އަބަދު ކަރުހިއްކާފައި ހުންނަނީ ތަ؟ ސަބަބަކީ މިއީ ކަމުގައި ވެދާނެ
ބައެއް ފަހަރަށް މުޅި ދުވަހު ކަރުހިއްކާފައި ހުންނަ ދުވަސްތައް ވެސް އާދެެއެވެ. އެ ދުވަސްތަކުގައި ވަރުބަލިވާ ފަދަ ކަމެއް ނުކުރިޔަސް ނުވަތަ ފެން ބޮވާ ފަދަ ކަމެއް ނުކުރިޔަސް، އަދި ކިތަންމެ ގިނައިން ފެން ބުއި ކަމުގައި ވިޔަސް އަބަދުވެސް ހުންނާނީ ކަރުހިއްކާފައެވެ. އަދި ކިތަންމެ މަސައްކަތެއް ކުރި ކަމުގައި ވިޔަސް އެ ކަރުހިއްކުން ފިލުވައިލުމަކީ ވަރަށް އުނދަގޫ ކަމެކެވެ.
މި ގޮތަށް ކަރު ހިއްކަނީ މި ސަބަބުތަކާ ހެދި ކަމަށް ވެދާނެއެވެ.
އެކަށީގެންވާ ވަރަށް ފެން ނުބޮވުން
ގިނަ ފަހަރަށް މާ ގިނައިން ކަރުހިއްކަނީ އެކަށީގެންވާ ވަރަށް ފެން ނުބޮވޭތީއެވެ. އަދި ދުވާލެއްގެ މައްޗަށް 8 ތަށި ފެން ބުއިމަށް އިރުޝާދު ދެވިފައިވީ ނަމަވެސް މިކަން އޮންނަނީ އެކި އުމުރުގެ މީހުންނަށް އެކި ގޮތަށެވެ. ހޫނުގަދަ ދުވަސްތަކުގައި ނުވަތަ ގިނައިން ކަސްރަތު ކުރާ ދުވަސްތަކުގައި ގިނައިން ފެން ބޯން އާދަ ކުރަން ޖެހޭނެއެވެ. އަދި ދުވާލެއްގެ މައްޗަށް އެކަށީގެންވާ ވަރަށް ފެން ބޮވޭކަން ޔަގީން ކުރެވިދާނެ ގޮތަކީ ކުޑަކަމުދާ ތަކެތީގެ ކުލަ އަށް ބެލުމެވެ. އެގޮތުން ކުލަ އަލި ކަމުގައި ވާނަމަ އެއީ ރަނގަޅު ފާލެކެވެ.
ކެއުން ބަަހައްޓާ ގޮތް
ތިބާގެ ކެއުމާއި ބުއިން ބައްޓަން ކޮށްފައި އޮންނަ ގޮތަކުން ވެސް ތިބާ ކަރުހިއްކާފައި ހުރެދާނެއެވެ. ތިބާ ކާ އެއްޗެހީގައި ގިނައިން ހިމެނޭ މާއްދާ އަކީ ކާބޯހައިޑްރޭޓްސް ކަމަށް ވާނަމަ ކަރުހިއްކާ މިންވަރު އިތުރު ކޮށްދެއެވެ. އެހެން ކަމުން އަބަދު ކަރުހިއްކާ ނަމަ ކެއުމުން ދުރުހެލިވާން ޖެހޭ ބައެއް އެއްޗިއްސަކީ މަޔޯނަައިޒް، ޗީޒް އަދި ވިޕްޑް ކްރީމް ފަދަ ތަކެއްޗެވެ.
ހަކުރު ބަލި
އަބަދު ކަރު ހިއްކާފައި ހުރުމަކީ އަދި ގިނަގިނައިން ކުޑަކަމު ދެވުމަކީ ހަކުރުބަލީގެ އާންމު އަލާމާތްތަކުގެ ތެރޭގައި ހިމެނޭ ދެކަމެވެ. މިކަން މިގޮތަށް ދިމާވަނީ ކިޑްނީ ރަނގަޅަށް މަސައްކަތް ނުކުރުމުގެ ސަބަބުން ހަށިގަނޑުގައި ގުލްކޯޒް ލެވެލް އަދި ލޭގައި ހިމެނޭ ހަކުރު ގިނަ ވާތީއެވެ. ހަށިގަނޑުގައި ގުލްކޯޒް އިތުރުވުމަކީ ހަަށިގަނޑުން ފެން މަދު ކޮށްދޭ ކަމެކެވެ. އޭގެ ސަބަބުން ގިނަގިނައިން ކަރުހިއްކުމަށް މަގުފަހި ކޮށްދެއެވެ.
ބޭސް
އަބަދު ކަރުހިއްކާފައި ހުރުމަކީ ތިބާ ބޭނުންކުރާ ބޭހެއްގެ ސަބަބުން ވާ ކަމެއް ކަމުގައި ވެސް ވެދާނެއެވެ. އެގޮތުން، ގިނަ ވައްތަރުތަކެއްގެ ބޭހަކީ އެ ބޭހެއް ކެއުމުން ކަރުހިއްކުން އިތުރު ކޮށްދޭ ބޭސްތަކެވެ. މީގެ ތެރޭގައި އެލާޖީ ބޭސްތަކާއި، ޑިޕްރެޝަނަށް ކާ ބޭސްތަކާއި ލޭ ދަށް ކުރުމަށް ކާ ބޭސްތައް ވެސް ހިމެނެއެވެ.
