ރަށުބަންދާއެކު ހަލަބޮލި ގަމު ރީޖަނަލް ހޮސްޕިޓަލަށް ފަޅުކަން
ލ.ގަން މޮނިޓަރިންގެ ހާލަތަށް ލުމާއެކު، މާލޭގެ ލޮކްޑައުންއާއެކު މެދު ދެކުނުގެ އަތޮޅުތަކުގެ ގިނަ ބަޔަކު ސިއްޙީ ފަރުވާއަށް ބަރޯސާވަމުން އަންނަ ގަމު ރީޖަނަލް ހޮސްޕިޓަލް މުޅިން "ފަޅު" ވެއްޖެއެވެ.
ގަން ރަށު ބަންދަކަށް ލުމުން، ލާމު އަތޮޅުގެ ރަށްރަށުންނާއި އެއަތޮޅު ކައިރި އަތޮޅުތަކުގެ އެތައް ސަތޭކަ ރައްޔިތުންނެއް ކޮންމެ ދުވަހަކު ޑަކްޓަރަށް ދައްކަމުންދާ ގަން ރީޖަނަލް ހޮސްޕިޓަލްގެ އޮޕަރޭޝަނަށް ވަނީ ބަދަލުތަކެއް ގެެނެސްފައެވެ.
ގަން ރީޖަނަލް ހޮސްޕިޓަލުގެ މެނޭޖަރ އަލީ ނަޝީދު "ދެން" އަށް މަޢުލޫމާތު ދެއްވަމުން ވިދާޅުވީ، މިވަގުތު ޚާއްސަ ބަލިތަކަށް ޑޮކްޓަރަށް ދެއްކުން މެދު ކަނޑާލާފައިވާ ކަމަށާއި މިހާރު ރަށު ބަންދާއެކު ހަދާފައިވާ އުސޫލުގެ ދަށުން ޚާއްސަ ބަލިތަކުގެ ޑަކްޓަރަށް ދެއްކޭނީ އާއްމު ބަލިތަކުގެ ޑަކްޓަރު ލަފާ ދެއްވުމުން ކަމަށެވެ.
"ޚާއްސަ ބަލިތަކުގެ ޑޮކްޓަރުންނަށް ދެއްކުން މިވަގުތު މިއޮތީ ހުއްޓާލެވިފަ. އެހެންނަމަވެސް އެމަޖެންސީކޮށް ޑަކްޓަރަށް ދައްކަން ޖެހޭ ފަރާތްތައް ނޫނީ މިކޮޅުގެ އީއާރު އަދި އާއްމު ބަލިތަކުގެ ޑަކްޓަރުން ތިއްބަވާނެ. އެ ޑަކްޓަރުން ލަފާދޭ ފަރާތްތައް އެކަނި ޚާއްސަ ބަލިތަކުގެ ޑަކްޓަރުން ބައްލަވާނީ." ނަޝީދު ވިދާޅުވިއެވެ.
ނަޝީދު ވިދާޅުވީ، ގަން ރީޖަނަލް ހޮސްޕިޓަލުން މިހާރު އެޕޮއިންޓްމެންޓް ދޫކުރުން ހުއްޓާލާފައިވާ ކަމަށާއި މިހާރު އެޕޮއިންޓްމެންޓް ހަދާފައިވާ ފަރާތްތައްވެސް ފުރަތަމަ ދައްކަން ޖެހޭނީ އާއްމު ބަލިތަކުގެ ޑަކްޓަރަށް ކަމަށެވެ. އަދި އެ ޑަކްޓަރު ލަފާ ދޭނަމަ، ޚާއްސަ ބަލިތަކުގެ ޑަކްޓަރަށް ދެއްކުމުގެ ފުރުސަތު ދެވިގެންދާނެ ކަމަށްވެސް ނަޝީދު ވިދާޅުވިއެވެ.
"އަޅުގަނޑުމެން ހަފްތާއަކަށް އެޕޮއިންޓްމެންޓްތައް މިހައްދަނީ. އެހެންވީމަ މާދަމާއަށް ވެސް މިއަދު އޮންނާނެތާ އެޕޮއިންޓްމެންޓްތައް ކުރީބައިގަ ހެއްދިފަ. މިވަގުތު އަޅުގަނޑުމެން މިއޮތީ ހުއްޓާލާފަ އެޕޮއިންޓްމެންޓްތައް ހެއްދުން" ނަޝީދު ވިދާޅުވިއެވެ.
ރައްކާތެރި ކަމުގެ ފިޔަވަޅެއްގެ ގޮތުން މިހާރު ވޯޑްތަކުގައި ތިބި ބަލި މީހުންނަށް ޒިޔާރަތް ކުރުން ހުއްޓާލެވިފައިވާކަން ފާހަގަކޮށް، ކޮންމެހެން ދައްކަން ޖެހިގެން ނޫނީ ހޮސްޕިޓަލަށް ނައުމަށް ނަޝީދު ވަނީ އިލްތިމާސް ކުރައްވާފައެވެ،
"ކޮންމެހެން އަންނަން ޖެހިގެން ނޫނީ ހޮސްޕިޓަލަށް ނައުމަށް އިލްތިމާސް ކުރަން. ވޯޑް ތަކުގައި ތިބި ބަލި މީހުންނަށް ޒިޔާރަތް ކުރުން މިވަނީ ހުއްޓާ ލެވިފައި." ނަޝީދު ވިދާޅުވިއެވެ.
އއ، އދ، ވ، މ، ފ، ދ އަތޮޅުން ކޮންމެ ދުވަހަކު ގަން ރީޖަނަލް ހޮސްޕިޓަލަށް އެތައް ސަކޭތަ ބަޔަކު ޑަކްޓަރަށް ދަައްކަން މީގެ ކުރިން ވަނީ އައިސްފައެވެ. ގަމާ އިން ވެގެން އޮންނަ ފޮނަދޫއިން ކޮވިޑް-19ގެ 4 ކޭސް އެއް ފެނި ގަން އަދި ފޮނަދޫއަށް އަރާ ނުފޭބޭ ގޮތަށް ވަނީ ރަށުބަންދަކަށް ލާފައެވެ. ރަށު ބަންދާއެކު، ގަމަށް ހޮސްޕިޓަލަށް ދައްކަން އައިސް ތިބި ގިނަ ބަޔަކު ގަމުގައި "ތާށި" ވެފައި ތިބިކަން ފާހަގަކޮށްލެއެވެ.
Ads by STO
