މާފަރާއި ފޮއްދޫގައި ފުލުހުންގެ މަރުކަޒު ހުޅުވައި ޚިދުމަތްދޭން ފަށައިފި
.jpeg)
ރަށްރަށުގައި ދެމުންދާ ފުލުހުންގެ ހިދުމަތް އިތުރަށް ހަރުދަނާކޮށް، ރައްޔިތުންނާ ގާތުން ފަސޭހަކަމާ އެކު ހިދުމަތް ފޯރުކޮށްދިނުމާއި މުޖުތަމައުގެ އަމާންކަމާއި ރައްކާތެރިކަން ކަށަވަރުކުރުމުގެ މަގުސަދުގައި، ނ. މާފަރާއި ފޮއްދޫގައި އިމާރާތްކުރި ފުލުހުންގެ މަރުކަޒު މިއަދު ރަސްމީކޮށް ހުޅުވައިފިއެވެ.
އެ ދެ ރަށުގައި ބޭއްވި ހާއްސަ ރަސްމިއްޔާތުގައި ފުލުހުންގެ މަރުކަޒު ރަސްމީކޮށް ހުޅުއްވައިދެއްވީ ހޯމްލޭންޑް މިނިސްޓަރު އަލީ އިހުސާންއާއި ޕޮލިސް ކޮމިޝަނަރު އަހުމަދު މުހައްމަދުއެވެ.
އެ ދެ ރަށުގެ ޕޮލިސް ސްޓޭޝަންގެ ބިންގާ އަޅާފައިވަނީ މިދިޔަ އަހަރު ޖުލައި މަހުއެވެ. އަދި އެ ދެ ޕޮލިސް ސްޓޭޝަން އިމާރާތްކުރުމުގެ މަސައްކަތް ވެސް ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަނާއެވެ.
މާފަރު ޕޮލިސް ސްޓޭޝަން ހުޅުވުމަށް ބޭއްވި ރަސްމިއްޔާތުގައި މިނިސްޓަރު އިހުސާން ވިދާޅުވީ މީގެކުރިން ޕޮލިސް ސްޓޭޝަންތައް ހުޅުވުނު ރަށްރަށުން ފެނިގެންދިޔަ ވަރަށް ރިވެތި ނަމޫނާތަކަކީ، އެ ރަށްރަށުގެ ކުށުގެ މާހައުލު ބަދަލުވެ އަދި ކުށްކުރުން މަދުވެފައިވާ ކަމަށެވެ.
“ހާއްސަކޮށް މި ހިސާބުގައި ގެވެށި އަނިޔާގެ މައްސަލަތަކާ އެއްޗެހި ރިޕޯޓުކުރެވޭލެއް ގިނަ. މި ބާވަތުގެ ކަންކަމަށް ވަރަށް ޕޮޒިޓިވް އިމްޕެކްޓެއް އައިސްފައި އެބަހުރި. ވަރަށް ބޮޑުތަނުން ކުޑަވެފައި އެބަހުރި. އެހެން ރަށްރަށުގައި އަމިއްލަ ސްޓޭޝަން ހަދައިގެން މަސައްކަތް ފެށި ހިސާބުން. އެހެންވީމާ، އަޅުގަނޑު އެ ދެން، މި ރަށުގައި ވެސް އެ ރޫހުގައި، މި ރަށުގައި ތިއްބަވާ ފުލުހުން އެ ގޮތުގައި އެ މަސައްކަތްތައް ކޮށްދެއްވުމަށް” މިނިސްޓަރު ވިދާޅުވިއެވެ.
މާފަރު ޕޮލިސް ސްޓޭޝަން ހުޅުވުމަށް ބޭއްވި ރަސްމިއްޔާތުގައި ޕޮލިސް ކޮމިޝަނަރު ވިދާޅުވީ، ނ. އަތޮޅުގައި އެންމެ ފުރަތަމަ ފުލުހުންގެ މަރުކަޒެއް ގާއިމުކޮށްފައި ވަނީ 1999ވަނަ އަހަރު ކަމަށާއި އޭރު ފުލުހުންގެ ސްޓޭޝަންތައް އަތޮޅުތެރޭގައި ނެތްކަމަށް ވިދާޅުވިއެވެ. އަދި 2026ވަނަ އަހަރުގެ މިއަދާ ހަމައަށް އައިއިރު އަތޮޅުގެ ހުރިހާ ރަށެއްގައި ފުލުހުން ތިބެގެން ހިދުމަތް ދެމުންދާކަމަށާއި، ފުލުހުން ބޭނުންވާގޮތަށް ޑިޒައިންކޮށްގެން ފުލުހުންގެ މަރުކަޒުތައް ހުޅުވަމުންދާކަމަށް ވިދާޅުވިއެވެ.
އޭގެ އިތުރުން. ފުލުހުންގެ އިމާރާތްތަކާއި މުވައްޒަފުންނާ އެކު ލިބޭ ކުރިއެރުމާއި ވަސީލަތްތަކާ އެއްވަރަށް ފުލުހުންގެ ފަރާތުންދޭ ހިދުމަތުގެ ފެންވަރު ވެސް މިއަދަށްވުރެ ރަނގަޅުކުރުމަށާއި، މަސައްކަތް ކުރަންތިބި ފުލުހުންގެ ވިސްނުން ބަދަލުކުރުމަށާއި އިތުރު ވިސްނުންތައް ހޯދައި ދެނެގަނެގެން މުއައްސަސާ ލެވެލްގައި، ރައްޔިތުން އެންމެ ގަޔާވާ، ޝައުގުވެރިވާނެ ފަދަ ހުރިހާ ގޮތްތަކެއް ހޯދައިގެން ފުލުހުންގެ ހިދުމަތް ފުޅާކުރުމަށް ވިދާޅުވިއެވެ.



.jpg)

ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.