ކަރަންޓީނުވާ މީހުން ވޯޓުލުމަށް ބަހައްޓަން ޖެހެނީ ވަކި ފޮށިތަކެއް
ކޮވިޑް-19 އަށް ފައްސިވެގެން އެކަހެރިކޮށްފައި ތިބި މީހުންނާއި އެ މީހުންގެ ކޮންޓެކްޓުންނާއި އަލާމާތް ހުންނަ މީހުން، މިއަހަރު ބޭއްވޭ ލޯކަލް ކައުންސިލު އިންތިހާބާއި އަންހެނުންގެ ތަރައްޤީގެ ކޮމިޓީތަކުގެ އިންތިހާބަށް ވޯޓުލުމަށް ވަކި ތަނެއް ނުވަތަ ވޯޓުލާން އައުމަށް ވަކި ތަނެއް ހަމަޖެއްސިދާނެ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިއުލާނު ކުރި އުސޫލުގައި ބަޔާންކޮށްފިއެވެ.
ކޮވިޑް-19 ގެ ބަލިމަޑުކަމުގެ ސަބަބުން ދިރިއުޅެން ޖެހިފައިވާ އާ އާންމު ހާލަތުގައި އިންތިޚާބު ބާއްވާނެ އުސޫލުތައް ހިމެނޭ އެ އުސޫލުގައިވާ ގޮތުން އެކަހެރިކޮށްފައި ތިބި މީހުންނަށް އެ މީހުން ތިބި ރަށެއްގައި ވޯޓު ލެވޭނެ ގޮތް ހަމަޖައްސަން ޖެހޭނެއެވެ.
މި އުސޫލަކީ މި ބަލިމަޑުކަމުގެ ހާލަތު ކުރިމަތިވުމުގެ ސަބަބުން ރައްޔިތުންގެ މަޖިލީހުން އެކުލަވާލި ކައުންސިލް އިންތިޚާބުގެ ޚާއްސަ ގާނޫނުގެ ދަށުން އެޗްޕީއޭއިން އެކުލަވާލި އުސޫލެކެވެ.
މިއުސޫލުގައި އިންތިހާބަށް ތައްޔާރުވުމުގައާއި އިންތިހާބު ބޭއްވުމުގައި ސަމާލުކަން ދޭންވީ ކަންކަމާއި ވޯޓުލާ މަރުކަޒުތަކުގައި ރައްކާތެރިކަމުގެ ގޮތުން އަޅަން ޖެހޭ ފިޔަވަޅުތައް ހިމަނާފައިވެއެވެ.
އެގޮތުން ވޯޓުލާ މަރުކަޒުތަކުގައި ސެނިޓައިޒާ ބެހެއްޓުމާއި، ވޯޓުލާ ކިއޫގެ ގައިދުރުކަން ކަށަވަރު ކުރަން ސުޕަވައިޒަރުން ބޭތިއްބުމާއި ، ކުޑަދޮރުތައް ހުޅުވާފައިި ބެހެއްޓުމާއި، ގޮނޑިތައް ދުރުދުރުގައި ބެހެއްޓުމާއި، އޮފިޝަލުންގެ ކޮންޓެކްޓްވާ މީހުން މަދު ކުރުމުގެ ގޮތުން އޮފިޝަލުންގެ ކުދި ގްރޫޕްތަކެއް ކަނޑައެޅުމާއި، އިންތިޚާބުގެ މަސައްކަތް ހުއްޓި ނުދާނެހެން ބެކްއަޕް އޮފިޝަލުންގެ ޓީމެއް ހަމަޖައްސާފައި އޮތުމަށް ވެސް އުސޫލުގައިވެއެވެ.
