އެސްޓީއޯ ރަމަޟާން ބާޒާރު ފަށައިފި: ބޮޑު އިނާމަކަށް 1 ލައްކަ ރުފިޔާ
އެސްޓީއޯގެ ރަމަޒާން ބާޒާރު ފަށާފައިވާއިރު، މި ޕްރޮމޯޝަންގެ ތެރެއިން 50 އިންސައްތައާ ހަމައަށް ޑިސްކައުންޓް ލިބޭނެއެވެ. ބޮޑު އިނާމަކަށް ހުށަހަޅާފައިވަނީ 1 ލައްކަ ރުފިޔާއެވެ.

ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ )ގެ އަހަރީ "ރަމަޒާން ބާޒާރު" ޕްރޮމޯޝަން ރަސްމީކޮށް ފަށައިފިއެވެ.
އަންނަ އަހަރުގެ މާރިޗު މަހުގެ 10ވަނަ ދުވަހުގެ ނިޔަލަށް ކުރިއަށްދާ މި ޕްރޮމޯޝަން އިފްތިތާހުކޮށްދެއްވީ މިނިސްޓްރީ އޮފް ފައިނޭންސްގެ ސްޓޭޓް މިނިސްޓަރު ހުސައިން ޝާމް އާދަމެވެ.
މި އަހަރުގެ ޕްރޮމޯޝަންގައި ހިމެނޭ ބައެއް މުދާތަކުން 50 އިންސައްތައާ ހަމައަށް ޑިސްކައުންޓް ލިބޭނެ ކަމަށް އެސްޓީއޯއިން ބުނެއެވެ. އަދި 500 ރުފިޔާއިން މަތީގެ ވިޔަފާރިކުރާ ފަރާތްތަކުގެ މެދުގައި ކޮންމެ ދެ ހަފުތާއަކުން ނަގާ ގުރުއަތުން ހޮވޭ ދެ ނަސީބުވެރިއަކަށް 2،500 ރުފިޔާގެ ގިފްޓް ވައުޗަރެއް ދިނުމަށް ވަނީ ހަމަޖެހިފައެވެ. މީގެއިތުރުން 5،000 ރުފިޔާއަށް ވުރެ ގިނައިން ވިޔަފާރިކުރާ ކަސްޓަމަރުންނަށް "ހަދިޔާ ގުޅި"އިން އިނާމު ހޯދުމުގެ ފުރުސަތު ލިބޭނެއެވެ.
މި ޕްރޮމޯޝަންގެ އެންމެ ބޮޑު އިނާމެއްގެ ގޮތުގައި އެސްޓީއޯއިން ކަނޑައަޅާފައި ވަނީ 100،000 ރުފިޔާގެ ފައިސާގެ އިނާމެވެ. އެސްޓީއޯގެ ސޭލްސް މެނޭޖަރު އައިޝަތު ނަޒާހަތު ވިދާޅުވީ، މި ޕްރޮމޯޝަންގެ މައިގަނޑު މަގްސަދަކީ ރޯދަމަހާ ދިމާކޮށް ރައްޔިތުންނަށް ލުއި ފަސޭހަ އަގުތަކެއްގައި މުދާ ފޯރުކޮށްދިނުން ކަމަށެވެ.
ރަމަޟާން ބާޒާރު ފެށުމާ އެކު، އެސްޓީއޯ ޕީޕަލްސް ޗޮއިސްގެ ފުރަތަމަ ފަންގިފިލާގައި "ކޮފީ ބީން އެންޑް ޓީ ލީފްސް"ގެ އައުޓްލެޓެއް ވެސް ވަނީ ހުޅުވާފައެވެ. މީގެ އިތުރުން ޕީކްއަބޫ، ލުއިބުއިން އަދި ޕްރޮކިއޯ ޕްލަސްގެ ފިހާރަތައް ވެސް މިހާރު ވަނީ އެސްޓީއޯގައި ހުޅުވާފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.