އިސްލާމީ މަރުކަޒުގެ ހޯލްގެ ކާޕެޓް އައުކުރަން ޕާކިސްތާނުގެ އެހީއެއް

އިސްލާމީ މަރުކަޒުގެ މައި ހޯލުގެ ކާޕެޓު ބަދަލުކުރުމަށް ޕާކިސްތާނު ސަރުކާރުން ފައިސާގެ އެހީތެރިކަން ދީފިއެވެ.
މިކަމަށްޓަކައި މިއަދު ދިވެހިރާއްޖޭގައި ހުންނަ ޕާކިސްތާނުގެ ހައި ކޮމިޝަނުގައި ބޭއްވުނު ހާއްސަ ރަސްމިއްޔާތެއްގައި ފައިސާގެ ޗެކު ހަވާލުކޮށްދެއްވީ ޕާކިސްތާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ފައިސަލް ރަސުލް ލޯދިއެވެ. އަދި އިސްލާމިކް މިނިސްޓްރީގެ ފަރާތުން އެ ޗެކާއި ހަވާލުވެލެއްވީ ޕާމަނަންޓު ސެކްރެޓަރީ އަހުމަދު އަދީލްއެވެ.
މި ރަސްމިއްޔާތުގައި ޕާކިސްތާނު ސަރުކާރުގެ ފަރާތުން ދެއްވި އެހީތެރިކަމަށްޓަކައި އިސްލާމިކް މިނިސްޓްރީގެ ފަރާތުން ޕާކިސްތާނު ސަރުކާރަށާއި، ޕާކިސްތާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ފައިސަލް ރަސުލް ލޯދިއަށާއި ހައި ކޮމިޝަނުގެ އެންމެހާ މުވައްޒަފުންނަށް ޝުކުރު އަދާކުރިއެވެ.
ޕާކިސްތާނު ސަރުކާރުގެ މި ދީލަތި އެހީއާ އެކު، މި މަސައްކަތް ވީހާ ވެސް އަވަހަށް ނިންމުމަށް އަމާޒު ހިފާފައިވާކަމަށް އިސްލާމިކް މިނިސްޓްރީން ބުންޏެވެ.
ޕާކިސްތާނުން ފައިސާގެ އެހީގެ ގޮތުގައި ދިނީ ކިހާ އަދަދެއްކަމެއް އިސްލާމިކް މިނިސްޓްރީން ހާމައެއް ނުކުރެއެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.