ސްޓޫޑެންޓް ލޯނުތަކުގެ އަދަދު އިތުރުކޮށް، މިއަންނަ ހަފްތާގައި ހުޅުވާލަނީ
ލޯނުތަކުގެ އަދަދު އިތުރުކޮށް، މިއަންނަ ހަފްތާގައި ހުޅުވިގެން ދާނެ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވެފައި ވަނީ ރައްޔިތުންގެ މަޖިލީހުގެ 2021 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާގެ ރިޔާސީ ބަޔާން އިއްވަވަމުންނެވެ. ރައީސް ވިދާޅުވީ މަތީ ތައުލީމާއި ތަމްރީނަށް ލޯނުގެ ފުރުސަތު އިތުރުކޮށް މިއަންނަ ހަފްތާގައި ލޯނަށް ކުރިމަތިލުމަށް ހުޅުވިގެން ދާނެ ކަމަށެވެ.
ރައީސް ވިދާޅުވީ ޑިގްރީއަށް ހިލޭ ކިޔަވައިދިނުމުގެ ޕްރޮގްރާމްގެ ދަށުން، މިހާތަނަށް 9430 ކުދިންނަށް މަތީ ތައުލީމުގެ ފުރުސަތު ވާނީ ފަހިކޮށްދީފައި ކަމަށެވެ. އަދި މިދިޔަ އަހަރުގެ ތެރޭގައި ވެސް، މަތީ ތައުލީމާއި ތަމްރީނަށް 550 ލޯނުގެ ފުރުސަތު ހުޅުވައިލެވުނު ކަމަށާއި އަދި މިހާރު ވާނީ އެ ޢަދަދު 770 އަށް އިތުރު ކޮށްފައި ކަމަށް ވެސް ރައީސް ވިދާޅުވިއެވެ.
މީގެ އިތުރުން ލޯނުތަކުގެ އަދަދު އިތުރު ކުރުމަކީ ޒުވާނުން ބިނާކުރުމުގަޔާއި، ގައުމު އާރާސްތު ކުރުމުގައި ބައިވެރިވުމުގެ ހަމަހަމަ ފުރުސަތު ފަހިކޮށްދިނުމުގެ ގޮތުން ނިންމި ނިންމުމެއް ކަމަށް ފާހަގަ ކުރައްވަމުން ރައީސް ވިދާޅުވީ މި ފުރުސަތުތަކަކީ އިގްތިސާދު އާރާސްތު ކުރުމަށްޓަކައި، ރާއްޖޭގެ ވަޒީފާގެ ބާޒާރަށް މީހުން ބިނާކުރަން ބޭނުންވާ ދާއިރާތަކުން ތައުލީމާއި ތަމްރީނު ދިނުމަށް އިސްކަންދީގެން ހުޅުވައިލާ ފުރުސަތުތަކެއް ކަމަށެވެ.
ރައީސް ވިދާޅުވީ ގައުމު ކުރިއަރުވައި ތަރައްގީ ކުރަން ތަރައްގީގެ ވިސްނުން ހުރި ޒުވާން ޖީލެއް ބިނާ ކުރުމަކީ މި ސަރުކާރުގެ ސިޔާސަތު ކަމަށެވެ. އެގޮތުން އެމަނިކުފާނު ވެރިކަމަށް ވަޑައިގެން ހިލޭ ފުރަތަމަ ޑިގްރީއަށް ކިޔަވައި ދޭން ފެށުމަކީ އެފަދަ ޖީލެއްް ބިނާ ކުުރަން ކުރެވުނު މުހިންމު އިންވެސްޓެއް ކަމަށެވެ.
Ads by STO
