Monday, 16 November 2026
Advertisement
STO — McCoy (leaderboard)
ޚަބަރު

އެމްއައިބީއިން ޝަރީޢާ ހަމަތަކަށް ފެތޭ އައު ކްރެޑިޓް ކާޑުތަކެއް ތަޢާރަފުކޮށްފި

އެމްއައިބީން ހަތަރު ގިންތިއެއްގެ ކްރެޑިޓް ކާޑު ތަޢާރަފުކޮށްފިއެވެ. މީގެ ތެރޭގައި ހިމެނެނީ ގޯލްޑް، ޕްލެޓިނަމް، ސިގްނަޗަރ އަދި ބިޒްނަސް ކާޑެވެ.

ފޮޓޯ: މޯލްޑިވްސް އިސްލާމިކް ބޭންކް (އެމްއައިބީ)
ފޮޓޯ: މޯލްޑިވްސް އިސްލާމިކް ބޭންކް (އެމްއައިބީ)

މޯލްޑިވްސް އިސްލާމިކް ބޭންކް (އެމްއައިބީ)އިން ޝަރީޢާގެ ހަމަތަކަށް ފުރިހަމައަށް ފެތޭ އައު ކްރެޑިޓް ކާޑުތަކެއް ބާޒާރަށް ނެރެފިއެވެ.

މިއީ ރާއްޖޭގައި އިސްލާމިކް ބޭންކިންގގެ ޚިދުމަތްތަކާއި ފައިސާ ދެއްކުމުގެ ނިޒާމު އިތުރަށް ފުޅާކުރުމަށް އެ ބޭންކުން ކުރަމުންދާ މަސައްކަތުގެ ތެރެއިން ތަޢާރަފުކުރި ކާޑުތަކެކެވެ.

އެ ބޭންކުން އަލަށް ތަޢާރަފުކުރި ކާޑުތައް ޖުމްލަ ހަތަރު ގިންތިއަކަށް ވަނީ ބަހާލާފައެވެ. އެއީ ގޯލްޑް، ޕްލެޓިނަމް، ސިގްނަޗަރ އަދި ބިޒްނަސް ކާޑެވެ. މި ކާޑުތަކަކީ އަމިއްލަ ފަރުދުންނާއި ވިޔަފާރިތަކުގެ މާލީ ބޭނުންތަކަށް ޚާއްޞަކޮށްގެން ފަރުމާކޮށްފައިވާ ކާޑުތަކެކެވެ. ކޮންމެ ކާޑަކަށް ވެސް ކްރެޑިޓް ލިމިޓް ކަނޑައަޅާފައިވަނީ 12,000 ރުފިޔާއާއި 300,000 ރުފިޔާއާ ދެމެދުގައެވެ. ކާޑު ދޫކުރުމުގައި ބަލާނީ އެދޭ ފަރާތުގެ އާމްދަނީއާއި މާލީ ޙާލަތަށެވެ.

ވަކިވަކި ކާޑުތަކުގެ ލިމިޓްތަކަށް ބަލާއިރު، ގޯލްޑް ކާޑަށް 12,000އިން 50,000 ރުފިޔާއާ ދެމެދުގެ ލިމިޓެއް ލިބޭއިރު، ޕްލެޓިނަމް ކާޑަށް 50,000އިން 100,000 ރުފިޔާއާ ދެމެދުގެ ލިމިޓެއް ލިބެއެވެ. ސިގްނަޗަރ ކާޑަށް 100,000އިން 300,000 ރުފިޔާއާ ހަމައަށް ލިމިޓް ދޫކުރާއިރު، ވިޔަފާރިތަކަށް ޚާއްޞަ ބިޒްނަސް ކާޑުގެ ލިމިޓަކީ 100,000އާއި 300,000 ރުފިޔާއާ ދެމެދެވެ.

މީގެ އިތުރުން އަމިއްލަ ފަރުދުންގެ ކާޑުތަކަށް މަހުން މަހަށް ބޭނުންކުރެވޭނެ އެމެރިކާ ޑޮލަރުގެ ވަކި ލިމިޓްތަކެއް ވެސް ވަނީ ކަނޑައަޅާފައެވެ. އެގޮތުން ގޯލްޑް ކާޑަށް 300 ޑޮލަރު، ޕްލެޓިނަމް ކާޑަށް 400 ޑޮލަރު އަދި ސިގްނަޗަރ ކާޑަށް 500 ޑޮލަރުގެ ލިމިޓެއް ލިބޭނެއެވެ. ނަމަވެސް ބިޒްނަސް ކާޑަށް ވަކި ޑޮލަރު ލިމިޓެއް ކަނޑައަޅާފައެއް ނުވެއެވެ.

ކާޑުން ކުރާ ޚަރަދުތަކަށް ފައިސާ ދެއްކުމުގައި ކަސްޓަމަރުންނަށް ލުއި ގޮތްތަކެއް ވަނީ ހަމަޖައްސައިދީފައެވެ. އެގޮތުން މަހުން މަހަށް ދައްކަންޖެހޭ އަދަދުގެ މަދުވެގެން 5 އިންސައްތަ ނުވަތަ މުޅި އަދަދު އެއްކޮށް ދެއްކުމުގެ އިޚްތިޔާރު ކަސްޓަމަރުންނަށް ލިބެއެވެ. ކޮންމެ މަހެއްގެ 10ވަނަ ދުވަހު ކާޑުގެ ސްޓޭޓްމަންޓް ދޫކުރާއިރު، ފައިސާ ދެއްކުމުގެ ސުންގަޑިއަކީ އެ މަހެއްގެ 30ވަނަ ދުވަހެވެ. ފައިސާ ދެއްކުމަށް ފައިސާނެޓް، ފައިސާ މޮބައިލް، އޭޓީއެމް ނުވަތަ ޑައިރެކްޓް ޑެބިޓް ބޭނުންކުރެވޭނެއެވެ.

އެމްއައިބީން ބުނި ގޮތުގައި މި އައު ކްރެޑިޓް ކާޑުތަކަކީ އިސްލާމީ އުޞޫލުތަކާ އެއްގޮތްވާ ގޮތުގެ މަތިން، ކަސްޓަމަރުންގެ ބަދަލުވަމުންދާ މާލީ ބޭނުންތަކަށް އެކަށީގެންވާ ޒަމާނީ ޙައްލުތަކެއް ފޯރުކޮށްދިނުމަށް އެ ބޭންކުން ކުރާ މަސައްކަތުގެ މުހިންމު ފިޔަވަޅެކެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.