ލަންދޫ ފަޅުތެރޭގައި މުށިމަސް ތިޔާގި، ކުދިބޮޑު އެންމެން މަސް ބާނަން ނުކުމެ ފެންނަނީ އެއްބައިވަންތަކަން!
ނ.ލަންދޫ ފަޅުތެރޭގައި މުށިމަހުގެ އާއިލާގެ ވައްތަރެއް ކަމަށްވާ "ކުންބަޅަ" ތިޔާގިވެ، އެރަށު ކުދިބޮޑު އެންމެން މަސް ބާނަން ނުކުންނަން ފަށައިފިއެވެ.
ލަންދޫ ކައުންސިލް މެންބަރު އާރިފް "ދެން"އާ ވާހަކަ ދައްކަމުން ވިދާޅުވީ، އެރަށުގެ ފަޅު ތެރެއަށް ދޭތެރެ ދޭތެރެއިން މުށިމަސް ވަންނަ ކަމަށެވެ. އަދި މިފަހަރު މުށިމަަސް ފަޅު ތެރެއަށް ވަނީ ވަރަށް ގިނަ ދުވަސްތަކެއް ވަންދެން މުށިމަސް ފަޅަށް ނުވަދެ އޮތުމަށް ފަހުގައި ކަމަށާއި މުށިމަސް ވަދެގެން އުޅޭތާ މިހާރު ގާތްގަނޑަކަށް ހަތަރު ފަސް ދުވަހެއް ވަރު ވެދާނެ ކަމަށް އާރިފް ވިދާޅުވިއެވެ.
މަސް ބާނަން ގޮސް އުޅޭ ކޮންމެ މީހަކު ވެސް މަދުވެގެން ގާތްގަނޑަކަށް ފަންސާހަށްވުރެ ގިނަ މަސް ބާނާ ކަމަށާއި ބައެއް މީހުން ސަތޭކައަށްވުރެ ގިނަ މަސް ބާނައިގެން ވެސް ދާ ކަމަށް އާރިފް މައުލޫމާތު ދިނެވެ. އަދި އެންމެ ރަނގަޅަށް މަސް ބޭނޭ ވަގުތުތަކަކީ ފަތިހު އިރުއަރައިގެން އަންނަ ވަގުތާއި އިރުއޮއްސޭ ވަގުތުކަމަށް ވެސް އާރިފް ވިދާޅުވިއެވެ.
"މިއީ ވަރަށް ފޯރީގައި ކުރެވެމުންދާ ކަމެއް، ދަރިން ގޮވައިގެން ގޮސް ވެސް ކުރަން ވަރަށް ސަޅި ކަމެއް މިއީ"
އެންމެ މަދުވެގެން ވެސް ހަވީރުގެ ވަގުތުގައި ތިރީހަށްވުރެ ގިނަ މީހުން ބަނދަރު ސަރަހައްދަށް މަސް ބާނަން ދާނެ ކަމަށާއި އޭގެން ކޮންމެ މީހަކު ވެެސް ފަންސާހުން މަތީ އަދަދަކަށް މަސް ބާނާ ކަމަށް އާރިފް މައުލޫމާތު ދިނެވެ.
ލަންދޫގެ ބައެއް ފަރާތްތަކުން މީސްމީޑިއާގައި ހިއްސާކޮށްފައިވާ ފޮޓޯތަކުން ވެސް ފެންނަނީ ހިތްގައިމު މަންޒަރެކެވެ. ކަކޫތާފެނަށް އެރި ތިބެ އެއްބަޔަކު މަސްބާނާއިރު އަނެއްބަޔަކު ތޮށިގަނޑުމަތީގައި ތިބެގެން މަސް ބާނާތަން ވެސް ފެނެއެވެ. ދިވެހީންގެ ޗާލު ދިރިއުޅުމަކީ މިއީ ކަން ގައިމެވެ.
