ހުޅުމީދޫން އިތުރު 10 މީހަކު ފައްސިވެއްޖެ
އައްޑޫ ސިޓީ ހުޅުމީދޫން އިތުރު 10 މީހަކު ފައްސިވެއްޖެއެވެ.
ހުޅުމީދޫ އިއްޔެވަނީ މޮނިޓަރިންގެ ހާލަތަށް ލާފައެވެ. ހުޅުމީދޫ މޮނިޓަރިންގ އަށް ލާފައިވަނީ، އައްޑޫ ސިޓީ ހުޅުމީދޫގައި ކަރަންޓީނުގައި ތިއްބާ މިދިޔަ ހަފްތާގައި ޕޮޒިޓިވްވި ދެ މީހަކާ ކޮންޓެކްޓުވި އިތުރު ދެ މީހަކު އިއްޔެ ކޮވިޑް-19 އަށް ފައްސިވުމާއި ގުޅިގެންނެވެ. އިއްޔެ ހުޅުމީދޫން ކޮވިޑަށް ފައްސިވެފައިވަނީ ބިދޭސީންތަކެކެވެ.
މިކަމާ ގުޅިގެން ހުޅުދޫ ދާއިރާގެ ކައުންސިލަރު އިބްރާހިމް ޝުކުރީ "ދެން"އާ ވާހަކަ ދައްކަވަމުން ވިދާޅުވީ، މިހާރު މީދޫގެ 4 ގެއަކާއި ހުޅުދޫގެ 1 ގެ ކަރަންޓީން ކުރެވިފައިވާ ކަމަށާއި، މި ކޭސް ތަކަކަކީ މީގެ ކުރިން އެކޮޅަށް ދިޔަ އެމްޓީސީސީގެ 3 މުވައްޒަފެއް ފައްސިވުމާއެކު އެ ކޭސް އާ ގުޅުން ހުރި ކޭސްތަކެއް ކަމުގައި ބެލެވޭ ކަމަށެވެ.
މީގެ އިތުރުން ޝުކުރީ ވިދާޅުވީ، އެމްޓީސީސީން އެރަށަށް އައި މުވައްޒަފުން ޢަމަލު ކުރަމުން ގެންދިޔައީ އެޗްޕީއޭގެ މިންގަނޑުތަކާއި އެއްގޮތްވާގޮތުގެ މަތިން ކަމަށާއި، އެފަރާތުން އިތުރު އެއްވެސް މީހަކާ ޑައިރެކްޓް ކޮންޓެކްޓް ވެފައި ނުވާނެކަމުގެ ޔަގީންކަން ދީފައިވާ ކަމުގައެވެ. އަދި ފަހުން ކޮވިޑް-19 އަށް ފައްސިވި ކޭސްތަކަކީ އެމްޓީސީސީގެ ކޭސްއާއި ގުޅުން ހުރި ކޭސްއެއް ކަން ކަށަވަރު ނުވާކަމަށެވެ.
މިހާރު ކޮންޓެކްޓް ޓްރޭސިންގެ މަސައްކަތް ކުރެވެމުންދާ ކަމަށާއި މިހާރު ގާތްގަނޑަކަށް 60 ވަރަކަށް ސުންކު ނެގިފައިވާނެ ކަމަށާއި، އެހެންނަމަވެސް އަދި އެ ސުންކު ތަކުގެ ނަތީޖާ ލިބިފައިނުވާ ކަމުގައި ވެސް އޭނާ ފާހަގަކުރިއެވެ.
