މިޔަންމާގައި ހިނގަމުންދަނީ 2012 ވަނަ އަހަރު ރާއްޖޭގައި ހިނގިފަދަ ބަޣާވާތެއް: ރައީސް ނަޝީދު
މިޔަންމާ ނުވަތަ ބަރުމާގައި މިހާރު ހިނގަމުން އެދަނީ 2012 ވަނަ އަހަރު ދިވެހިރާއްޖޭގައި ހިނގި ފަދަ ބަގާވާތެއް ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބަރުމާގެ އަސްކަރިއްޔާ އިން އެގައުމުގެ ލީޑަރު އަން ސަން ސޫކީ ހައްޔަރު ކުރުމާ ގުޅިގެން ކުރެއްވި ޓްވީޓެއްގައި ރައީސް ނަޝީދު ވިދާޅުވީ އެގައުމުގައި ހިންގަމުން އަންނަނީ 2012 ވަނަ އަހަރު ފެބްރުއަރީ 7 ވަނަ ދުވަހު ރާއްޖޭގައި ހިންގި ފަދަ ބަގާވާތެއް ކަމަށެވެ.
ރައީސް ނަޝީދު ވެރިކަމުން އިސްތިއުފާ ދެއްވި ދުވަސް ހަނދާން ކުރައްވައި ރައީސް ނަޝީދު ވިދާޅުވީ މިހާރު ބަރުމާގައި ހިނގަމުންދާ ކަންތައްތަކާއި، އެމެރިކާގެ ވެރިކަން ބަދަލުވުމުގެ ތެރޭގައި ހިނގައިދިޔަ ކަންތައްތަކަކީ ރާއްޖޭގައި ހިނގައިދިޔަ ކަންތައްތަކާ އެއްފަދަ ކަންތައްތަކެއް ކަމަށެވެ. އަދި މިއީ ހައްތަހާ ވެސް ބަގާވާތް ކަމަށް ރައީސް ނަޝީދު ވިދާޅުވިއެވެ.
ބަރުމާގެ އަސްކަރިއްޔާއިން ވަނީ އެގައުމުގެ ލީޑަރާއި ރައީސާއި ދައުލަތުގެ ހުރިހާ އިސްވެރިންނާއި އެކި ޕްރޮވިންސްތަކުގެ އިސްވެރިންނާއި ވެރިކަން ކުރާ ޕާޓީގެ ވެރިން ހައްޔަރުކޮށް އެގައުމަށް ބަގާވާތެއް ގެނައިކަން އިއުލާނު ކޮށްފައެވެ. ކުއްލި ގޮތަކަށް ބަރުމާ ވެރިކަން ކުރާ ޕާޓީގެ އިސްވެރިންތަކެއް ހައްޔަރު ކޮށްފައި މިވަނީ މިދިޔަ ނޮވެމްބަރު މަހު އެގައުމުގައި ބޭއްވި ގާނޫނު ހަދާ މަޖިލީހުގެ އިންތިހާބު އޮޅުވާލާފައިވާ ކަމުގެ ތުހުމަތު އެގައުމުގެ އަސްކަރިއްޔާ އިން ކުރަމުން އަންނަތާ ދުވަސްތަކެއް ފަހުންނެވެ.
