އަޅުގަނޑު ސަސްޕެންޑެއް ނުކުރޭ : މޯލްޑިވް ގޭހުގެ އެމްޑީ އިކްރާމް
މޯލްޑިވް ގޭސްގެ އެކްޓިން މެނޭޖިން ޑިރެކްޓަރު އަލީ އިކުރާމް ސަސްޕެންޑު ކޮށްފި ކަމަށް ދެކެވޭ ވާހަކަ އެމަނިކުފާނު ދޮގު ކުރައްވައިފިއެވެ.
އޮންލައިން ނޫސް "ސަން" އިން މީގެ ކުރިން ލިޔެފައި ވަނީ އިކުރާމް ސަސްޕެންޑު ކޮށްފި ކަމަށެވެ. ނަމަވެސް މިހާރު އެނޫހުން ވަނީ، އިކުރާމްގެ މައްސަލައެއް ބަލަމުން އަންނަ ކަމަށް ބުނެ އެޚަބަރު ބަދަލު ކޮށްފައެވެ.
މޯލްޑިވް ގޭސްގެ އެކްޓިން އެމްޑީ ގެ މަގާމުން އިކްރާމް ސަސްޕެންޑު ކޮށްފައިވާ ކަމަށް ބުނެ ދެކެވޭ ވާހަކަތަކާ ގުޅޭގޮތުން "ދެން" އަށް މައުލޫމާތު ދެއްވަމުން އިކްރާމް ވިދާޅުވީ، އޭނާ ސަސްޕެންޑު ކޮށްފައި ނުވާ ކަމަށެވެ.
"އަޅުގަނޑު ސަސްޕެންޑެއް ނުކުރޭ، އެއީ ޔަގީންކަމެއް. އަޅުގަނޑަށް ޖީއެމްކަން ދިން ގޮތާ ގުޅޭގޮތުން އޮފީހުގެ ދެ މީހެއްގެ މެދުގައި ކަންބޮޑުވުން ހުރި ވަރަށް ބޮޑަށް. އެއީ މައިގަނޑު މައްސަލައަކީ. އެކަމާ ގުޅިގެން އަޅުގަނޑޭ ކިޔައިގެން ޗެޓްލޮގެއް ހުށަހަޅައިގެން އުޅެނީ" އިކުރާމް ވިދާޅުވިއެވެ.
މީގެ އިތުރުން އިކުރާމް ވިދާޅުވީ މިފަދަ ހަގީގަތާއި ޚިލާފު ޚަބަރު ފަތުރައިގެން އަޅާނެ އެއްވެސް ފިޔަވަޅެއް ނެތް ކަމަށެވެ.
އިކުރާމާ ބެހޭ ގޮތުން މައްސަލައެއް ބަލަމުންދާ ކަމަށާއި އަންހެން މުވައްޒަފަކަށް ޖިންސީ ފުރައްސާރަ ކުރިކަމުގެ ތުހުމަތެއް ވެސް ކޮށްފައިވާތީ އެކަމާމެދު އޭނާ ވިދާޅުވީ މައްސަލައެއް ހުށަހެޅިއްޔާ ބަލަން ވާނެ ކަމަށެވެ.
"މައްސަލައެއް ހުށަހެޅިއްޔާ ބަލަންވާނެ. އެކަމަކު ޗެޓް ލޮގަކީ ކޮންމެ ބަޔަކަށް ވެސް އުފެއްދި ދާނެ އެއްޗެއް. އެމީހަކު ބޭނުން ތުހުމަތެއް ކުރެވިދާނެ. އެކަމުގައި އަޅުގަނޑު ކުރާނެ ކަމެއް ނެތް" އިކުރާމް ވިދާޅުވިއެވެ.
