ވެކްސިން ޖެހުމުގެ މުހިންމުކަމުގެ މައްޗަށް ހުތުބާގައި އަލިއަޅުވާލައިފި
ﷲތަޢާލާ އިންސާނާއަށް ދެއްވާފައިވާ މަތިވެރި ނިއުމަތްތަކުގެ ތެރެއިން ގިނަ ބަޔަކު ޣާފިލްވާ އެއް ނިއުމަތަކީ ދުޅަހެޔޮ ސިއްހަތެވެ. ދުޅަހެޔޮ ސިއްހަތެއްގެ މުހިންމު ކަން ކޮންމެ މީހަކަށް ވެސް ގިނަފަހަރަށް އެނގޭނީ ބަލިވުމުންނެވެ. ނަމަވެސް ބަލިވުމުގެ ކުރިން ދުޅަހެޔޮ ސިއްހަތުގެ ބޭނުން ހެޔޮ ގޮތުގައި ހިފުމަށް ދީނުގައި އަންގަވާފައި ވެއެވެ. އަދި ބަލިވެއްޖެ ނަމަ ބޭސް ފަރުވާ ކުރުމަށާއި ބަލިން ރަނގަޅުވެ، ފުރިހަމަ ސިއްހަތެއްގައި ތިބުމަށް ސަބަބުތަކުގައި ހިފުމަށް ވެސް ދީނުގައި އަންގަވާފައި ވެއެވެ.
މިއަދުގެ ހުކުރު ހުތުބާގައި އަލިއަޅުވާލައިފައިވާ މައުޟޫއު އަކީ "ފުރިހަމަ ސިއްހަތަކަށްޓަކައި ސަބަބުތަކުގައި ހިފުން" މިއެވެ.
ހުތުބާގައި ބުނެފައި ވަނީ ސިއްހަތާއި ދުޅަހެޔޮކަމަކީ ހަޔާތުގެ މައިކަށި ކަމަށެވެ. އަދި ގައުމުތައް ތަރައްގީވެ ކުރިއަރައިފައިވަނީ އެގައުމުތަކުގެ ރައްޔިތުންގެ ދުޅަހެޔޮކަމާއި މަސައްކަތްތެރިކަމުން ކަމަށާއި އަދި ގައިބާރާއި އަޒުމް ވަރުގަދަކަމުން ކަމަށެވެ. އަދި ކިޔަމަންތެރި ކަމާއި ވަފާތެރިކަމުން ކަމަށެވެ. މީގެ އިތުރުން، ދުނިޔޭގެ އަރާމާއި ފާގަތިކަމުގެ ރަހައާއި މީރުކަން، ބަލިމަޑުކަމާއި ރަހުމުކުޑަ ވަބާތަކުގެ ހިޔާވަހިކަމުގެ ތެރޭގައި ނުލިބޭނެ ކަމަށް ވެސް ހުތުބާގައި ފާހަގަ ކޮށްފައިވެއެވެ.
މީގެ އިތުރުން، އިސްލާމްދީނުގައި އާއްމު ސިއްހަތަށް ބޮޑު އަހައްމިއްޔަތެއް ދީފައިވާ ކަމަށާއި، އޭގެ އަސާސަކީ ސާފުތާހިރުކަން ކަމުގައި ވެސް ހުތުބާގައި ބަޔާން ކޮށްފައިވެއެވެ. އަދި އާންމު ސިއްހަތު ރައްކާތެރި ކުރުުމަށްޓަކައި އުޞޫލުތަކެއް ކަނޑައަޅުއްވާފައިވާ ކަމަށާއި އެގޮތުން އިންސާނާއަށް ގެއްލުން ލިބޭ އެއްޗެހި ކެއުމާއި ބުއިން ހަރާމް ކުރައްވާފައިވާ ކަމަށް ހުތުބާގައި ބުނެފައިވެއެވެ. އަދި ދިރިއުޅޭ ތަން ސާފުތާހިރުކޮށް ބޭއްވުމަށް އަންގަވާފައިވާ ކަމަށާއި ފާހިޝް އަމަލުތަކަށް އަރައިނުގަތުމަށް އަމުރު ކުރައްވާފައިވާ ކަމަށް ވެސް ހުތުބާގައި ފާހަގަ ކޮށްފައިވެއެވެ.
އިސްލާމްދީނުގައި ފަރުދުންގެ ހައްްޤުތައް ރައްކާތެރިކޮށްދޭ ފަދައިން ޖަމާޢަތުގެ ހައްޤުތައް ވެސް ރައްކާތެރި ކޮށްދޭ ކަމަށް ހުތުބާގައި ބުނެފައިވެއެވެ. އެގޮތުން އެ ހައްގުތަކަށް އިހްތިރާމް ކުރުމަށް ދީން ގޮވާލާ ކަމަށް ހުތުބާގައި ބުނެފައިވެއެވެ. ނުހިނގާ ފެންގަނޑުތަކަށް ގަޟާހާޖާތް ނުކުރުމަށާއި އެފަދަ ތަންތަނަށް ނަޖިސްފަދަ ހަޑިމުޑުދާރު އެއްޗެހި އުކާނުލުމަށް އިސްލާމްދީން އަމުރުކުރާ ކަމަށް ހުތުބާގައި އިތުރަށް ބުނެފައިވެއެވެ.
