައިވާއިރު، ސުކޫލު މާހައުލުގައި އެ ގައިޑުލައިންތަކާ އެއްގޮތަށް އަމަލު ކުރުން ވަރަށް މުހިންމު ކަމަށެވެ.
އަދި ދަރިވަރު ސުކޫލަށް ފޮނުވުމުގެ ކުރިން އެއީ ބަލީގެ އެއްވެސް އަލާމާތެއް ނެތް ދަރިވަރެއްކަން ޔަގީން ކުރުމަށް ބެލެނިވެރިންނަށް އެ ސެންޓަރުން އިލްތިމާސް ކުރެއެވެ. އެޗްއީއޯސީގެ ތަރުޖަމާނު ޑރ ފާތިމަތު ނަޒުލާ ވިދާޅުވީ ބަލީގެ ކިތަންމެ ކުޑަ އަދި ކިތަންމެ އާދައިގެ އަލާމާތެއް ހުރި ކުއްޖަކު ނަމަވެސް ސުކޫލަށް ފޮނުވާކަށް ނުވާނެ ކަމަށެވެ. އަދި އަލާމާތެއް ފެނުމާއެކު، ފްލޫ ކްލިނިކަށް ގޮސް ޓެސްޓުކޮށް ނައްސި ނަތީޖާއެއް ލިބުމުން ނޫނީ ސުކޫލަށް ފޮނުވައިގެން ނުވާނެ ކަމަށް ވެސް ނަޒުލާ ވިދާޅުވިއެވެ.
ކޮވިޑު-19 އާ ގުޅިގެން ސުކޫލުތައް ބަންދުކުރީ މާރޗު މަހުއެވެ. އަދި ނިމިދިޔަ 2020 ވަނަ އަހަރު ސުކޫލުތައް ހުޅުވައިފައި ނުވާއިރު، އެ އަހަރު ސުކޫލު ކުދިންނަށް ކިޔަައިދީފައި ވަނީ އޮންލައިން ކޮށެވެ. އެހެން ނަމަވެސް އެޑިއުކޭޝަން މިނިސްޓްރީން އެކަޑަމިކް ކަލަންޑަރުގައި ވާގޮތަށް އަންނަ އާދިއްތަ ދުވަހު 2020/2021 ގެ ދިރާސީ އަހަރުގެ ދެވަނަ ޓާމުގެ ކިޔެވުން އާދިއްތަ ދުވަހު ފަށާނެ ކަމަށެވެ.
Ads by STO
