ދިރާސީ އަހަރުގެ ދެވަނަ ޓާރމުގެ ކިޔެވުން ފެށިއްޖެ
މިދިޔަ އަހަރުގެ ދެވަނަ ޓާރމުގެ ކިޔެވުން ރާއްޖޭގެ ގިނަ ސްކޫލްތަކުުގައި މިއަދު ފެށިއްޖެއެވެ.
ދިރާސީ އަހަރުގެ ދެވަނަ ޓާރމުގެ ކިޔެވުން މިއަދު ފެށޭނެ ކަމަށް އެޑިއުކޭޝަން މިނިސްޓްރީން ކުރިން ވެސް އިއުލާނު ކޮށްފައިވާއިރު، މިއަދު ކިޔެވުން ފެށިފައިވަނީ ބޭބީ ނާސަރީން ގްރޭޑް 12 އާއި ހަމައަށެވެ.
ކޮވިޑް-19 އާ ގުޅިގެން ސްކޫލްތަކުގެ ކިޔެވުން ދިގު މުއްދަތަކަށް މެދުކަނޑާލުމަށްފަހު، މިއަދު އަލުން ފެށިފައިވަނީ، ރައްކާތެރިކަމުގެ ގޮތުން އެތައް ފިޔަވަޅުތަކެއް ވެސް އަޅައިގެންނެވެ.
އެގޮތުން ސްކޫލްތަކުގެ އިސްވެރިންނާޢި މުވައްޒަފުންނާއި ޓީޗަރުންގެ އިތުރުން ދަރިވަރުން ވެސް ސްކޫލަށް ވަދެފައިވަނީ މާސްކު އަޅައިގެންނެވެ. މީގެ އިތުރުން ކޮންމެ ކުއްޖަކުވެސް ކްލާހަށް ފޮނުވުމުގެ ކުރިން ސަފު ހަދާ، ޓެމްޕަރޭޗަރު ވެސް ބަލާފައިވެއެވެ.
ދަރިވަރުންނަށް ކިޔަވައިދޭން ފެށުމުގެ ކުރިން، އެކުދިންގެ އަތް ދޮއްވަން ވެސް ފޮނުވައެވެ. އަދި ކެއްސާ ކިނބިހި އަޅާނަމަ ކަންކުރަންވީ ގޮތްތަށް ވެސް ސްލޫލްތަކުން ވަނީ ދަރިވަރުންނަށް ކިޔައިދީފައެވެ.
ނިއު ނޯމަލް ގައިޑްލައިންގައި ބުނާގޮތުން ސްކޫލުތަކުގައި ފޭސް ޓު ފޭސްކޮށް ކިޔަވައިދޭން ފަށާއިރު ތިން ކެޓަގަރީ އަކަށް ބަހާލައިފައި ވެއެވެ. ސްކޫލުގައި ކިޔަވާ ކުދިންގެ ނިސްބަތުން މިގޮތަށް ބަހާލާފައި ވާއިރު ސިންގަލް ސެޝަނަށް، ހަފްތާއަކު ފަސް ދުވަހު ކުދިން ސްކޫލަށް ދާން ޖެހޭ ސްކޫލުތަކާއި، ހަފްތާ އަކު ފަސް ދުވަހު ދެ ސެޝަަނަށް ކިޔަވައިދޭ ސްކޫލުތަކާއި، ކުދިންގެ ނިސްބަތުން ކޮންމެ ދުވަހަކު ސްކޫލަށް ގޮސް ކިޔަވައިދޭނެ ޖާގަ ނެތްނަމަ ދެދުވަހުން އެއް ދުވަހު ކުދިން ސްކޫލަށް ގޮސްގެން ކިޔަވައިދޭނެ އިންތިޒާމު ހަމަޖައްސަންޖެހޭ ސްކޫލުތައް ހުރެއެވެ. މިފަދަ ސްކޫލުތަކުގައި ކުދިން ސްކޫލަށް ގެންގޮސްގެން އަދި އޮންލައިންކޮށް ވެސް ކިޔަވައިދޭން ޖެހެއެވެ.
