މޯލްޑިވިއަންއިން ޕާކިސްތާނަށް ދަތުރުތައް ފަށަން ސޭލްސް އޭޖެންޓެއް ހޯދަނީ

ގައުމީ އެއާލައިން، މޯލްޑިވިއަންއިން ޕާކިސްތާނަށް ދަތުރުތައް ފަށަން ސޭލްސް އޭޖެންޓެއް ހޯދަން އިއުލާންކޮށްފިއެވެ.
މޯލްޑިވިއަން ހިންގާ އައިލެންޑް އޭވިއޭޝަންއިން މިއަދު ކުރި އިއުލާނެއްގައި ބުނީ ސޭލްސް އެޖެންޓަކަށް ވުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމުގެ ފުރުސަތު މި މަހުގެ 29އާ ހަމައަށް ހުޅުވާލައިފައިވާ ކަމަށެވެ.
މޯލްޑިވިއަންގެ ދަތުރުތައް ޕާކިސްތާނަށް ފަށަން ނިންމައި، އެކަން ރައީސް ޑރ. މުހައްމަދު މުއިއްޒު ދާދި ފަހުން ޕާކިސްތާނަށް ކުރެއްވި ރަސްމީ ދަތުރުފުޅުގެ ތެރެއިން އިސްލާމްއާބާދުގައި ބޭއްވި މޯލްޑިވްސް-ޕާކިސްތާން ބިޒްނަސް ފޯރަމް 2026ގައި ތަގުރީރުކުރައްވަމުންނެވެ.
އެގޮތުން ޕާކިސްތާނާ އެކު ވިޔަފާރިއާއި ދަތުރުފަތުރު އިތުރަށް ފުޅާކުރުމަށްޓަކައި، ރާއްޖޭގެ ގައުމީ އެއާލައިން، މޯލްޑިވިއަން މެދުވެރިކޮށް މާލެއާއި، ޕާކިސްތާނުގެ ކަރާޗީއާ ދެމެދު ވަރަށް އަވަހަށް ސީދާ ދަތުރުތައް ފެށުމަށް އަމާޒުހިފާފައިވާކަން ވެސް އެމަނިކުފާނު އިއުލާންކުރެއްވިއެވެ.
މީގެ ކުރިން ވެސް ޕާކިސްތާނުން ރާއްޖެއަށް ސީދާ ދަތުރުތައް ފެށުމަށް މަޝްވަރާތައް ކޮށްފައިވެއެވެ. ނަމަވެސް އޭގެ އަމަލީ ސިފައެއް ނުފެނެއެވެ. ރާއްޖެއާ ޕާކިސްތާނާ ދެމެދު ސީދާ ދަތުރުތައް ނޯންނާތީ ދެ ގައުމުގެ ދެމެދު ދަތުރުތައް އާންމުކޮށް ކުރަނީ ދުބާއީ ނޫނީ ލަންކާގައި ޓްރާންސިޓް ކުރުމަށް ފަހުއެވެ.
ޕާކިސްތާނުގެ ޑޮކްޓަރުންނާއި ޓީޗަރުން ވެސް ރާއްޖޭގައި މަސައްކަތް ކުރާއިރު ބައެއް ދިވެހި ދަރިވަރުން ވެސް ޕާކިސްތާނުގައި ކިޔަވަން ތިބެއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.