ހުކުމް އިއްވުން ލަސްވިޔަސް އިންސާފުވެރި ހުކުމަކަށް އުންމީދު ކުރަން: ގައްސާން

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ޚިޔާނާތާ ގުޅިގެން ފަސް އަހަރު ދުވަހުގެ ޖަލު ހުކުމެއް އިއްވާފައިވާ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ފަރާތުން  އެހުކުމް އިސްތިއުނާފު ކުރި މައްސަލައިގެ ހުކުމް އިއްވުން ފަސް ކުރި ނަމަވެސް، އިންސާފުވެރި ހުކުމެއް އިއްވާނެ ކަމަށް އުންމީދު ކުރައްވާ ކަމަށް ގުރައިދޫ ދާއިރާގެ މެމްބަރު ގައްސާން މައުމޫން ވިދާޅުވެއްޖެ އެވެ.

Ads by Sosun Fihaara

މިމައްސަލައިގެ ހުކުމް އިއްވުމަށް ކުރިން ކަނޑައެޅުނީ މިމަހުގެ 14 ވަނަ ދުވަހަށެވެ. ނަމަވެސް މިހާރު ވަނީ ހުކުމް އިއްވުން މިހިނގާ ޖެނުއަރީ މަހުގެ 21 ވަނަ ދުވަހަށް ފަސްކޮށްފައެވެ.

މިކަމާ ގުޅިގެން ގައްސާނު ކުރެއްވި ޓްވީޓެއްގައި ވިދާޅުވެފައި ވަނީ ކްރިމިނަލް ކޯޓު ކޭސްހެން މާދަމާކުރަން އޮތް ހުކުމް ލަސް ކުރެވުނު ނަމަވެސް ނުފޫޒުން އެއްކިބާ އިންސާފުވެރި ހުކުމަކަށް އުއްމީދު ކުރައްވާ ކަމަށެވެ.

ރައީސް ޔާމީންގެ މިމައްސަލައިގެ ހުކުމް އިއްވުން ލަސްކުރުމާ ގުޅިގެން އިދިކޮޅުގެ ގިނަ ފަރާތްތަކުން ވަނީ ކަންބޮޑުވުން ފާޅު ކޮށްފައެވެ. އޭގެތެރޭގައި މަޑުއްވަރީ ދާއިރާގެ މެންބަރު އާދަމް ޝަރީފު އުމަރު ވެސް ހިމެނި ވަޑައިގަންނަވާއިރު، އެމަނިކުފާނު ކުރެއްވި ޓްވީޓުގައި ވިދާޅުވެފައިވަނީ "ޖަސްޓިސް ޑިލޭޑް އިޒް ޖަސްޓިސް ޑިނައިޑް" ކަމަށެވެ.