ސަސްޕެންޑެއް ނުކުރޭ، އެކަމަކު ޤާނޫނުގައި ބުނެފައިވާ ގޮތަށް މިހުރީ ގޭގައި މަޑުކޮށްގެން :އިކްރާމް
މޯލްޑިވް ގޭސްގެ އެކްޓިން މެނޭޖިން ޑިރެކްޓަރ ޢަލީ އިކްރާމް ގެ މައްޗަށް އުފުލާފައިވާ ޖިންސީ ފުރައްސާރައިގެ މައްސަލައިގައި އޭނާ ސަސްޕެންޑު ކޮށްފައިވާ ކަމަށް ދެކެވޭ ބުނެ ދެކެވެމުންދާ ވާހަކަ، އިކްރާމް ދޮގު ކުރައްވައިފިއެވެ.
"ދެން" އިން ކުރި ސުވާލަކަށް ޖަވާބު ދެއްވަމުން އިކުރާމް ވިދާޅުވީ އެމައްސަލައާ ގުޅިގެން ސަސްޕެންޑު ކޮށްފައިނުވާ ކަމަށާއި އެހެން ނަމަވެސް ޤާނޫނުގައި ބުނާ ގޮތަށް ގޭގައި މަޑުކޮށްގެން ހުރި ކަމަށެވެ.
"ސަސްޕެންޑެއް ނޫން ކުރީ. ޤާނޫނު ބުނޭ އެކަހަލަ ކަމެއް މިވަރު މަޤާމެއްގައި ހުއްޓާ ހުށަހެޅިއްޖިއްޔާ ގޭގައި މަޑުކުރަން ޖެހޭނެ ކަމަށް. އެހެންވެ 14 ދުވަސް ވަންދެން އަޅުގަނޑަށް ގޭގައި މަޑުކުރަންޖެހޭ. އެއީ ލީގަލްއިން މައްސަލަ ބަލާ ނިމެންދެން" އިކުރާމް ވިދާޅުވިއެވެ.
އެނގިފައިވާ ގޮތުގައި އިކުރާމްގެ މައްސަލަ އެކުންފުނީގެ ބޯޑަށް ހުށަހެޅީ ހެއްކެއްގެ ގޮތުން އަންހެން މުވައްޒަފަށް އޭނާ ފޮނުއްވި ބައެއް މެސެޖްތަކާ އެކުގައެވެ.
އެމެސެޖުތަކާ ގުޅޭގޮތުން ރޭގައި އިކުރާމް ވިދާޅުވެފައި ވަނީ މައްސަލައެއް ހުށަހަޅައިފިނަމަ އެކަން ބަލަންވާނެ ކަމަށާއި ނަމަވެސް "ޗެޓްލޮގް" އަކީ ކޮންމެ ބަޔަކަށް ވެސް އުފެއްދިދާނެ އެއްޗެހި ކަމަށެވެ.
މަސްއޫލިއްޔަތުތަކުން އިކްރާމް ދުރުކޮށް ކުންފުނި ހިންގުން ބޯޑުން ހަވާލުކޮށްފައިވަނީ ޗީފް ފައިނޭންޝަލް އޮފިސަރު އަހްމަދު ސަލީމްއާ އެވެ.
Ads by STO