"ސާފުތާހިރުކަމަކީ އިޖްތިމާއީ އެހެން އަގުތައް ފަދަ އަގެކެވެ. ސުލޫކެކެވެ. ފައިސާ އާއި ތަނަވަސްކަމެއް ނެތޭ ބުނެފައި ސާފުތާހިރުކަމާ ދުރަށް ދެވޭކަށް ނެތެވެ. އަޅުގަނޑުމެންގެ ތެރެއިން ކޮންމެ މީހަކު އެމީހެއްގެ މަސްއޫލިއްޔަތު މި ކަމުގައި އަދާކޮށްފި ނަމަ އަޅުގަނޑުމެންގެ ރަށްތައް ރީތި ސާފުތާހިރު ރަށްތަކަކަށް ވެގެން ދާނެއެވެ" ހުތުބާގައި އިތުރަށް ބުނެފައި ވެއެވެ.
މީގެ އިތުރުން، ބޮޑު މުޞީބާތެއް ނުވަތަ ބަލިމަޑުކަމެއް ޖެހުމުން މުސްލިމް އަޅާ އަމަލުކުރަންވީ ގޮތާއި ޝަރުއީ ހަމަތައް ދެނެގަތުމަކީ މުހިންމު ކަމެއް ކަމަށާއި އަދި ކެތްތެރިކަމާއެކު އަމަލުތައް ބެހެއްޓުމުން މުސްލިމުންނަށް ހުރި މަތިވެރި ޘަވާބާއި ދަރުމައިގެ އުފާވެރިކަން ވެސް ހިތްމައްޗަށް ގެންނަން ޖެހޭ ކަމަށް ހުތުބާގައި ބުނެފައިވެއެވެ.
ހަމަ އެހެންމެ، އަޅުގަނޑުމެންގެ ދީން ގޮވައިލަނީ ބަލިވެއްޖެނަމަ ބޭސްފަރުވާ ކުރުމަށް ކަމަށާއި އެއީ ވާޖިބެއް ކަމަށް ހުތުބާގައި ވަނީ ފާހަގަ ކޮށްފައެވެ. އެގޮތުން ބޭސްފަރުވާ ކުުރުންފަދަ ދިރިއުޅުމުގެ ހުރިހާކަމެއްގައި ﷲތައާލާއަށް ބަރޯސާވުމަށް ވެސް ހުތުބާގައި ވަނީ ނަސޭހަތްތެރިވެފައެވެ.
މިއަދުގެ ހުތުބާގައި ވަނީ ކޮވިޑް-19ގެ ހާލަތަށް ވެސް އަލިއަޅުވާލާފައެވެ. އެގޮތުން ކޮވިޑް-19ގެ ހާލަތު އިތުރަށް ގޯސްވަމުން ދާ ކަމަށާއި ބަލިޖެހޭ މީހުންގެ އަދަދު ދުވަހަކަށްވުރެ ދުވަހެއް މަތިވަމުން ދާ ކަމުގައި ހުތުބާގައި ފާހަގަ ކޮށްފައިވެއެވެ. އަދި މިއީ ކުޑަކަމެއް ނޫން ކަމަށާއި ފަރުވާ ކުޑަ ކޮށްގެން ފަރުޖެއްސެން އޮތް ކަމެއް ނޫން ކަމަށް ވެސް ހުތުބާގައި ބުނެފައިވެއެވެ.
މިކަމުން އަރައިގަތުމަށް ގިނަގިނައިން އަތްދޮވުމާއި ގައިދުރުކަން ބެހެއްޓުމާއި، ތަންތަނަށް އެއްވެ ނޫޅުން ފަދަ، ކަމާބެހޭ ފަރާތްތަކުން އަންގާ އެންމެހާ އިރުޝާދުތަކަށް އިހްތިރާމް ކުރަން ޖެހޭ ކަމަށް ހުތުބާގައި ބުނެފައިވެއެވެ.
އިސްލާމްދީން ގޮވައިލަނީ ތިމާ ބަލިތަކުން ރައްކާތެރިވެ އަނެކުން ވެސް ބަލިތަކުން ރައްކާތެރި ކުރުމަަށް ކަމަަށް ޚުތުބާގައި އިތުރަށް ބުންޏެވެ. އެހެންކަމުން ވެކްސިން ދިނުމަކީ މިކަމުން މުޅި މުޖުތަމައު ސަލާމަތް ކުރުމަށްޓަކައި އޮތް ސަބަބެއް ކަމުގައި ސިއްހީ މާހިރުން ލަފާ ގެންދަވަމުންދާ ކަމަށާއި، ގައުމީ ފެންވަރުގައި ފަށާފައިވާ ވެކްސިން ދިނުމުގެ "ދިފާއު" ޕްރޮގްރާމް ފުރިހަމަ ކުރުމަށް ޑޮކްޓަރުންނާއި، ކަމާބެހޭ އިދާރާތަކުން ބާރުއަޅާ ކަމަށް ވެސް ހުތުބާގައި ބުނެފައިވެއެވެ.
