އެމްޓީސީސީގެ މުވައްޒަފުންގެ ފުލެޓް އިމާރާތްކޮށްދޭނެ ބަޔަކު ހޯދަނީ
ހުޅުމާލޭ ދެވަނަ ފިޔަވަހީގައި އެމްޓީސީސީގެ މުވައްޒަފުންނަށް 25 ބުރީގެ އެޕާޓްމަންޓް ކޮމްޕްލެކްސްއެއް ތަރައްގީކޮށްދޭނެ ފަރާތެއް ހޯދުމަށް އެ ކުންފުނިން އިއުލާންކޮށްފިއެވެ.

ހުޅުމާލޭ ދެވަނަ ފިޔަވަހީގައި އެމްޓީސީސީގެ މުވައްޒަފުންނަށް ހާއްސަކޮށްގެން 25 ބުރީގެ އެޕާޓްމަންޓް ކޮމްޕްލެކްސްއެއް ފަރުމާކޮށް، ފައިނޭންސްކޮށް އަދި އިމާރާތްކޮށްދޭނެ ފަރާތެއް ހޯދުމަށް ޝައުގުވެރިކަން ފާޅުކުރުމުގެ ފުރުސަތު (އީއޯއައި) މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީން ހުޅުވާލައިފިއެވެ.
މި މަޝްރޫއު ކުރިއަށް ގެންދިއުމަށް ހަމަޖެހިފައި ވަނީ "ޑިޒައިން-ބިލްޑް-ފައިނޭންސް" އުސޫލުންނެވެ.
މި މަޝްރޫއުގެ ދަށުން ގާތްގަނޑަކަށް 12,015 އަކަފޫޓުގެ ބިމެއްގައި އިމާރާތްކުރާ ކޮމްޕްލެކްސްގެ ގްރައުންޑް ފްލޯ އާއި ފުރަތަމަ ފަންގިފިލާ ހާއްސަކުރާނީ ވިޔަފާރި ބޭނުންތަކަށެވެ. އަދި ދެވަނަ ފަންގިފިލާއިން ފެށިގެން 25ވަނަ ފަންގިފިލާއާ ހަމައަށް ހުންނާނީ މުވައްޒަފުންނަށް ހާއްސަ އަގުހެޔޮ ބޯހިޔާވަހިކަމުގެ އެޕާޓްމަންޓްތަކެވެ.
މަޝްރޫއު ހަވާލުކުރާ ފަރާތުން ސައިޓުގެ މާސްޓަރ ޕްލޭނިންގ ހެދުމާއި، އިންޖިނިއަރިންގ މަސައްކަތްތަކުގެ އިތުރުން ފައިނޭންޝަލް މޮޑެލިންގ އާއި އިމާރާތްކުރުމުގެ ހުރިހާ ކަމެއް ޓާންކީ އުސޫލުން ނިންމަން ޖެހޭނެ ކަމަށް އެމްޓީސީސީން ބުނެއެވެ.
ކުރިމަތިލާ ފަރާތްތަކުގެ ޝަރުތުތަކުގެ ތެރޭގައި 10 މިލިއަން ޑޮލަރަށް ވުރެ އަގުބޮޑު މަޝްރޫއުތަކަށް ފައިނޭންސް ހޯދުމުގެ ގާބިލުކަން ހުރުމާއި، ފާއިތުވި 10 އަހަރު ތެރޭގައި މިފަދަ މަދުވެގެން ތިން މަޝްރޫއެއް ނިންމާފައިވާ ތަޖުރިބާކާރު ފަރާތަކަށް ވާންޖެހެއެވެ. މީގެ އިތުރުން ވޭތުވެދިޔަ ތިން އަހަރުގެ އޮޑިޓް ރިޕޯޓާއި، ވިޔަފާރި ރަޖިސްޓްރީ އަދި ޓެކްސް ކްލިއަރެންސް ވެސް ހުށަހަޅަން ޖެހެއެވެ.
މި މަޝްރޫއަށް ޝައުގުވެރިވާ ފަރާތްތަކުން އީއޯއައި ހުށަހެޅުމުގެ އެންމެ ފަހު ތާރީޚަކީ 22 ނޮވެމްބަރު 2026ގެ މެންދުރު 12:00އެވެ. އީއޯއައި ހުށަހަޅަން ޖެހެނީ އެ ކުންފުނީގެ ޓެންޑަރ އީމެއިލް މެދުވެރިކޮށެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.