ވެކްސިން ޖަހާ މީހުންގެ އަތުގައި ރަތް ފިތްގަނޑެއް ނަގަނީ، ޑޮކްޓަރުން ވިދާޅުވަނީ ހާސްވާން ޖެހޭ ކަމެއް ނޫން ކަމަށް
މޮޑާނާ ވެކްސިން ޖަހާ ބައެއް ފަރާތްތަކުގެ އަތުގައި ރަތް ފިއްގަނޑެއް ނަގާ މައްސަލައެއް ފެންމަތިވެއްޖެއެވެ.
ވެކްސިން ޖަހާތާ 10 ވަރަކަށް ދުވަސްފަހުން ފެންނަ މި އަލާމާތަކީ އެއްވެސް ގޮތަކަށް ހާސްވާން ޖެހޭ ކަމެއް ނޫން ކަމަށް ކަމުގެ ތަޖުރިބާ ކާރުން ހާމަ ކުރެއެވެ. އެމެރިކާގެ މަޝްހޫރު ހަމުގެ ޑަކްޓަރެއް ކަމަށްވާ ޑރ.އެތާ ފްރީމޭން ވިދާޅުވެފައި ވަނީ މިފަދަ 14 ވަރަކަށް ކޭސް ރިޕޯޓްކޮށްފައިވާ ކަމަށާއި ނަމަވެސް މިއީ ހާސްވެ ކަންބޮޑުވާން ޖެހޭވަރުގެ ކަމެއް ނޫން ކަމަށެވެ.
"މިހާތަނަށް މިގޮތަށް ދިމާވެފައިވަނީ، ހަމައެކަނި މޮޑާނާ ވެކްސިން ޖެހި ފަރާތްތަކަށް. އިތުރު ވެކްސިން ޖެހި ފަރާތްތަކަށް މިމައްސަލަ ދިމާވެފައިވާ ކަމަށް އަދި ރިޕޯޓެއް ނުކުރޭ. އެއްވެސް ހާލެއްގައި މިގޮތަށް ދިމާވުމަކީ ދެވަނަ ޑޯޒް ޖަހަން ފަސް ޖެހެންވީ ސަބަބެއް ނޫން." ފްރީމޭން ވިދާޅުވިއެވެ.
ފްރީމޭން ވިދާޅުވީ، މިގޮތަށް ބައެއް އިތުރު ވެކްސިން ޖެހުމުންވެސް ދިމާވާ ކަމަށާއި މިގޮތުން ޗިކަންޕޮކްސް އަދި އެމްއެމްއާރ ވެކްސިން ޖެހުމުންވެސް މިގޮތަށް ފިއްގަނޑު ނަގާ ކަމަށެވެ. އަދި މިކަމަށް ކިޔަނީ ޑިލޭޑް ކަޓްނިއަސް ހައިޕަސެންސިޓިވީޓީ (delayed cutaneous hypersensitivity) ކަމަށާއި މިއީ ހަށިގަނޑުގެ ދިފާއީ ނިޒާމުން ކުރާ ކަމެއް ޑޮކްޓަރު ވިދާޅުވިއެވެ.
މިގޮތަށް ފިއްގަނޑު ނަގަނީ އިންޖެކްޝަން ޖަހާ ތަނުގައެވެ. އަދި ދެތިން ހަފްތާގެ ތެރޭގައި މި ފިއްގަނޑު ދެއެވެ. ނަމަވެސް ފިއްގަނޑު ހުންނަ ދުވަސް ދުވަހު ވަރަށް ބޮޑަށް ތަދުވާ ކަމަށާއި އެސަރަހައްދު ރިހޭ ކަމަށް، މިކަން ތަޖުރިބާ ކުރި ފަރާތްތަކުން ބުނެއެވެ. މިގޮތަށް ދިމާވާ ފަރާތްތަކުން ޑޮކްޓަރަށް ގޮސް، ތަދު ކަނޑުވަން ބޭސް ކެއުމަށް އިރުޝާދުދެއެވެ. އަދި ދެވަނަ ޑޯޒްގެ ވެކްސިން ޖެހުމަށް އެފަރާތްތަކުން ބާރު އަޅައެވެ.
