15 އަހަރުގެ މި ކުއްޖާއަށް ސާބަސް: ފަންސަވީސް ޓަނުގެ ކަރަންޓު ސާމާނު "ރިސައިކަލް" ކުރުމުގައި އެހީވެދީފި
ދުބާއީގެ ސުކޫލެއްގައި ތައުލީމް ހާސިލު ކުރަމުންދާ އިންޑިއާގެ ކުއްޖަކު ފަންސަވީސް ޓަނުގެ އުކާލެވޭ ކަރަންޓު ސާމާނު އަލުން ބޭނުން ކުރުމުގައި އެހީތެރިވެދީފިއެވެ.
މީޑިއާތަކަށް އޭނާ ދިން އިންޓަވިއުތަކުގައި އޭނާ ބުނެފައިވަނީ އެންމެ ފުރަތަމަ އޭނާ މަންމައާއެކު ގެ ބަދަލު ވުމުގެ ތެރޭގައި އެގެއިން އުކާލަން ހުރި ކަރަންޓް ސާމާނު އުކާނުލާ އެހެން ބޭނުމެއް ކުރެވޭތޯ މަސައްކަތް ކުރި ކަމަށެވެ. އެގޮތުން، "އެންވީރޯ ސާރވް" ކިޔާ ރިސައިކަލް ކުރާ ބަޔަކާ ގުޅިގެން މި އަންހެން ކުއްޖާ ވަނީ އެ ސަރަހައްދުގެ އެކި ގޭގެއިން ހަލާކުވެ އުކާލަން ޖެހިފައިވާ ކަރަންޓު ސާމާނު އެއްކޮށްފައެވެ. އޭގެ ތެރޭގައި ދެހާހަށްވުރެ ގިނަ ލެޕްޓޮޕް، ކީބޯޑް، ފޯނު އަދި ޕްރިންޓަރު ފަދަ ކަރަންޓު ސާމާނު ހިމެނެއެވެ.
ދުބާއީގެ ޖެމްސް މޮޑާރން އެކަޑަމީ ސުކޫލްގެ ގްރޭޑް 10ގައި ތައުލީމް ހާސިލު ކުރަމުންދާ މި ކުއްޖާ މިތަކެތި އެއްކުުރުމަށްފަހު ބަހައްޓާފައި ވަނީ އެކުއްޖާ ދިރިއުޅެމުންދާ ގޭގައެެވެ. މިކަމާ ގުޅިގެން ބޭރުގެ މީޑިއާތަކަށް މައުލޫމާތު ދެމުން އެކުއްޖާ ބުނީ އެ ސާމާނުގެ އެކިކަހަލަ ބައިތަކުން ބައިވަރު ބޭނުންތައް ކުރެވޭ ކަމަށެވެ.
މިކަމާ ގުޅިގެން މިއަންހެން ކުއްޖާ "ވީ ކެއާރ ޑީއެކްސްބީ"ގެ ނަމުގައި ވަނީ ކެމްޕެއިނެއް ވެސް ފަށާފައެވެ. މި ކެމްޕެއިންގެ ބޭނުމަކީ އެފަދަ އުކާލެވޭ ކަރަންޓު ސާމާނުން އިތުރު ބޭނުންތައް ހިފުމަށް އަހުލުވެރި ކުރުވުމެވެ. ޑިސެމްބަރު މަހުގެ ފަހުކޮޅު 15 ސުކޫލަކުން ޖުމުލަ 60 ދަރިވަރުން ވަނީ މި ކެމްޕެއިނުގައި ބައިވެރި ވެފައެވެ. އަދި މި މަހު ފަހުކޮޅު މި ދަރިވަރުންގެ އަގުވަޒަން ކުރުމުގެ ގޮތުން ހާއްސަ ރަސްމިއްޔާތެއް ބޭއްވި، ސެޓްފިކެޓް ދެވިގެންދާނެ ކަމަށް ވެސް ރިޕޯޓްތައް ބުނެއެވެ.
15 އަހަރުގެ މި ކުއްޖާގެ މި މަސައްކަތަށް ގިނަ ބަޔަކު އަންނަނީ ތައުރީފް ކުރަމުންނެވެ. އަދި ބޭރުގެ ބޮޑެތި ނޫސްތަކުން ވެސް މިކުއްޖާ ވަނީ ޖާގަ ހޯދާފައެވެ.
